Salmane 46 - Bibel 1938 - Bibelselskapet(Bibel1938)

Gud hev hjelpt folket sitt i alle trengslor; difor ottast dei ikkje um verdsstormane rasar aldri so vilt, 2-4. Han er midt ibland dei med sin rike nåde og kjem dei snøgt til hjelp med si frelsande allmakt, 5-8. Eit vitnemål um det er den domen han nyst hev halde yver eit storrike som hev trengt folket hans; difor skal folki lata dei vera i fred og sanna at han er Gud, 9-12.

1Til songmeisteren; av Korahs born, etter Alamot; ein song. /

2Gud er vår hyggja og vår styrke, ei hjelp i trengslor, røynd og funni stor.Sal 18,2-3; Ordt 18,10

3Difor ottast me ikkje, um so jordi vert umskift, og um fjelli ragar i havsens hjarta,

4um havbårone dyn og skumar, og fjelli skjelv for deira ofse. Sela.Sal 46,7; 65,8; 93,3-4

5Der er ei å, hennar bekker gled Guds by, den heilage stad der den Høgste bur.Sal 36,9

6Gud er midt i han, so han skal ikkje rugga; Gud hjelper han i morgonlysingi.Sef 3,17; Sak 2,9; Matt 16,18

7Folkeslag rasa, rike vart rikka; han let si røyst ljoda, jordi bråna.Jes 8,9-10; 17,12

8Herren, allhers Gud, er med oss; Jakobs Gud er vår faste borg. Sela.Rom 8,31

9Kom og sjå Herrens storverk, som hev gjort øydeleggjing på jordi.Sal 66,5

10Han gjer ende på herferder yver all jordi, bryt bogen sund og høgg spjotet av; stridsvognene brenner han upp i eld.Sal 76,4; Jes 9,5; Hos 2,18

11Hald upp og kjenn at eg er Gud! Eg er upphøgd millom folki, upphøgd på jordi.

12Herren, allhers Gud, er med oss; Jakobs Gud er vår faste borg. Sela.