Daniel 3 - Bibel 1938 - Bibelselskapet(Bibel1938)

Nebukadnesar let gjera eit stort gullbilete, som alle i riket hans skal tilbeda; elles skal dei verta kasta i ein gloande omn, 1-7. Daniels tri vener, som ikkje vil tilbeda det, vert klaga for kongen; dei let seg ikkje skræma av trugsmåli hans, og difor vert dei kasta i omnen, 8-23. Kongen ser dei og ein Guds engel med dei ganga inne i omnen; han byd dei å koma ut, og det syner seg at dei er heilt uskadde, 24-27. Kongen lovar deira Gud, forbyd alle folki å spotta han og upphøgjer dei tri mennene, 28-30.

1Kong Nebukadnesar gjera eit bilete av gull, seksti alner høgt og seks alner breidt; det fekk han sett upp i Duradalen i Babelsfylket.

2So sende kong Nebukadnesar ut menner som skulde stemna i hop satrapane og jarlane og landshovdingane og yverdomarane og skattmeistrane og dei lovkunnige og domarane og alle andre embetsmenner i fylki og beda dei koma vigsla av det biletet som kong Nebukadnesar hadde fenge reist.

3Då samla dei seg, satrapane og jarlane og landshovdingane og yverdomarane og skattmeistrane og dei lovkunnige og domarane og alle andre embetsmenner i fylki og skulde vigsla det biletet som Nebukadnesar hadde fenge reist, og då dei so stod framfor det biletet som Nebukadnesar hadde fenge reist,

4ropa herolden med høg røyst: Det vere dykk sagt, de folk og ætter og tungemål:

5Når de høyrer ljoden av horn og fløyta og citar og harpa og lutt og spel og alle andre slag strengespel, skal de falla ned og tilbeda det gullbiletet som kong Nebukadnesar hev fenge reist.

6Den som ikkje fell ned og tilbed, skal i same stundi kastast i den brennande eldomnen.