Salmane 65 - Bibel 1938 - Bibelselskapet(Bibel1938)

David prisar Gud av di han høyrer bønene åt alle menneske, forlet folket sitt syndene, signar det med sine gode gåvor og ved si store kraft, som syner seg i hans herlege verk både i naturi og millom folki, bergar det på underfull vis, so alle folk på jordi vert fyllte med age, tillit og fagnad, 2-9. No og hev han på nytt synt seg nådig mot folket sitt, med di han hev vatna jordi rikleg med regn og soleis gjeve det ei trygg von um ein signa haust, so alle kann gleda seg, 10-14.

1Til songmeisteren; ein salme av David; ein song.

2Gud, dei er stille for deg og prisar deg på Sion, og dei gjev deg det dei hev lova.Jes 30,15; Sal 62,2; 61,9; 66,13

3Du som høyrer bøner, til deg kjem alt kjøt.

4Når mine misgjerningar hev vorte for tunge for meg, so forlet du våre brot.Sal 38,5; 40,13

5Sæl er den som du vel ut og let koma nær, so han bur i dine fyregardar; me vil metta oss med det gode i ditt hus, ditt heilage tempel.Sal 27,4; 36,9; 84,5

6Med skræmelege gjerningar bønhøyrer du oss i rettferd, du vår Frelse-Gud, du som er ei livd for alle heimsens endar og havet langt burte.2 Sam 7,23

7Han gjer fjelli faste med si kraft, gyrd med velde.

8Han døyver havsens dur, bylgjeduren og bråket av folkeslagi.Sal 46,3-4; Jes 17,12-14

9Og dei som bur ved endane av jordi, reddast for dine teikn; heimen for morgon og kveld fyller du med fagnadrop.

10Du hev gjesta jordi og gjeve henne ovnøgd, du hev gjort henne ovleg rik, Guds bekk er full av vatn; du hev late dei få sitt korn, for soleis lagar du jordi til.5 Mos 11,11-12

11Du vatna hennar plogforer, jamna dei med upp-pløgde åkrar; du bløytte henne med regnskurer, velsigna hennar grøda.Sal 104,13

12Du hev krynt året med din godleik, og dine fotfar dryp av feitt.

13Beiti i øydemarki dryp, og haugane gyrdar seg med fagnadrop.

14Engjane er klædde med sauer, og dalane sveiper seg i korn; folk ropar med fagnad og syng.