2 REYES 9 - Quichua Imbabura Bible

Jehú shuti runataca, Israel llactapi jatun mandaj cachunmi, aceiteta talishpa javishca

1Dios ima nishcata villaj Eliseoca, Dios ima nishcata villangapaj yachajunajuj puramanda shuj runata cayashpami, cashna nirca:

—Ali chumbilirishpa, cai uchilla fundugupi aceiteta apashpa, Galaad llactapi tiajuj Ramot shuti puebloman ri.

2Chaiman chayashpaca, Nimsi shuti runapaj churi Josafat runapaj churi Jehú shuti runatami ricungui. Paitaca, paipaj huauquicunapaj ladomandaca, shuj ucuman pushangui.

3Chaipica, aceitehuan uchilla funduta japishpa, paipaj umapi talingui. Chashna talishpaca, cashna ningui: Mandaj Diosca cashnami nin: ‘Ñucami candaca, Israel llactapi jatun mandaj cachun aceiteta talishpa javini’ ninmi ningui. Chai jipaca, ashallatapash na shuyashpa, punguta pascashpa ucha calpamungui— nircami.

4Shina nijpimi, Dios ima nishcata villaj chairalla runaguca, Galaad llactapi tiajuj Ramot shuti puebloman rirca.

5Pai chaiman chayajpica, soldadocunata mandajpura tandanajushcami tianajushca carca. Chaipi tianajujpimi paica:

—Soldadocunata mandajlla, canmanmi shuj villanata charini— nirca.

Shina nijpimi, Jehú shuti runaca:

—Tucui ñucanchi puramandaca, ¿maijanmanda villasha ningui?— nirca.

Shina nijpimi paica:

—Mandajlla, canmanmi villana cani— nirca.

6Shina nijpimi, Jehú runaca jatarishpa rishpaca, huasi ucuman yaicurca. Chai ucupimi, Dios ima nishcata villaj runaca, aceiteta talishpa javishpa, cashna nijurca:

—Israelcunata Mandaj Taita Diosca, cashnami nin: ‘Mandaj Dios ñucami, ñuca agllashca israelcunapaj jatun mandaj cachun, candaca aceiteta talishpa javini.

7Canda mandaj Acab shuti runapaj huasi ucu purataca, canmi huañuchingui. Mandaj Dios ñucata servij, ñuca ima nishcata villajcunata, ñucata caishuj tucui servijcunata huañuchishpa yahuarta jichashcamanda, ñucapash chashnallata huañuchishcashna cachunmi, can huañuchingui. Chai servijcunataca, Jezabel shuti paipaj huarmimi, huañuchinajuchun mandarca.

8Acab runapaj huasi ucu puracunaca, tucuillami huañunga. Chashnami Israel purapica, servishpa causaj cajpi, na servishpa causaj cajpipash, Acab runapaj huasi ucu purataca, tucuilla jaricunata tucuchisha.

9Acab runapaj huasi ucu purataca, Nabat runapaj churi Jeroboam runapaj huasi ucu puratashna, Ahías runapaj churi Baasa shuti runapaj huasi ucu puratashnami tucuchigrini.

10Jezabel huarmitaca, Jezreel shuti pambapimi alcucuna micunga. Pai huañujpica, pipash na pambangachu’ ninmi— nijurcami.

Shina nishpallami, Dios ima nishcata villaj runaguca, punguta ñapash pascashpa, ninanda calpai callarirca.

11Chai jipami Jehú shuti runaca, paita mandajta servijcunapajman llujshimurca. Chaipimi, paicunaca cashna ninajurca:

—¿Casilla ali causai tianllu? Chai loco runaca, ¿imapajta cambajman shamushca?— ninajurcami.

Shina nijpimi Jehú shuti runaca, cashna nirca:

—Chai runataca, cangunallata rijsinguichimi. Pai imata nishcatapash yachanguichimi— nircami.

12Shina nijpimi paicunaca:

—Llullajunguimi. Pai ima nishcatapash, cunanda villailla— ninajurca.

Shina nijpimi paica, cashna nirca:

—Cashna chashnami nihuarca. Shinallata Mandaj Diosca, cashnami nin: ‘Ñucami candaca, israelcunata jatun mandaj cachun aceiteta talishpa javini’ ninmi nihuarcami— nircami.

13Shina nijpimi, paicunapaj jahualla churajunata ucha llujchishpaca, mandangapaj tiarinapi Jehú shuti runa tiarichun churanajurca. Chashna rurashca jipami, cornetata huacachishpa: “Jehú shuti runami jatun mandaj” ninajurca.

Jehú shuti runami, Joram shuti runata huañuchishca

14Nimsi shuti runapaj churi Josafat runapaj churi Jehú shuti runaca, Joram shuti runata huañuchingapajmi, israelcunahuan tandanajushpa pacalla parlanajurca. (Joram shuti runaca, Siria llactata jatun mandaj Hazael runa ama yaicumuchunmi, Galaad llactapi tiajuj Ramot shuti pueblotaca, tucuilla israelcunandi cuidanajurca.

15Chugrita jambiringapajmi, jatun mandaj Joram shuti runaca, Jezreel puebloman cutin tigrashca carca. Paitaca, Siria llactata jatun mandaj Hazael runahuan macanajujujpimi, siriocuna chugrichishca carca). Chaimandami Jehú shuti runaca, cashna nirca: “Jatun mandaj cachun canguna ñucata munashpaca, cai pueblomanda pacalla llujshishpa, Jezreel pueblopi villagrichunga, na saquinachu canguichi” nircami.

16Joram shuti runaca, chai pueblopi chugrihuan huañunalla cajpimi Jehú shuti runaca, caballopi tiarishpa, Jezreel puebloman rirca. Joram shuti runata ricungapaj urai rishcami, Judá llactata jatun mandaj Ocozías runapash, chai pueblopi cashca carca.

17Chai Jezreel pueblo torre jahuamanda chapashpa shayajuj runaca, ashtaca soldadocunahuan Jehú shuti runa shamujujta ricushpami:

—Ashtaca soldadocuna shamunajujmi ricurin— nishpa villarca.

Shina villajpimi Joram shuti runaca, cashna nirca:

—Paicunata rijsichun, shuj soldadota caballopi cachai. Shinallata: ‘¿Casilla ali causai tianllu?’ nishpa tapuchun cachai— nircami.

18Chashna cachajpimi, caballopi tiarishca soldadoca cashna nirca:

—Jatun mandajca, cashnami nin: ‘¿Casilla ali causai tianllu?’ ninmi— nircami.

Shina nijpimi Jehú shuti runaca, cashna nirca:

—Canga, ¿imapajta casilla ali causai tianataca tapungui? Ñucahuan tandanajuj shamui— nircami.

Torre jahuamanda chapashpa shayajuj runa chaita ricushpami:

—Villangapaj rij runaca, paicunapajman chayashpalla na tigramunllu— nishpa villarca.

19Chaimandami, caballopi tiarishca shuj soldadota cutin cacharca. Chai soldado paicunapajman chayashpami:

—Jatun mandajca, cashnami nin: ‘¿Casilla ali causai tianllu?’ ninmi— nircami.

Shina nijpimi Jehú shuti runaca, cashna nirca:

—Canga, ¿imapajta casilla ali causai tianataca tapungui? Ñucahuan tandanajuj shamui— nircami.

20Torre jahuamanda chapashpa shayajuj runa chaita ricushpami, cutinllata cashna nirca:

—Paipash paicunapajman chayashpalla, cutinga na tigramunllu. Ninanda shamujuj chai runaca, Nimsi shuti runapaj churi Jehú shuti runashnallami shamujun. Paishnallami ninandapacha shamujun— nircami.

21Shina villajpimi, Joram shuti runaca:

—Ñuca carretata, caballocunapi huataichi— nirca.

Paipaj carretata caballocunapi ña huatajpimi, Israel llactata jatun mandaj Joram shuti runapash, Judá llactata jatun mandaj Ocozías runapash, paicunapaj carretapi llujshishpa, Jehú shuti runata tuparingapaj rirca. Paitaca, Jezreel pueblomanda Nabot runapaj pambapimi tuparirca.

22Joram shuti runaca, Jehú shuti runata ricushpaca:

—¿Casilla ali causai tianllu, Jehú?— nijpimi. Jehú shuti runaca cashna nirca:

—Cambaj mama Jezabel yapata huainayashpa, ninandapacha brujiashpa causajpica, maitata casilla ali causaica tiangayari— nircami.

23Shina nijpimi Joram shuti runaca, caballota tigrachishpa pacajushpa calpashpaca, Ocozías runataca:

—¡Ocozías, ñucanchitaca umachishcamari!— nirca.

24Chashna nishpa calpajpimi Jehú shuti runaca, paipaj arcota chutashpa flechata cacharirca. Chai flechami, Joram shuti runapaj huashapi chayashpa, paipaj shunguman yalirca. Chaimandami, paipaj carretapillata huañurca.

25Chai jipami Jehú shuti runaca, paipaj soldadocunata mandaj Bidcar shuti runataca, cashna nirca:

—Cai Jezreel shuti pueblomanda Nabot shuti runapaj pamba manñaman apashpa shitai. Caitaca yarinami cangui: Paipaj taita Acab shuti runapaj soldadocunandi, cambash, ñucapash rinajujpimi, cashna tucunataca, Mandaj Diosca cashna nishpa villarca:

26‘Mandaj Dios ñucami, Nabot runapaj yahuartapash, paipaj churicunapaj yahuartapash caina ricurcani. Can japina cashcataca, chai pushtupillatami cusha’ nircami Mandaj Diosca. Shina cashcamanda cunanga, Mandaj Dios villashcashnallata Joram shuti runata japishpa, Nabot runapaj pambapi shitagri— nircami.

Jehú shuti runami, Ocozías shuti runataca huañuchishca(2 Crón. 22:7-9)

27Chashna huañuchishcata ricushpami, Judá llactata jatun mandaj Ocozías shuti runaca, huerta chaupipi tiaj huasiman rina ñanda pacajushpa calpajurca. Chashna calpajujpimi, Jehú shuti runaca:

—¡Paitapash carretapillata huañuchishpa saquichi!— nishpa catijurca.

Chaimandami, Ibleam shuti pueblo ladollapi tiaj Gur shuti vichaita calpajujpi chugrichirca. Ocozías runaca, Meguido shuti pueblomanmi pacajushpa calparca. Ashtahuangarin chaipimi huañurca.

28Chaipi huañujpimi paita servijcunaca, Jerusalenman shuj carretapi aparca. Chaiman apashpami paitaca, paipaj ñaupa taitacunata pambashca ladopillata, Davidpaj pueblopi pambarca.

29Acab runapaj churi Joram shuti runaca, Israel llactataca chunga shuj huatata ña mandajujpimi Ocozías runaca, Judá llactata mandai callarirca.

Jezabel huarmi huañushcatami villajun

30Chai jipami Jehú shuti runaca, Jezreel puebloman shamurca. Chaita yachashpami, Jezabel shuti huarmica, antimonio nishca tinirinahuan ñavipi churarishpa, paipaj umatapash aliguta alichirishpa, ventanamanda chapajurca.

31Chaimanda chapajushpami, punguta Jehú shuti runa ña yaicujpica:

—Canda mandajta huañuchij Zimri shuti runaca, ¿alillachu causajungui?— nishpa tapurca.

32Shina nijta Jehú shuti runa uyashpami, ventanata vichai ricushpaca:

—¿Pita ñucahuan tandanajushun ninguichi?— nijpi, eunuco runacunaca ishcaichu, quimsachu imachari Jehú shuti runata urai chaparca.

33Paicunatami Jehú shuti runaca:

—Chai huarmita ucu alpaman shitamuichi— nijpi paicunaca, chai huarmitaca ucuman shitarca.

Chashna shitajpimi, chai huarmipaj yahuarca, ashaca pataman, ashaca caballocunapajman zimbrarca. Chaipillatami paitaca caballohuan saruchirca.

34Chai jipami Jehú shuti runaca, ucuman yaicurca. Ña micushca, ufiashca jipami cashna nirca:

—Ninanda nalicachi tucushca, chai huarmita apashpa pambagrichi. Imashna cashca cashpapash, jatun mandajpaj ushillatami— nircami.

35Paicuna pambashun yashpa rijpica, chai huarmipaj uma tulluhuan, chaqui tullucunahuan, maqui tabla tullucunahuanllami tarirca.

36Tigrashpa paicuna chaita villajpimi Jehú shuti runaca, cashna nirca:

—Taita Diosca, Tisbe shuti pueblopi causaj paita servij Eliasmanmi, cashna villashca carca: ‘Jezreel pueblo pambapimi, Jezabeltaca alcucuna micunga.

37Jezabel huarmipaj cuerpoca, cai pacha alpapica, yanga huanushnami Jezreel pueblo pambapica siringa. Chaimandami paitaca: Caica, Jezabel huarmimi nitaca, pipash na ushanajunga’ nishpami villashca carca— nircami.