Psalms 72 - Quichua Imbabura Bible

Imatapash cashcatapacha ruraj jatun mandajmi mandangaSalomonman rurashca Salmomi.

1Taita Dioslla, jatun mandajmambash,

aliguta ricushpa mandana yuyaita cupairi.

Jatun mandajpaj churimambash, imatapash

cashcatapacha rurashpa mandanata carapairi.

2Paimari, can agllashcacunataca,

imatapash cashcatapacha rurashpa mandanga.

Can agllashcacuna llaquilla causanajujpipash,

aliguta ricushpami mandanga.

3Urcucunapash, gentecunapaj casilla

ali causaita, lomacunapash imatapash

cashcatapacha ruranatami apamunga.

4Gente puracunapi llaquilla causajcunataca,

aliguta ricushpami mandanga.

Imagupash illajcunapaj miraicunataca quishpichingami.

Llaquichijcunataca sarungami.

5Indipash, lunapash tiashcacamanga,

mirai miraicunapashmi candaca manllanajunga.

6Jatun mandajca, jihua cuchushca

pambapi tamianshnami uriajumunga.

Jamzi paramu urmashpa, alpata mutiyachinshnami canga.

7Pai mandajui punllacunapica, imatapash

cashcatapacha ruranaca, sisanshnami canga.

Luna tucuringacamanmi, casilla ali causaica

ashtacapacha tianga.

8Paica, shuj lado mama cuchamandaca,

caishuj lado mama cuchacamanmi mandajunga.

Jatun yacumanda callarishpaca, cai pacha

tucuri manñacunacamanmi mandajunga.

9Paipaj ñaupajpimi, jichushca pambapi

causajcunaca cungurinajunga.

Paita fiñajcunapash, ñutu alpatami lambinajunga.

10Tarsis pueblota jatun mandajcuna,

yacu manñapi tiaj llactacunata jatun mandajcunami,

caranacunata paiman apamunajunga.

Sabá shuti, Seba shuti llactacunata

jatun mandajcunapashmi, imacunatapash caranajunga.

11Tucui jatun mandajcunami, paipaj ñaupajpi cunguringa.

Tucui shuj llactacunapi causajcunami,

paitaca servinajunga.

12Imagupash illajcuna caparishpa

mañajpica, paimi cacharichinga.

Pi ayudajta na charishpa llaquilla

causajcunatapashmi ayudanga.

13Imagupash illajtapash, imagutapash na

charitapash llaquingami.

Imagutapash na charicunapaj causaitaca quishpichingami.

14Paicunapaj almataca, umachi tucunamandapash,

ninandapacha llaquichi tucujujmandapash llujchingami.

Paipaj ñaupajpica, paicunapaj

yahuarca ninan valishcami canga.

15Jatun mandajca causajungallami.

Sabá shuti llactamanda orotami caranajunga.

Paimandaca Diosta mañanajungallami,

punllandimi paitaca bendicianajunga.

16Pambapipash, jahua urcu umacunapipash,

granocuna tiachunmi, maqui jundata shitanajunga.

Chai muyumi, Líbano urcu quirucunashna

tsal nijuj chagracuna fucunga.

Pueblopi causajcunapash, pambapi

jihua sisanshnami canga.

17Jatun mandajpaj shutica, causaita causaicamanmi canga.

Indi tiashcacamanga, paipaj shutica

tucui causaicamambash chashnallatami canga.

Paimandami, tucui shuj llactacunapi

causajcunaca bendiciai tucunajunga.

Paicunaca, ninandami cushijun ninajungami.

18Mandaj Taita Diosca, alicachi tucushca cachun.

Paica, israelcunapaj Taita Diosmi.

Paillami, imapash juyaillacunata ruran.

19Paipaj juyailla shutica,

causaita causaicaman alicachi tucujuchun.

Pai punchapamba cashcapash,

tucui cai pachapi junda cachun.

Shina cachun. Shina cachun.

20Isaí shuti runapaj churi David mañashca shimicunaca, caipimi tucurin.