1 REYES 22 - Quichua Imbabura Bible

Acab runa mishai tucunatami Micaías runaca villashca(2 Crón. 18:1-34)

1Quimsa huatatami siriocunahuan, israelcunahuanga na macanajushpa causanajurca.

2Ña quimsa huata pactajpimi, cashna tucurca: Judá llactata jatun mandaj Josafat runami, Israel llactata jatun mandajta ricungapaj urai rirca.

3Chaipimi, Israel llactata jatun mandajca, paita servijcunata cashna nirca:

—Galaad llactapi tiaj Ramot shuti pueblo ñucanchipaj cajtaca, ¿nachu yachanguichi? Siria llactata jatun mandajpaj maquimanda japingapaca, imatallapash na rurashcanchica— nircami.

4Shinallata Josafat runatapashmi, cashna nirca:

—¿Galaad llactapi tiaj Ramot shuti pueblopi causajcunahuan macanajungapaj ñucahuan risha ninguichu?— nircami.

Shina nijpimi Josafat runaca, Israel llactata jatun mandajtaca, cashna nishpa tigrachirca:

—Ñucapash, cambash shujllashnallami canchi. Ñuca gentecunapash, cambaj gentecunashnallatami, ñuca caballocunapash, cambaj caballocunashnallatami— nircami.

5Shina nishca jipapash Josafat runaca, Israel llactata jatun mandajtaca:

—Cunanga, Mandaj Dios ima nijta yachangapaj tapupai— nircami.

6Shina nijpimi Israel llactata jatun mandajca, villaj runacunata chuscu patsajtashna tandachirca. Paicunatami, cashna nishpa tapurca:

—¿Galaad llactapi tiaj Ramot shuti pueblopi causajcunahuan macanajungapaj rinallachu cani, na cashpaca saquinallachu cani?— nircami.

Shina nijpimi, paicunaca:

—Vichai rilla. Mandaj Diosca, can jatun mandajpaj maquipimi churanga— ninajurca.

7Shina nijpimi Jasafat runaca, cashna nirca:

—Dios ima nishcata tapungapaca, ¿Mandaj Dios ima nishcata villaj maijambash caipi tianrachu?— nircami.

8Shina nijpimi Israel llactata jatun mandajca, Josafat runataca cashna nirca:

—Mandaj Dios ima nishcata tapungapaca, shuj runa tianrami. Ashtahuangarin paitaca na ricunayanllu. Paica, ima horallapash alitaca na villanllu, nali cashcatallami villan. Paica, Imla shuti runapaj churi Micaías runami— nircami.

Shina nijpimi, Josafat runaca:

—Jatun mandajlla, ama chashna rimaichu— nirca.

9Shina nijpimi Israel llactata jatun mandajca, paita servij soldadota cayashpaca:

—Imla shuti runapaj churi Micaías runata, ucha pushamugri— nirca.

10Israel llactata jatun mandajpash, Judá llactata jatun mandaj Josafat runapash, jatun mandajcuna churajunata churajushcami, paicuna tiarinapi tianajurca. Paicunaca, Samaria puebloman yaicuna pungu ladolla plazapimi tianajurca. Chaipimi villaj runacunaca, paicunapaj ñaupajpi villanajurca.

11Quenaana shuti runapaj churi Sedequías shuti runami, shuj jirru cachucunata rurashca carca. Paica chaita ricuchishpami, cashna nirca: “Mandaj Diosca, cashnami nin: ‘Siriocunataca, cai cachucunahuan tupanshnami, tucuillata tucuchingui’ ninmi” nircami.

12Tucui villajcunapash, chashnallata villashpami cashna nishpa villanajurca: “Galaad llactapi tiaj Ramot shuti pueblopi causajcunahuan macanajungapaj vichai rilla, mishanguimari. Mandaj Diosmi, can jatun mandajpaj maquipi churanga” ninajurcami.

13Micaías runata cayangapaj rishca runaca, cashnami nirca:

—Uyai, caishuj villajcunaca, tucuicunami jatun mandajman shujllashnalla alitalla villanajun. Can villashpapash, pai purashnallata macanajuipi mishanata villapangui— nircami.

14Shina nijpimi Micaías runaca, cashna nishpa tigrachirca:

—Mandaj Diosca causajumbachami. Ñucaman Mandaj Dios imata nishcatallami villasha— nircami.

15Ña jatun mandajpajman shamujpimi, jatun mandajca cashna nirca:

—Micaías, ¿Galaad llactapi tiaj Ramot shuti pueblopi causajcunahuan macanajungapaj rishunllu, na cashpaca saquishunllachu?— nircami.

Shina nijpimi Micaías runaca, cashna nishpa tigrachirca:

—Vichai rilla, mishanguimi. Mandaj Diosmi paicunataca, can jatun mandajpaj maquipi churanga— nircami.

16Shina nijpimi jatun mandajca, cashna nirca:

—¿Mashnacamanda candaca, imatapash ama llullashpa chashna canatapacha, Mandaj Diospaj shutipi villahuai nijushallayari?— nircami.

17Shina nijpimi Micaías runaca, cashna nirca:

—Ñucaca, tucui israelcunatami michij illaj llamacunashna, lomacunapi caita chaita purinajujta ricushcani. Shina cajpimi Mandaj Diosca, cashna nirca: ‘Paicunaca, mandajta na charinllu. Imatapash na manllashpa, tucuicuna huasiman richilla’ nircami— nirca.

18Shina nijpimi, Israel llactata jatun mandajca, Josafat runataca cashna nirca:

—¿Nachu ñucaca, cashnami nirca: ‘Paica, ima alitapash ñucamandaca na villangachu, ashtahuangarin llaquitallami villanga’ nijurcani?— nircami.

19Shina nijpimi Micaías runaca, cashna nirca:

—Mandaj Dios rimashca shimita uyai. Ñucaca, Mandaj Diostaca pai tiarinapi tiajujtami ricurcani. Shinallata jahua pachapi tucui angelcunami, ali ladomambash, lluqui ladomambash paipaj ladopi shayanajurca.

20Chaipimi Mandaj Diosca, cashna nirca: ‘Galaad llactapi tiaj Ramot shuti pueblopi causajcunahuan macanajungapaj vichai rishpa llaquita apachunga, ¿pita Acab runaman panda yuyaita cugringuichi?’ nircami. Shina nijpimi huaquingunaca shujta, shujcunaca shujta ninajurca.

21Shinamandami shuj espirituca, Mandaj Diospaj ñaupajman shamushpa: ‘Panda yuyaitaca, ñuca cugrishallami’ nirca. Shina nijpimi, Mandaj Diosca: ‘¿Imashnata ruragringui?’ nirca.

22Shina nijpimi chai espirituca, cashna nirca: ‘Ñuca rishpaca, paipaj tucui villajcunapaj shimipimi llullachij espíritu casha’ nircami. Shina nijpimi: ‘Canga, pandachi ushanallami cangui. Chaita rurangapaj rilla’ nirca.

23Ricui, cunanga Mandaj Diosllatami cambaj tucui villajcunapaj shimipi, llullachij espirituta churashca. Mandaj Diosllatami, can llaquichi tucuchunga, ña chashna mandashca— nircami.

24Shina nijpimi, Quenaana shuti runapaj churi Sedequías runaca, Micaías runapajman quimirishpa, lado ñavipi huactashpaca cashna nirca:

—Mandaj Diospaj Espirituca, ¿ñucamandaca maita rishpata, canmanra villarcayari?— nircami.

25Shina nijpimi Micaías runaca, cashna nishpa tigrachirca:

—Ricui, shuj ucumanda caishuj ucuman pacajushpa purijui punllami chaitaca yachangui— nircami.

26Shina nijpimi Israel llactata jatun mandajca, cashna nirca:

—Micaías runata japishpa, pueblota mandaj Amón runapajmambash, jatun mandaj ñuca churi Joás runapajmambash apaichi.

27Paicunataca cashna ninguichi: ‘Jatun mandajca, cashnami nin: Micaías runataca, prezuna huasipi churaichi. Imapash na tucushpa aliguta ñuca tigramungacaman ninan llaquita apajuchun tandatapash, yacutapash asha ashalla carashpa charinguichi’ ninmi ningui— nircami.

28Shina nijpimi Micaías runaca, cashna nirca:

—Imapash na tucushpa can aliguta tigramushpaca, Mandaj Diosca na ñucaman villashcatami yachangui— nircami.

Cashnatapashmi nirca:

—Tucui gentecunapash uyahuaichi— nircami.

29Israel llactata jatun mandajpash, Judá llactata jatun mandaj Josafat runapashmi, Galaad llactapi tiaj Ramot shuti puebloman vichai rinajurca.

30Israel llactata jatun mandajca, Josafat runataca cashnami nirca:

—Ñucaca, shuj churajunata churajushpami, macanajuiman yaicusha. Canga, cambaj churajunatallata churajuilla— nircami.

Chashnami Israel llactata jatun mandajca, shuj churajunata churajushpa macanajuiman yaicurca.

31Ashtahuangarin Siria llactata jatun mandajca, macanajuna carretacunapi purij soldadocunata mandaj, quimsa chunga ishcai soldadocunataca, cashna nishpami cachashca carca: “Jatungunahuambash, yangalla soldadocunahuambash, na macanajunachu canguichi. Ashtahuangarin Israel llactata jatun mandajhuanlla macanajunguichi” nishcami carca.

32Carretacunapi purij soldadocunata mandajcuna, Josafat runata ricushpaca: “Paica, Israel llactata jatun mandajpachami” nishpami, paihuan macanajungapaj shamunajurca. Chaimandami, jatun mandaj Josafat runaca caparijurca.

33Carretacunapi purij soldadocunata mandajcunaca, na Israel llactata jatun mandaj cashcata ricushpami, paipaj ladomanda anchurinajurca.

34Ashtahuangarin shuj soldadoca, arcohuan shuj flechata yangalla cacharishpami, Israel llactata jatun mandajtaca, macanajungapaj churajushca jirru churajuna chaupita yalichishpa chugrichirca. Chaimandami Acab runaca, paipaj carretata purichij runataca, cashna nirca:

—Carretata tigrachishpa, macanajuna pambamanda llujchihuai. Ñucaca chugrishcami cani— nircami.

35Ashtahuangarin chai punllapica, macanajuica ashtahuanmi shinlliyarca. Shinallata jatun mandajpash paipaj carretapimi, siriocunapaj ñaupajpi shayajurca. Chashnami, ña chishajpica huañurca. Chai chugrimanda yahuarca, carreta cajondami urai rijurca.

36Ña indi huashajujpica, carpacunata shayachishca pambapimi: “¡Tucuicuna cangunapaj pueblocunaman, cangunapaj llactacunaman richi!” nishpa caparingapaj llujshirca.

37Jatun mandaj huañujpica, Samaria puebloman apamushpami, jatun mandajtaca Samaria pueblopi pambarca.

38Carretataca, Samaria pueblo ladopi cuchayashca yacupimi maillanajurca. Paipaj yahuartaca, alcucunami lambinajurca. (Chai yacupica, culquimanda huainayaj huarmicunapashmi armanajurca). Mandaj Dios imashna villashcashnallatami tucurca.

39Acab runa ashtahuan imatalla rurashcacunapash, tucui imatalla rurashcapash, marfil huasita rurashcapash, tucui pueblocunata rurashcapash, ¿nachu Israel llactata jatun mandajcuna imashna causashcata escribishca libropi tiajun?

40Acab runa huañushpa paipaj ñaupa taitacunahuan tandanajujpica, paipaj churi Ocozías runami, paipaj randi mandajurca.

Josafat runami mandajushca(2 Crón. 20:31-37)

41Israel llactata jatun mandaj Acab runaca, chuscu huatata ña mandajujpimi, Asa shuti runapaj churi Josafat runaca, Judá llactata mandai callarirca.

42Josafat runaca, quimsa chunga picha huatata charishpami, mandai callarirca. Paica, ishcai chunga picha huatatami, Jerusalenbi mandajurca. Paipaj mamaca, Silhi shuti runapaj ushi Azuba shutimi carca.

43Paipaj taita Asa shuti runa causashcashnallatami, Mandaj Diospaj ñaupajpica aligutalla rurashpa, chai ali ñanmandaca maimambash na anchurishpa causajurca. Shina cashpapash lomacunapi tiaj altarcunataca, na anchuchircachu. Gentecunaca, chai altarcunapillata animalcunata huañuchishpa, inciensotapash cushnichishpa catinajujpimi na anchuchirca.

44Josafat runaca, Israel llactata jatun mandajhuanmi, casilla aliguta causangapaj ari nijurca.

45Josafat runa ashtahuan imatalla rurashcacunapash, pai ninan shinlli cashcapash, macanajuicunata rurashcapash, ¿nachu Judá llactata jatun mandajcuna imashna causashcata escribishca libropi tiajun?

46Paica, paipaj taita Asa shuti runa mandajui punllacunapi puchushca, jari purallata siririj sodomita nishca runacunatapashmi, chai llactamanda anchuchirca.

47Chai huatacunapica, Edom llactata jatun mandajca na tiarcachu. Jatun mandajpaj randi churashca mandajllami tiarca.

48Josafat runaca, Ofir shuti llactamanda orota apamugringapajmi, Tarsis llactamanda jatun barcocunatashnalla rurashca carca. Ashtahuangarin chai barcocunaca, Ezión-geber shuti pueblopi faquirijpimi, na rinajurca.

49Shinamandami Acab runapaj churi Ocozías shuti runaca, Josafat runataca cashna nirca: “Ñucata servijcunataca, canda servijcunahuan jatun barcocunapi cachashun” nircami. Ashtahuangarin Josafat runaca, na munarcachu.

50Josafat runa huañushpa, paipaj ñaupa taitacunahuan tandanajujpica, chai taitacunata pambashca ladopillatami, paipaj ñaupa taita Davidpaj pueblopi pambarca. Paipaj randica, paipaj churi Joram shuti runami mandajurca.

Israel llactataca, Ocozías shuti runami mandajushca

51Judá llactata jatun mandaj Josafat runaca, chunga canchis huatata ña mandajujpimi, Acab runapaj churi Ocozías runaca, Israel llactata Samaria pueblopi mandajurca. Paica ishcai huatatami, Israel llactataca mandajurca.

52Ocozías runaca, Mandaj Diospaj ñaupajpica nalitami rurashpa causajurca. Paipaj taita, paipaj mama imatalla rurashpa causashcatallatami, paipash chashnallata rurashpa causajurca. Shinallata Nabat shuti runapaj churi Jeroboam shuti runa, israelcunata juchata rurachishca juchatapashmi rurashpa causajurca.

53Paica, Baal shuti diosta servishpa ninanda alicachishpami, israelcunata Mandaj Taita Diostaca, ninandapacha fiñachirca. Paipaj taita, tucui nalita rurashpa causashcashnallatami rurashpa causajurca.