2 SAMUEL 17 - Quichua Imbabura Bible

Ahitofel shuti, Husai shuti runacunami yuyaita cushca

1Chai jipami Ahitofel shuti runaca, Absalondaca cashna nirca:

—Cunanga, chunga ishcai huaranga runacunata ñuca agllashpami, cunan tutallata jatarishpa, Davidta catishpa rigrini.

2Paitaca, shaijushca na ushajujpi japigrishpa manllachigrisha. Shina manllachijpi paihuan chaipi tandanajushca tucui gentecuna pacajushpa calpajpimi, jatun mandajtalla japishpa huañuchisha.

3Shina rurashpami, tucui gentecunata cambajman tigrachimusha. (Canga, shuj runa huañuchunllami munangui). Paicuna tigramujpimi gentecunaca, aliguta casilla causanajunga— nircami.

4Cai yuyaica Absalón runapajpash, israelcunata mandaj tucui rucucunapajpash alimi uyarirca.

5Chai jipami Absalón runaca, cashna nirca:

—Cunanga, arquita nishcapura Husai shuti runa ima nijta uyangapaj, paita cayamuichi— nircami.

6Absalón runapajman, Husai shuti runa chayamujpimi cashna nirca:

—Ahitofel shuti runaca, cashnami nin: ‘¿Pai yuyaita cushcataca catishunllu, na cashpaca saquishunllu? ¿Canga, ima ninguita?’— nircami.

7Shina nijpimi Husai shuti runaca, Absalondaca:

—Ahitofel runa cunan cushca yuyaica, napacha alichu— nirca.

8Husai shuti runaca, ashtahuan cashnatapash nircarami:

—Cambaj taitapash, paipaj runacunapash ninan shinllicuna cajtaca, canllata yachanguimi. Cunangarin, huahuacunata quichujpi sachapi causaj huarmi oso ninanda fiñarishcashnami canga. Chai jahuapash cambaj taitaca, ali macanajunata yachajmi. Chaimanda cunan tutaca, na gentecunahuan yalingachu.

9Ricui cunanga, paica maijan jatun utujupi, na cashpaca maipi cashpapash pacajuriajungami. Chaira macanajui callarijpillata, canda catijcunata maijambash huañuchijpi, chaita pipash yachashpaca: ‘Absalonda catij gentecunaca, mishai tucushcamari’ ninajungami.

10Chaita uyashpaca, maijan ninan shinlli runa, leonshna fiñarij shunguta charishpapash ninandapacha manllashpami, ushai illaj quedanga. Tucui israelcunami, cambaj taita ninan shinlli cajta, paihuan purij runacunapash, ninan ushaita charijtaca yachan.

11Tucui israelcunaca, Dan pueblomanda callarishpa Beerseba pueblocaman, mama cucha manñapi tiaj t'iyu alpashna canhuan tandanajuchunmi yuyaita cuni. Shinallata cambacha chai macanajuiman llujshingui.

12Chashna llujshishpami maipi cajpipash, pambapi paramu urmanshna, paitaca japishun. Shina japishpami paitapash, paita catijcunatapash tucuillata huañuchishpa shujllatapash na saquishun.

13Imashpapash maijan pueblopi pacajugrijpica, tucui israelcunami cabiacunata chai puebloman apanga. Chaihuanmi aisashpa, jatun larca yacuman shitashun. Shina shitajpimi, shuj rumillapash chaipica na quedanga— nircami.

14Shina nijpimi Absalonbash, tucui israelcunapash cashna ninajurca:

—Arquita nishcapura Husai shuti runa cushca yuyaimi, Ahitofel runa cushca yuyaitaca yali alipacha— ninajurcami.

Ahitofel runa cushca yuyai yangapacha cachunmi, Mandaj Diosllata chashna rimachirca. Mandaj Diosca, Absalonda llaquichingapajmi chashna rurarca.

15Chai jipami Husai runaca, Sadoc shuti, Abiatar shuti curacunatapash, cashna nirca:

—Ahitofel runaca, Absalonmambash, israelcunata mandaj rucucunamambash, cashna chashna yuyaitami curca. Ashtahuangarin ñucaca, cashna yuyaitami curcani.

16Shina cashcamanda, Davidman uchalla cashna nishpa villachun cachaichi: ‘Cunan tutaca, jichushca pambamanda chimbai ushanalla ladopica na quedanachu cangui. Ashtahuangarin can jatun mandajtapash, canhuan purinajuj tucuilla runacunatapash ama huañuchinajuchun, Jordán yacuta chimbashpa ri’ nishpa villachun cachaichi— nircami.

17Jonatán shuti, Ahimaas shuti runacunaca, Rogel shuti pugyu ladopimi carca. Chaimanmi, shuj servij huarmi shamushpaca, paicunaman villarca. Paicunaca, Jerusalenman shamushpa imashna ricuritapash na ushanajurcachu. Paicuna rishpami, jatun mandaj David yachachun villanajurca.

18Chashna villangapaj rinajujta shuj huambra ricushpami, Absalonman villagrirca. Ashtahuangarin paicuna ninanda rishpami, Bahurim shuti pueblopi causaj shuj runagupaj huasiman chayagrirca. Chai huasi patiopica, yacuta llujchingapaj allashca jatun utujutami charirca. Chai utujupimi pacajurca.

19Chai huasipi causaj huarmimi, shuj fachata japishpa, chai jatun utuju shimita quilpashpa mandarca. Chai jahuapimi, trillashca trigota mandarca. Shina rurajpimi, chaipica ima tiajujtapash na yacharca.

20Chai jipaca, Absalón runata servijcuna chai huarmipaj huasiman ña chayashpami:

—¿Ahimaas shuti, Jonatán shuti runaca maipita?— nishpa tapurca.

Shina tapujpimi, chai huarmica:

—Ñami yacuta chimbai ushanalla ladota yalinajurca— nirca.

Shina nijpimi, paicunaca mascanajushpapash, na tarishpallata Jerusalenman cutin tigranajurca.

21Paicuna ña rishca jipami, yacuta llujchingapaj allashca jatun utujumanda llujshishpa rishpaca, jatun mandaj Davidman cashna nishpa villanajurca: “Jatarishpa, Jordán yacuta ucha chimbaichi. Ahitofel runaca, cangunata huañuchinajuchunmi yuyaita cushca” ninajurcami.

22Shina villajpimi nara pacarijpillata Davidpash, paihuan purinajuj tucuilla runacunapash, Jordán yacuta chimbanajurca. Jordán yacuta tucuilla chimbashpami, shujllapash na quedarca.

23Ashtahuangarin Ahitofel runaca, pai yuyaita cushcacunata na rurajpimi, paipaj burropi tiarinata churashpa tiarishpa, pai huacharishca pueblopi tiajuj paipaj huasiman rirca. Paipaj huasipi imatalla ruranatapash ña rurashca jipami, sipirishpa huañurca. Pai huañujpica, paipaj taitata pambashca utujupillatami pambarca.

24Davidca, Mahanaim shuti pueblomanmi chayagrirca. Shinallata Absalón runaca, tucui israelcunandimi, Jordán yacuta chimbajurca.

25Absalón runaca, Joab runapaj randica, Amasa shuti runatami, paipaj soldadocunata mandaj cachun churarca. Amasa shuti runaca, Israelpura Itra shuti runapaj churimi carca. Itra shuti runaca, Nahas shuti runapaj ushi Abigailpimi chayashca carca. Paica, Joab runapaj mama Sarvia shuti huarmipaj ñañami carca.

26Israelcunaca, Galaad llactapimi carpacunata shayachishpa, Absalonhuan tianajurca.

27Mahanaim shuti puebloman David chayashca jipami, Amón llactapi tiajuj Rabá shuti pueblopi causajuj Nahas shuti runapaj churi Sobi shuti runapash, shinallata Lodebar shuti pueblopi causajuj Amiel shuti runapaj churi Maquir shuti runapash, Galaad llactapi tiajuj Rogelim pueblopi causajuj Barzilai shuti runapash tuparingapaj llujshirca.

28Paicunaca Davidmambash, paihuan purij tucuilla runacunamambash caicunatami apamurca: Camacunata, tastacunata, alpa mangacunata, shinallata trigota, cebadata, cutashca jacuta, camllashca granota, jabasta, lentejasta, camllashca garbanzota,

29balún mishquita, virata, llamacunata, huagra leche quezocunatapashmi apamurca. Gentecunaca, jichushca pambapica shaijushca, yarjachishca, yacunayachishcami canga yashpami, paicuna micuchun chaicunata apamurca.