APOCALIPSIS 22 - Quichua Imbabura Bible

1Chai jipami, causaita cuj na mapayashca jatun yacutapash ricuchihuarca. Chai yacuca, Taita Diospash, Llamapash mandashpa tianajujmandami, espejoshna punchapamba llujshijurca.

2Chai pueblopaj chaupi ñambi, jatun yacu manñapimi, causaita cuj quiruca cai ladomambash, chai ladomambash shayajurca. Chai quiruca, tucui quilla fucushpami, huatapi chunga ishcaicaman, granota fucujurca. Chai quirupaj fangapash, tucui llactacunamanda shamushcacunapaj jambimi carca.

3Chaipica, Dios ninanda nalicachi tucushcacunaca, na ashtahuan tiangachu. Chaipimi Taita Diospajpash, Llamapajpash mandangapaj tiarinaca tianajunga. Paita servijcunapash, paitallami servinajunga.

4Paitapash, ñavi ñavimi ricunajunga. Paipaj shutitapash, paicunapaj frentepi churashcami canga.

5Chaipica, tutapash na ashtahuan tiangachu. Mandaj Taita Diosmi, paicunataca punchayachinga. Chaipica, lámpara michapash, indipash na ashtahuan punchayachingachu. Chaipimi, causaita causaicaman mandanajunga.

Jesucristoca, ñallami shamunga

6Chai angelca, cashnami nihuarca: “Cai shimicunaca, na llullaj, pactachij cajpimi, Mandaj Taita Diosca pai ima nishcata villajcunaman, paipaj Espirituta carashpa villajun. Ñalla ima tucunatapash, paita servijcunaman ricuchijuchunmi, Diosca paipaj ángel cajpi, ñucata cachamurca” nihuarcami.

7“¡Ricuichi, ñapashmi shamusha! Jipaman ima tucunata Dios villachishpa cai libropi escribishca shimicunata cazujcunaca, ninanda cushijuichi”.

8Juanmi cani. Ñucami, cai tucuita uyarcani, ricurcani. Shina uyashpa ricushpaca, ñucaman cashnacunata ricuchijuj angelpaj ñaupajpimi, paita ninanda alicachingapaj cungurircani.

9Ashtahuangarin paica, cashnami nihuarca: “Ricui, na chashna ruranachu cangui. Ñucapash canshnallata, cambaj huauquicunashnallata, Dios ima nishcata villajcunashnallata, cai libropi escribishca shimicunata cazujcunashnallata, Diosta servijmi cani. Taita Diostallami alicachina cangui” nihuarcami.

10Chai angelca, cashnatapashmi nihuarca: “Cai libropi escribichishca shimicunapi ima nijujtaca, na sellanachu cangui. Chaicuna pactana punllacunaca, ñami chayamujun.

11Imatapash cashcatapacha na rurashpa causajca, imatapash cashcatapacha na rurashpa catijcunallami. Mapata rurashpa causajpash, mapata rurashpa catijcunallami. Ashtahuangarin imatapash cashcatapacha rurashpa causajca, imatapash cashcatapacha rurashpa catijcunallami. Shinallata Diospajlla causajushpaca, ashtahuan aliguta causashpa catijcunallami” nihuarcami.

12“Ricunguichi, ñucaca ñapashmi shamusha. Tucuicuna imatalla rurashcamandapash canguna japinataca, apashpami shamusha.

13Ñucami, A letrashna callarichijpash, Zeta letrashna tucuchijpash cani.

14Churajunata tajshajcunaca, ninandami cushijunguichi. Cangunami, causaita caraj quirumanda micungapajpash, pueblo pungucunata yaicungapajpash, ushaita charinguichi.

15Ashtahuangarin alcushna causajcuna, yumbucuna, huainayajcuna, huañuchijcuna, yanga dioscunata mañajcuna, llullanata juyashpa tucui llullajcunaca, canllamanmi quedanga.

16Jesús ñucallatami, ñucata crij tandanajujcunaman cai shimicunata villajuchunga, ñuca angelta cachamurcani. Ñucami sapishna, Davidpaj miraipura cani. Tutamanda punchapamba llujshimuj luzeroshnami cani” nircami.

17Diospaj Espiritupash, Llamapaj huarmipashmi: “Shamupailla” ninajun. Maijambash caita uyajca: “Shamuilla” nichun. Maijambash yacunayachishpaca, shamuchun. Maijambash ufiangapaj munashpaca, causaita cuj yacuguta yanga ufiachun ninimi.

18Jipaman ima tucunatapash, Dios cai libropi escribichishca shimicunata tucui uyajcunamanmi, cashna villajuni: Cai villashca shimicunata pipash mirachijpica, Taita Diosca cai libropi escribichishca tiajuj llaquichinacunatami, paicunapaj jahuapi cachamunga.

19Shinallata jipaman ima tucunatapash, Dios cai libropi escribichishca shimicunamanda pipash anchuchijpica, causaita causagrinata villajuj libropi pai imata japigrinatami, Taita Diosca anchuchinga. Shinallata Diospajlla tiajuj pueblopi paicuna imata japigrinata, cai libropi escribishca tiajujtapashmi anchuchinga.

20Cai shimicunata villajmi: “Ari, ña shamushapachami” nijun.

Shina cachun. Ari, shamupailla, Apunchi Jesuslla.

21Ñucanchi Apunchi Jesucristopaj ninan juyaipash, tucui cangunahuan cachunmi munani. Shina cachun.