Daniel 6 - Bibel 1938 - Bibelselskapet(Bibel1938)

Darius frå Media set yver riket sitt 120 satrapar og yver dei tri landshovdingar; ein av dei er Daniel, som gjeng framum dei andre og vinn den største godhug hjå kongen, 1-4. Dei andre vert ovundsame for dette og fær kongen til å bjoda at i 30 dagar må ingen venda seg med bøn til nokon annan enn til kongen; elles skal dei kasta han i løvegropi, 5-10. Daniel bed framleides, som han var van, til sin Gud tri gongar um dagen, han vert klaga, og kongen lyt mot sin vilje kasta han i løvegropi, 11-18; men um morgonen dagen etter finn kongen han til si store gleda uskadd, let mennene sine henta han upp or gropi og kasta klagarane hans nede; dei vert straks uppetne av løvone, 19-25. Darius byd at alle undersåttane hans skal ottast og æra Daniels Gud, 26-29.

1Og Darius frå Media tok imot riket; han var då tvo og seksti år gamal.

2Darius fann for godt å setja eit hundrad og tjuge satrapar yver riket; dei skulde bu rundt ikring i heile riket.

3Yver dei sette han tri riksrådar, og av dei var Daniel den eine; for dei skulde satrapane gjera rekneskap, so kongen ikkje skulde lida noko tap.

4Men Daniel merkte seg ut framfor hine riksrådane og satrapane, av di det var ei makelaus ånd i han, og kongen tenkte på å setja han yver heile riket.

5Då leita riksrådane og satrapane etter skuld hjå Daniel i det som kom riksstyringi ved, men dei kunde ingi skuld finna, eller noko som var rangt, med di han var trugen i tenesta si; det fanst ingi misferd og inkje rangt hjå han.