Salmane 143 - Bibel 1938 - Bibelselskapet(Bibel1938)

Fiendane hev forfylgt David, so han er komen i stor naud; no bed han at Herren ikkje må ganga til doms med han for syndene hans, men fria han or hendene på forfylgjarane og ved sin Ande leida han på den rette vegen, so han kann gjera hans vilje, 1-10. Til slutt segjer han seg viss på at Herren vil frelsa han og tyna fiendane, 11.12.

1Ein salme av David. / Herre, høyr mi bøn, vend øyra til mine inderlege bøner, svara meg i din truskap, i di rettferd,Sal 4,2

2og gakk ikkje til doms med din tenar! For ingen som lever, er rettferdig for di åsyn.Job 9,2-3; 15,14; Rom 3,23

3For fienden hev forfylgt mi sjel, han hev krasa mitt liv til jordi, han hev sett meg på myrke stader som dei æveleg daude.Sal 88,4-7; Klag 3,6

4Og mi ånd er vanmektig i meg, mitt hjarta er forskræmt i min barm.

5Eg kjem fordoms dagar i hug, eg tenkjer på alt ditt verk, eg grundar på det dine hender hev gjort.Sal 77,6

6Eg retter ut mine hender til deg, mi sjel lengtar etter deg som eit uppturka land. Sela.Sal 63,2

7Skunda deg og svara meg, Herre! Mi ånd talmast; løyn ikkje ditt andlet for meg, so eg vert lik dei som fer ned i gravi!Sal 28,1

8Lat meg høyra di miskunn um morgonen, for eg lit på deg! Lær meg den veg eg skal ganga, for til deg lyfter eg mi sjel!Sal 25,4; 86,11

9Fria meg frå mine fiendar, Herre! Hjå deg søkjer eg livd.

10Lær meg å gjera din vilje, for du er min Gud! Din gode Ande leide meg på jamt lende!Sal 27,11

11For ditt namn skuld, Herre, vil du halda meg i live; i di rettferd vil du føra mi sjel ut or trengsla,

12og i di miskunn vil du rydja ut mine fiendar og tyna alle som trengjer mi sjel; for eg er din tenar.