ÉXODO 35 - Quichua Imbabura Bible

Samana punllapi samachun mandashcami(Éx. 31:12-17)

1Moisesca, tandanajushca tucuilla israelcunata cayashpami, cashna nijurca: “Caicunatami, Mandaj Diosca rurachun mandashca:

2Sucta punllatami trabajana. Ashtahuangarin canchis punllapica, Mandaj Diospajlla shicanyachishca samana punllami canga. Maijan cashpapash, chai punllapi imatapash rurajushpaca huañungami.

3Samana punllapica, canguna causaj huasicunapica, ninatallapash na japichinachu canguichi” nijurcami.

Jatun carpata rurangapaj imagutapash carachun mandashcami(Éx. 25:1-9)

4Moisesca, tucuilla tandanajushca israelcunamanmi, cashna nishpa villajurca: “Mandaj Diosca, caitami mandarca:

5Canguna puramandaca, Mandaj Diosman caranacunata japichi. Mandaj Diosman carana yuyaita shungupi charijcunaca, tucuicunami orota, culquita, bronceta apamunga.

6Shinallata azul, morado, yana puca puchacunata, ashtahuan ali lino puchata, chivo milmata,

7jari llama caracunata pucata tenishcata, tejón nishca animalpaj caracunata, acacia caspicunatami apamunga.

8Michata japichingapaj aceiteta, talishpa javina aceiteta, mishquillagu ashnaj inciensota rurana yacucunata,

9efod nishca, pectoral nishca churajunacunapi churangapaj, ónice nishca rumicunata, muyundi churana rumicunatapashmi apamunga.

Jatun carpata ruranatami villajun(Éx. 39:32-43)

10Canguna puramandaca, ali yuyaita shungupi tucui charijcuna, imata ruranatapash yachajcuna shamushpami, Mandaj Dios mandashcataca ruranajunga:

11Jatun carpata, carpapaj telacunata, carpa jahuata jatanata, chai jatashcacunapi churana arocunata, chaipi churana tablacunata, jirru barracunata, pilar caspicunata, chai pilarcunapaj bazacunatami ruranga.

12Arcata, chai arcata huanduna vara caspicunata, arcapaj tapata, carpapaj telata,

13mezata, chai mezata huanduna caspicunatapash, chaipi imalla minishtirishcatapash, ñucaman shicanyachina tandacunatapashmi ruranga.

14Michata japichina candelerota, chaipi imalla minishtirishcatapash, chaipillata churana lamparacunata, michata japichingapaj aceiteta,

15inciensota rupachina altarta, chai altarta huanduna vara caspicunatapash, talishpa javina aceiteta, mishquillagu ashnajuj inciensota, jatun carpaman yaicuna pungupaj cortinatapashmi ruranga.

16Diosman animalta cushpa tucuillata rupachina altarta, altarpaj bronce rejata, chai altarta huanduna vara caspicunata, chaipi imalla minishtirishcatapash, jatun pailata, chai pailata churana bazacunatapashmi ruranga.

17Jatun carpa muyundi patiota jarcana telacunata, telacunata huarcuna pilar caspicunata, chai pilarcunata shayachina bazacunata, carpaman yaicuna patio pungupi huarcuna telatapashmi ruranga.

18jatun carpata shayachingapaj estacacunata, patiopi shayachina estacacunata, chaicunata huatana cabiacunata,

19carpa ucupi Diospajta rurashpa servingapaj churajunacunatapashmi ruranga. Chai churajunacunaca, Diospajtalla rurangapaj shicanyachishca Aarón curapaj churajunacunami canga. Shinallata paipaj churicunapash, curacuna cashpa servinajushpa churajunami canga” nijurcami.

Israelcuna caranacunata apamushcatami villajun

20Chai jipami, tandanajushca tucui israelcunaca, Moisespaj ñaupajmanda llujshirca.

21Shinallata tucui jaricunami paicunapaj shungu yarichijpi, tucui maijanman cashpapash, carana munaita paicunapaj espíritu cujpi, Mandaj Diosman caranacunahuan shamunajurca. Dioshuan tuparina jatun carpata rurangapaj, chai carpapajllata tucui imatalla ruranacunata rurangapaj, Diospajtalla rurana churajunacunata rurangapajmi chashna shamunajurca.

22Chashnami carana munaita tucui charijcunaca jaricunapash, huarmicunapash shamunajurca. Paicunaca cadenacunata, zarcillocunata, surtijascunata, brazaletecunata, orota rurashca tucui ima juyaillacunatapashmi apashpa shamunajurca. Tucuicunami orotaca, Mandaj Diosman caranajurca.

23Tucui runacunami azul, morado, yana puca puchacunata, ashtahuan ali lino puchata, chivo milmata, jari llama caracunata pucata tenishcata, na cashpaca tejón nishca animalpaj caracunata apamunajurca.

24Culquita, bronceta tucui carajcunaca, tucuicunami Mandaj Diosman carangapaj apamunajurca. Shinallata acacia caspita tucui charijcunaca, chaicunahuan tucui imacunatalla rurashpa, Diosta servinajuchunmi chaicunata apamunajurca.

25Shinallata tucui imatalla ruranata alipacha yachaj huarmicunapash, paicunapaj maquihuan puchashpami, azul, morado, yana puca puchacunata, ashtahuan ali lino puchatapash apamunajurca.

26Shuj huarmicunaca ashtahuan tucuicunami, paicunapaj shungupi yarishca yachaihuan chivo milmacunata puchanajurca.

27Israelcunata mandajcunaca, ónice nishca rumicunata, efod nishcapi, pectoral nishcapi muyuchishpa churana rumicunatapashmi apamunajurca.

28Shinallata mishquillagu ashnajuj jambicunata, michata japichina aceiteta, talishpa javina aceiteta, mishquillagu ashnajuj inciensota rurana jambicunatapashmi apamunajurca.

29Israel puramandaca, carana munaita shungupi tucui charijcunami jaricunapash, huarmicunapash, tucui imatalla rurangapaj caranacunahuan shamunajurca. Chaicunata rurachunga Mandaj Diosmi, Moisesta villachun mandarca. Paicunapaj munaihuan, Mandaj Diosman carangapajmi, chashna apamunajurca.

Bezaleel shuti, Aholiab shuti runacunatami agllashca(Éx. 31:1-11)

30Moisesca, israelcunataca cashnami nijurca: “Ricuichi Mandaj Diosca, Judá aillu puramanda Uri shuti runapaj churi Bezaleel shuti runatami agllashca. Uri shuti runaca, Hur shuti runapaj churimi.

31Bezaleeltaca, Diospaj Espirituhuan junda cachunmi rurashca. Ali yuyaita charij, ali yachajushca, ali yachaita charij imata ruranatapash ali yachaj cachunmi rurashca.

32Shinallata imacunatapash rurashpa callarichun orota, culquita, bronceta cashpapash, imacunatapash juyaillaguta rurachunmi, chashna rurashca.

33Rumicunata aliguta labrashpa, manñacunapi juyaillaguta rurashpa muyungapajpash, caspimanda imatalla rurangapajpash, chaicunatallata tucui imatapash aligutapacha rurai ushachunmi, chashna churashca.

34Shinallata yachachi ushachumbashmi, paipaj shungupi yuyaita churashca. Chashnami Bezaleel shuti runamambash, Dan aillupura Ahisamac shuti runapaj churi Aholiab runamambash, ali yuyaita churashca.

35Paicunamanmi, shungupi ali yachaita charichun cushca carca. Tucui imatalla ruranata, shinallata chaicunatallata imatapash rurai ushashpa bordashpapash, azul, morado, yana puca puchacunahuan, ali lino puchahuan, telarpipash ahuanajuchunmi chashna rurashca.