DEUTERONOMIO 24 - Quichua Imbabura Bible

1Maijan runa cashpapash, shuj huarmita paipaj huarmi cachun japishpami, chai huarmihuan cazaranga. Shina cazarashca jipa, paipaj huarmipi ima nalipash ricurijpi na munashpaca, chai huarmita jichujushcata villashpa shuj cartata escribishpami, paipaj maquipi cunga. Chai jipami, huasimanda llujchishpa cachanga.

2Shina cachajpi chai huasimanda llujshishpa rishpaca, shuj runahuan cazaraita ushanmi.

3Ashtahuangarin chai jipa cusapash na ricunayachishpaca, jichujushcata villashpa escribishca cartata maquipi cushpa, huasimanda llujchishpa cachangapashchari. Na cashpaca, jipaman cazarashca cusaca huañungapashchari.

4Shina cajpipash paipaj punda cusaca, chai huarmita pipash na ricunayachinata rurashca jipaca, paipaj huarmi cachun cutin japitaca na ushangachu. Chashna ruranaca, Mandaj Diospaj ñaupajpica millanayaimi. Canda Mandaj Taita Dios canman carashca llactataca, chai nali ruranacunahuan na mapayachinachu cangui.

5Maijan runapash, chairalla cazarashca cashpaca, jatun macanajuiman llujshitaca na ushangachu, maipi imata rurangapajpash na yaicungachu. Paipaj huarmi cachun cazarashca huarmita cushichingapajmi, huata tucungacaman na maimambash llujshinga.

6Cutana huahua rumita cashpapash, jatun rumita cashpapash, na prenda japishpa apanachu cangui. Chaita apashpaca, causangapaj minishtirishcatami apangui.

7Maijan cashpapash Israelpura paipaj huauquitallata, paita servichun, na cashpaca shujcunaman jatungapaj, shuhuashca cashpaca, chai shuhua runaca huañuchi tucunapachami. Chashna rurashpami, canguna puramanda chai nalitaca anchuchingui.

8Huañuchij lepra ung:ui tiajpica, na cungashpa aliguta ricuriangui. Shinallata levita curacuna imashna tucuita yachachishcashnallata rurangui. Ñuca mandashcashnallatami ricuriashpa, chashnatapacha rurana cangui.

9Egiptomanda llujshishca jipa, ñanda shamunajujpi, canda Mandaj Taita Dios, Mariata imashna llaquichishcataca yarinami cangui.

10Cambaj cumba runaguman imata mañachishpapash, na paipaj huasiman yaicushpa, ima prendatapash quichushpa apanachu cangui.

11Canga, canllapi shuyanguilla. Chai mañaj runallatami, prendata llujchimunga.

12Chai runa imagutapash na charij cajpica, pai imata cushca prendata nara tigrachishpallataca, ama puñungapaj siriringuichu.

13Prenda cushcataca, indi huashajujhuan na cungashpa tigrachingui. Shina tigrachijpimi, pai puñungapaca jatashpa puñui ushanga, shinallata candapash bendiciangami. Shinami, canda Mandaj Taita Diospaj ñaupajpica, imatapash cashcatapacha rurashca ricuringui.

14Shujpi shujpi trabajaj, imagupash illaj, mañashpa purij runagutaca, cangunapura cajpipash, shuj llactamanda shamushpa cambaj llacta pueblocunapi causajujpipash, na llaquichishpa charinachu cangui.

15Shujpi shujpi pai trabajashcamandaca, chai punllallata culquita cungui. Pactara nara cujpillata, indi huashajunman. Paica, imagutapash na charij cashcamandaca, chai culquihuanmi micushpa causangapaj randinga. Can llaquichijpica canda fiñashpami, Mandaj Diosta caparishpa mañanga. Shina rurajpica, juchata rurashcami ricuringui.

16Taitacunaca, huahuacuna nalita rurashcamandaca, na huañungachu. Huahuacunapash, taitacuna nalita rurashcamandaca, na huañungachu. Maijambash nalita rurashpaca, paillatami chai juchamanda huañunga.

17Shuj llactamanda shamushca runagu, taita mama illaj huahuagu japinatallata japinatapash, na shujman tigrachinachu cangui. Sapalla mamagupaj churajunatapash, na prendata japinachu cangui.

18Ashtahuangarin Egiptopica, cambash shujcunata servishpa causajushcatami yarina canguichi. Chai llactamandami, canda Mandaj Taita Diosca llujchimurca. Shinamandami cangunataca, cai ruranacunata pactachinajuchun mandani.

19Cambaj pambapi cozechashpa, shuj marcai trigota pambapi cungashpa saquishpaca, na cutin tigrashpa apagrinachu cangui. Chaitaca, shuj llactamanda shamushca runaguman, taita mama illaj huahuaguman, sapalla mamaguman saquinguilla. Cambaj maquihuan tucui imatalla rurashcatapash, canda Mandaj Taita Dios bendiciachunmi, chashna rurana cangui.

20Olivos yurata cuyuchishpa pallashca jipa, malquicunapi puchushcataca na cutin tigrashpa pallajunachu cangui. Chai puchushca granocunataca, shuj llactamanda shamushca runagupash, taita mama illaj huahuagupash, sapalla mamagupash pallachun saquinguilla.

21Cambaj uvasta pallashpapash, na cutin tigrashpa pallanachu cangui. Chaicunataca, shuj llactamanda shamushca runagu, taita mama illaj huahuagu, sapalla mamagu pallachun saquinguilla.

22Cambash, Egipto llactapi shujcunata servishpa causajushcata yarinami cangui. Chaimandami, cai tucui ruranacunataca pactachijuchun mandani.