ESDRAS 5 - Quichua Imbabura Bible

Diospaj huasitaca, cutinmi shayachi callarishca

1Hageo shuti runagupash, Iddo shuti runapaj churi Zacarías runapashmi, Dios villashcata villanajurca. Dios ima nishcata chai ishcandi villajcunaca, Judá llactapi, Jerusalenbi causajcunamanmi, israelcunapaj Taita Diospaj shutipi villanajurca. Taita Diosca, paicunahuanmi carca.

2Shina villajpimi, Salatiel shuti runapaj churi Zorobabel shuti runapash, Josadac shuti runapaj churi Jesúa shuti runapash, Taita Diospaj huasita Jerusalenbi cutin shayachingapaj callarirca. Shinallata Taita Dios ima nishcata villajcunapashmi, paicunataca ayudanajurca.

3Chai punllacunallatami, jatun yacu chimba lado llactacunata mandaj Tatnai shuti runaca, Setar-boznai shuti runandi, paicunapaj cumbacunandi, Jerusalenman shamushpa cashna tapunajurca: “Cai huasita shayachinajuchun, muyundi cai jatun pircacunata alichinajuchunga, ¿pita cangunataca mandarca?” ninajurcami.

4Paicunaca cashnatapash tapunajurcarami: “Cai huasita huasichij runacunaca, ¿ima shuticunata?” ninajurcami.

5Ashtahuangarin Judá llactapi causajcunata mandaj rucucunataca, Taita Diosmi ricuriajurca. Shinamandami, Persia llactata jatun mandaj Darioman villangacaman, na saquichi usharca. Chaimandami chai tapushcataca, cartapi escribishpa tigrachishpa cacharca.

6Chai cartata shujman yalichishpa escribishcataca, jatun yacu chimba lado llactacunata mandaj Tatnai shuti, Setar-boznai shuti runacunapash, jatun yacu chimba lado llactacunata mandaj paicunapaj cumbacunapashmi, jatun mandaj Dariopajman cachanajurca.

7Chai cartatami cachanajurca. Chai cartapica, cashnami escribishca carca: “Can jatun mandaj Dariotaca, casilla ali causaiguta charichunmi munapanchi.

8Chai jipaca, can jatun mandaj caita yachachunmi munapanchi: Ñucanchica, Judea llactamanmi jatun Taita Diospaj huasiman rircanchi. Chai huasitaca, jatun rumicunahuanmi shayachinajun. Chai pircacunapipash, ñami tablacunata churashca. Chai ruranataca, uchami ruranajun. Chai ruranacunaca, tucuimi ali llujshijun.

9Chaimandami mandaj rucucunataca, cashna nishpa tapurcanchi: ‘Cai huasita shayachinajuchun, muyundi cai jatun pircacunata alichinajuchunga, ¿pita cangunataca mandarca?’ nishpami tapurcanchi.

10Shinallata paicunapaj shuticunatapashmi, can yachachun villangapaj tapurcanchi. Paicunata mandanajuj runacunapaj shutita canman escribingapajmi tapurcanchi.

11Paicunaca, cashna nishpami tigrachinajurca: ‘Ñucanchica, jahua pachata, cai pachata ruraj Taita Diosta servijcunami canchi. Ñucanchica, punda huatacunallata ña huasichishca huasitami, cutin shayachinajunchi. Cai huasitaca, israelcunata alipacha jatun mandajmi shayachishpa tucuchishca carca.

12Ashtahuangarin chai jipaca, ñucanchi ñaupa taitacunami, jahua pachapi causaj Taita Diosta ninandapacha fiñachinajushca. Chaimandami paica, Babilonia llactata mandaj caldeopura Nabucodonosor shuti jatun mandajpaj maquipi churashca. Paimi, cai huasitaca tucuillata urmachishpa, gentecunatapash Babilonia llactaman prezu apashca.

13Shina cajpipash Babilonia llactata jatun mandaj Ciro shuti runa mandai callarijui huatapimi, Taita Diospaj cai huasita cutin shayachinajuchun, pai jatun mandaj Ciro shuti runallata mandarca.

14Taita Diospaj huasimandaca orota, culquita rurashca ima charishcacunatami, jatun mandaj Nabucodonosor runaca, Jerusalenbi tiaj Diospaj huasimanda llujchishpa, Babilonia llactapi tiaj dioscunapaj huasiman apashca carca. Chaicunatapashmi jatun mandaj Ciro shuti runaca, Babilonia llactapi tiaj dioscunapaj huasimanda llujchishpa, Sesbasar shuti runaman cushca carca. Paitaca, mandaj cachunmi churashca carca.

15Shina cushpami, cashna nirca: Ima charishcacunataca, Jerusalenbi Diospaj huasiman apailla. Taita Diospaj huasitaca, punda maipi cashca pushtupillata cutin shayachinguilla’ nircami nishpami tigrachinajurca.

16Shina nijpimi, cai Sesbasar shuti runa shamushpaca, Jerusalenbi Taita Diospaj huasita shayachingapaj callari rumicunata churarca. Chai punllamandapacha cunangamanmi huasichinajunchi. Shina cajpipash nara tucurinllu.

17Cunanga, can jatun mandajpaj yuyaipi ali cajpica, chai escribishcataca Babilonia llactapi tiaj can jatun mandajpaj huasipi mascachipailla. Shina mascachishpa, Jerusalenbi Taita Diospaj cai huasita cutin huasichinajuchunga, jatun mandaj Ciro shuti runallata mandashca cajpica, can jatun mandaj imata nishpapash, ñucanchiman villashpa cachamupangui” nishpami, escribishpa cacharca.