DEUTERONOMIO 13 - Quichua Imbabura Bible

1Canguna purapi shuj villaj, na cashpaca muscuipi imatapash ricuj jatarishpaca, imatapash rurashpa ricuchinata, na cashpaca jatun manllarinacunata ruranatami villajunga.

2Paicunaca: ‘Ricuichi, canguna na rijsishca, shuj dioscunata catishpa jacuchi, paicunata servishunchi’ nishpami villanajunga. Shina villashpa imatapash rurashpa ricuchishcacuna, na cashpaca jatun manllarinacuna rurashcacuna pactangapashchari.

3Shina pactajpipash, chai villaj runa villajuj shimicunata, na cashpaca muscuipi imata ricushpa villajujtaca, napacha uyanachu canguichi. Cangunata Mandaj Taita Diosca, pai Mandaj Taita Diosta tucui shunguhuan, tucui almahuan juyajta, na juyajta yachangapajmi, chashna rurachun saquijunga.

4Ashtahuangarin cangunata Mandaj Taita Diostalla catinguichi. Paitalla manllashpa, pai mandashcacunata pactachishpa, pai rimashcacunata uyanguichi. Paitalla servinguichi, paitalla catinguichi.

5Chai villajpash, na cashpaca muscuipi imata ricushpa villajpash huañuchi tucungami. Egipto llactapi causajcunata servishpa causanajujpi llujchishpa, quishpichij cangunata Mandaj Taita Diosta na cazuna yuyaita cushcamandami, paica huañuchi tucunga. Shinallata can imashna causachun, canda Mandaj Taita Dios ricuchishca ñanmandapash anchuchingapajmi, paica munarca. Chashna rurashpami, cangunapaj chaupipi tiaj nalitaca anchuchinguichi.

6Shinallata cambaj mamanda huauquillata, na cashpaca cambaj churillata, cambaj ushillata, cambaj huarmillata, na cashpaca cambaj ali cumballatami pacallaguta, cashna nijunga: ‘Cangunapash, cangunapaj taitacunapash, na rijsishca, shuj dioscunata servingapaj jacuchi’ ningami.

7Cangunaca, cai pachapi cangunapaj muyundi llactacunapi causajcunapaj dioscunataca, ladolla llactapi, carulla llactapi causajcunapaj dioscunatapash, cai pacha manñamanda, cai pacha tucuri manñacaman na servigrinachu canguichi.

8Chai runa chashna nichunga, na saquinachu cangui. Paitaca, uyaitapash na uyanachu cangui. Paitaca, na llaquishpa ricunachu cangui. Paitaca, napacha llaquinachu cangui. Pai chashna nijushcataca, na pacanachu cangui.

9Ashtahuangarin chai runataca huañuchinami cangui. Paita huañuchingapaca, canrami rumihuan pegai callarina cangui. Chai jipami, tucui gentecunapash chashnallata ruranajunga.

10Egipto llactapi gañan causanajujpi llujchimuj, canda Mandaj Taita Diosmanda anchuchingapaj munashcamandami, chai runataca huañungacaman rumihuan pegana canguichi.

11Tucui israelcuna chaita uyashpaca manllarinajuchun, cangunapaj chaupipica, cutinga ama chashna nalita ruranajuchunmi, chashna rurana canguichi.

12Can causachun canda Mandaj Taita Dios carashca maijan pueblopi cashpapashmi, chashna ninajujta uyangui.

13Paicunaca, Diosta na manllaj runacuna tucushpami canguna puramandallata llujshishcanga. Paicunaca, chai pueblopi causajcunatami: ‘Canguna na rijsishca, shuj dioscunata jacuchi servishunchi’ nishpa, pushangapajpacha munanga.

14Chashna uyarijpica, shinapacha cajta, na shinapacha cajtapash purishpa, alipacha tapushpa canllata yachangui. Chashna tapushpaca, canguna purapica chashna millanayaita rurashcapacha cajtami yachangui.

15Shina yachashpaca, chai pueblopi causajcunataca, espadahuan chugrichishpami huañuchina cangui. Chai pueblopi tucui ima tiashcatapashmi tucuchina cangui. Shinallata paicunapaj animalcunatapashmi, espadahuan huañuchina cangui.

16Chaipi tucui imalla tiashcatapash, chaupi plazapi tandachishpami, chai pueblotaca, chaipi tucui imalla tiashcacunandi rupachishpa tucuchina cangui. Tucui chaicunataca, canda Mandaj Taita Diosman cushpa tucuillata rupachinshnami rupachina cangui. Chai puebloca, causaita causaicamanmi rumi mundunlla siringa. Chai pueblotaca, cutinga na ashtahuan pipash shayachingachu.

17Chaipi tiashcacunataca, Dios tucuchingapaj shicanyachishca cashcamanda, ama imatapash japinguichu. Nina japirinshna, Mandaj Dios ninanda fiñarishcamanda ali tucushpa, canda llaquishpa, canda juyashpa, cambaj ñaupa taitacunaman imashna juramentushcashnallata, ashtacata mirachijuchunmi, imatapash na japina cangui.

18Canda Mandaj Taita Dios rimashcata cazushpa, tucui pai imatalla mandashcacunata cunan canman ñuca mandashcataca pactachinami cangui. Canda Mandaj Taita Diospaj ñaupajpi aliguta rurangapajmi, chashna pactachina cangui.