Joel 1 - Bibel 1938 - Bibelselskapet(Bibel1938)

Joel forkynner at det skal koma digre grashoppesvermar som et upp alt - eit bilete på fiendar som øyder alt; dei skal øyda landet som det aldri hev vore øydt fyrr, 1-7. Han manar folket til å syrgja og jamra, 8-12, og venda seg til Herren med fasta og bot, 13-18. Han ropar sjølv til Herren um frelsa frå øydingi, 19-20.

1Herrens ord som kom til Joel Petuelsson:

2Høyr dette, de som gamle er! Lyd etter, alle som bur i landet! Hev sovore hendt i dykkar tid eller i tidi åt federne dykkar?

3De skal fortelja um det til borni dykkar, og dykkar born til sine born, og deira born til ei ætt som kjem.

4Det som gnagaren leivde, åt grashoppen upp, det som grashoppen leivde, åt sleikjaren upp, og det som sleikjaren leivde, åt skavaren upp.

5Vakna, de drukne, og gråt og jamra dykk, alle de vindrikkarar, av di druvesafti er rivi frå munnen dykkar.

6For eit folk hev fare yver landet mitt, sterkt og utan tal; tennene deira er som løvetenner, og jakslar hev dei som løvebinna.

7Vintrei mine hev dei snøydt, og fiketrei hev dei brote ned; dei hev flekt dei reint og hivt dei; greinene hev vorte kvite.

8Barma dykk som ei møy som gjeng syrgjeklædd for sin ungdoms brudgom!

9Matoffer og drykkoffer er kvorvne frå Herrens hus; prestane, Herrens tenarar, syrgjer.