JOB 39 - Quichua Imbabura Bible

1¿Canga, sacha chivocuna mashna quillapi huachajta yachanguichu? Na cashpaca, ¿tarugacuna huachanajujta ricushcanguichu?

2¿Canga, tarugacuna mashna quillata chichu cajta cuentashcanguichu? ¿Ima quillapi huachanatapash yachanguichu?

3Paicuna siririshpa huachajpi, huahuacuna ña llujshijpica, nanaitapash na ashtahuan charinllu.

4Paicunapaj huahuacunaca, shinlliyashpa catishpami, jihuacunata micushpa viñan. Paicuna rishpaca, cutinga na mamacunaman tigranllu.

5¿Pita, sacha burrotaca cacharishca purichun churashca? ¿Pita paitaca, na huatana animalta rurashca?

6Ñucami paipaj huasitaca, chulunlla pushtupi churarcani. Paitaca, imapash na fucuj pambacunapi causachun saquircani.

7Paica, pueblopi causanajuj ashtaca gentecunatapash, na cazunllu. Shuj runa huashata catishpa caparijujpipash, na uyanllu.

8Paica, urcucunapi pacalla tiaj jihuacunatami mascashpa micun. Verde jihualla cachunmi, micungapaj mascashpa purin.

9¿Búfalo nishca huagraca, canda servingapaj munangachu? Na cashpaca, ¿cambaj huasipi tiaj corralpi causangapaj munangachu?

10¿Búfalo nishca huagrataca, yugohuan huatashpa huachui ushanguimanllu? ¿Pugru pambacunapipash, tarpushcata quilpashpa cambaj huashata catinmanllu?

11Pai jatun ushaita charijpilla, ¿pailla imatapash rurachun saquinguimanllu? ¿Can imatalla ruranataca, pai rurachun saquinguimanllu?

12¿Cambaj granocunata tandachishpa, trillana pambapi tandachijuchun saquinguimanllu?

13Pavo realmambash, ¿canllu juyailla alascunata curcangui? Na cashpaca, avestruz nishca alasyu animalmambash, ¿canllu alascunata, plumacunata curcangui?

14Paica, lulungunata alpapi huachashpaca, saquishpa rinllami. Chai alpapillatami cunujyan.

15Paica, chai lulungunata, chaquihuan sarushpa faquinatapash, sacha animalcuna sarushpa ñutunatapash na yarinllu.

16Paipaj huahuacunataca, na pai huachashcashnami na juyan. Pai huachashcapash, yangallata canataca na manllanllu.

17Paicunamanga, Taita Dios ñucallatami, ali yachaita na curcani. Ali yuyaitapash na curcanichu.

18Pai jahuata jatarishpaca caballotapash, caballopi tiarishpa calpajujtapash mishashpami rin.

19Caballomambash, ¿canllu ushaita curcangui? Paipaj cungapi tiaj milmatapash, ¿canllu churarcangui?

20¿Paitaca, langosta jurutashna manllachinguimanllu? Paipaj singahuanga, shinllitami fucun.

21Ninan ushaita charishcamandaca, alpata aspishpami cushijun. Paica, ima huañuchinahuan cajpipash, tuparigrinllami.

22Manllachingapaj munajpipash, na manllarinllu. Espadata ricuchijpipash, paipaj ñavitaca na huashaman churanllu.

23Paita manllachingapaj flechata, jirru lanzata, uchilla lanzata tsilin nichijpipash,

24paica manllanayaita ñapash fiñarishpami, alpata aspin. Trompetata huacachijpipash, na casilla shayarinllu.

25Trompetata huacachinajujpipash, jajai nishpa asinshnami huacan. Paica macanajui tiajtapash, carumandami mutijin. Soldadocunata mandajcuna caparinajujtapash, caparishpa villanajujtapash uyanllami.

26¿Can yuyaita cujpichu, angaca jahuata jatarishpa, alasta chutashpa urai ladoman rin?

27Jatun angaca, ¿can mandajpichu jahuata jatarishpa, jahua jahuacunapi tazinda ruran?

28Paica, jaca rumipimi causan. Jaca rumi pundapi, jatun rumi umapimi, huasita ruran.

29Chai jahuamandami, maipi micuna tiajta ricun. Carumandallatami, paipaj ñavica ricun.

30Paipaj huahuacunaca, yahuartami chupan. Huañushcacuna maipi sirijujpipash, chaipimi ñapash ricurin” nijurcami.