DEUTERONOMIO 32 - Quichua Imbabura Bible

1“Jahua pachaca, ñuca rimajujta uyapairi.

Cai pachapash, ñuca shimihuan rimajujta uyapairi.

2Ñuca yachachishca shimica, tamia shutujunshnami canga.

Ñuca yuyaicunaca, jamzi paramu urmajunshami canga.

Yura jahuapi tamia urmajunshnami canga.

Jihua jahuapi tamia shutujunshnami canga.

3Mandaj Diospaj shutitami villajusha.

Ñucanchi Taita Diostaca jatunyachipaichiyari.

4Paica jatun Rumishna Diosmari.

Pai rurashcacunaca, ima pandapash illajmi.

Paica tucui imatapash aligutallami ruran.

Paica, na llullaj Taita Diosmi.

Paipica, ima nalipash na tianllu.

Paica, imatapash cashcatapacha ruraj, aligutalla ruraj Diosmi.

5Huagli causaica, na paipajchu.

Mapa causaica, paipaj huahuacunapajmi.

Paicunaca, pandatalla ruraj, jatun nalitalla ruraj miraicunami.

6Imatapash na yachaj loco gentecuna, ¿chashnachu Mandaj Diosman tigrachinguichi?

¿Nachu paica cangunata viñachishca Taitayari?

Paimari, cangunata rurashpa, causaitapash callarichirca.

7Punda huatacunata yarichiyari.

Ashtaca miraicuna yalishca huatacunata yarichiyari.

Cangunapaj taitacunata tapuichiyari.

Paicunami cangunaman villanga.

Cangunata mandaj rucucunata tapuichilla.

Paicunapash parlangallami.

8Jahua pachapi causajuj Diosca, llactacunata carajushpa, huañuna aichayu runacunaman chaupishpa cujushpaca, linderocunata churashpami gentecunaman curca.

Israelcuna mashnacuna cashcashnallatami curca.

9Mandaj Diospaca, pai japinaca pai agllashca gentecunami.

Jacobopaj miraicunatami, paipajlla cachun shicanyachishca.

10Jichushca pambapimi, paicunataca tarirca.

Chaquishca, manllanayai, chulunlla pambapimi tarirca.

Paicunataca, ugllashpa apamushpa aliguta yachachishpami, paipaj ricujuj ñavitashna cuidajurca.

11Jatun anga paipaj tazimbi tiajuj huahuacunapaj jahuata muyushpa, chai huahuacunata jatarinata yachachinshnami cuidajurca.

Paipaj alasta chutashpa japishpami, paicunataca paipaj alas jahuapi apajun.

12Mandaj Diosllami, cangunataca pushamurca.

Paihuanga, na rijsishca shuj diosca na tiarcachu.

13Jahua llactacunaman vichai pushajpimi, chai pambacunapi fucushcacunata micunajurca.

Jatun rumimanda, balun mishquita, rumilla shinlli alpamanda aceiteta chupanajuchunmi cararca.

14Huarmi huagrapaj leche virata, llamapaj lechetami, maltun llamapaj viracunahuan, Basán urcumanda jari llamacunahuan cararca.

Shinallata jari chivocunatapash, ashtahuan ali trigohuanmi cararca.

Uvasmanda puca vinotapashmi ufiarcangui.

15Ashtahuangarin Jesurún virayashpaca, napacha cazujmi tucurca.

(Racu racu tucushpami virayarcangui).

Shina tucushpami, paita ruraj Taita Diostaca jichurca.

Shinallata paita quishpichij jatun Rumishna Diostami, yangapi churarca.

16Paitaca, shuj dioscunahuanmi ninandapacha fiñachinajurca.

Millanayaicunata rurashpami, ninanda fiñachinajurca.

17Taita Diosman animalcunata cushpa huañuchingapaj randica, ayacunaman carashpami huañuchinajurca.

Na rijsishca dioscunamanmi caranajurca.

Cangunapaj ñaupa taitacunapash na manllashca, ladollacunamanda apamushca, mushuj dioscunamanmi caranajurca.

18Canda viñachij jatun Rumishna Diostami cungarcangui.

Canda ruraj Taita Diostami cungashcangui.

19Mandaj Diosca chaita ricushpami, nina japirinshna fiñarirca.

Paipaj churicuna, paipaj ushicuna yangapi churashcamandami, chashna fiñarirca.

20Chaimandami cashna nirca:

‘Ñuca ñavitaca, paicunaman na ricuchishachu.

Paicuna imashna tucurijtallami ricusha.

Paicunaca, jatun nalitalla ruraj miraicuna, na cazuj huahuacuna cajpimi chashna rurasha.

21Napash Taita Dios cajpita, yangacunata mañashpami, ñucataca ninandapacha fiñachinajurca.

Paicunapaj yanga dioscunahuanmi, ñucataca ninandapacha fiñachinajurca.

Ñucapashmi, paicunataca na ñucapaj gentecunahuan llaquichishpa ninandapacha fiñachisha.

Paicunataca, juizu illaj runacunahuan llaquichishpami, ninanda fiñachisha.

22Ñuca ninanda fiñarishcapash, nina japirinshnami tucushca.

Chai ninami, Seol ucu ucucunacaman rupachinga.

Cai pachatapash, caipi imalla fucushcatapash langanshnami tucuchinga.

Urcucunatapash, ucu sapimandami rupachinga.

23Ñucami paicunapaj jahuapica, ashtaca nalicunata mirachisha.

Ñuca flechacunataca, paicunata huañuchishpami tucuchisha.

24Yarjaimandami tucurinajunga, ninanda rupachij calenturahuan, nanachij ung:uicunahuanmi tucuchi tucunga.

Millai animalcuna micushpa tucuchinajuchunmi, paicunapajman cachamusha.

Cai pachapi tiaj culebracunapaj venenohuanmi tucuchisha.

25Canllacunapica, espadahuanmi llaquinayaita tucuchinajunga.

Huasi ucucunapica, ninan manllaihuanmi tianajunga.

Chairalla viñai huambratapash, jarihuan nara tacarishca cuitsatapash, chuchujuj huahuagutapash, yuraj ajcha tucushca rucugutapashmi huañuchinajunga.

26Ñucaca, israelcunataca caita chaitami cachasha nishcami carcani.

Cai pachapi causaj puramandaca, paicunata ama ashtahuan yarinajuchunmi tucuchisha.

27Paicunata fiñajcuna, rimashpa pingaichijta uyangapaj na munashpami, na llaquichircani.

Paicunata na ricunayachij runacunaca, cashnami ninajunman carca:

Tucui caicunataca, ninan ushaita charij ñucanchi maquihuanmi, chashna rurashcanchi.

Mandaj Diosca, na chashna rurashcachu ninajunmanmi carca’ nircami.

28Paicunaca, ali yuyaicunata cujpi, na chasquingapaj munaj gentecunami.

Paicunapica, ali yuyaipash na tianllu.

29¡Caita ali yachangapajpash, alipacha yachajushcacuna cashpachari ali canman!

Shina cashpaca, ¡tucuripi paicuna ima tucunatapash yachanmanllari!

30Jatun Rumishna paicunapaj Diosllata, jatushpa saquinshna na cujpi, Mandaj Diosllata paicunapaj maquipi na churajpica, ¿imashnashi shujlla runa huaranga runacunata huañuchingapaj catinman carca?

¿Imashnashi ishcai runalla, chunga huaranga runacunata calpachinman carca?

31Ashtahuangarin jatun rumishna paicunapaj dioscunaca, jatun Rumishna ñucanchi Dioshuanga na chimbapuranllu.

Chashna cajtaca, ñucanchita fiñajcunapash ricushpa villangallami.

32Paicunapaj uvas chagracunaca, Sodoma pueblomanda uvas chagracunashnami.

Paicunapaj pambacunaca, Gomorra pueblopaj pambacunashnami.

Paicunapaj uvascunaca, tujsishpa nanachij uvascunami.

Chai uvascunaca, jayaj jayaj racimocunatami charin.

33Paicunapaj vinoca, culebrapaj venenoshnami.

Ninanda tujsishpa nanachij millai culebrapaj venenoshnami.

34‘Chaitaca, ¿nachu ñucallata ñuca ladopi alichishpa charijuni?

¿Nachu ninan valishcacunata alichinapi alichishpa sellashca charijuni?

35Imashna llaquichishcashnallata llaquichinapash, cuna cashcata cunapash ñucapajmi.

Paicuna llaquichi tucuna punllapash ña chayajushcamandami, paicunapaj chaqui lluchana punllapillata lluchanga.

Paicunaman cungapaj alichishcata cunapash, ñapashmi chayamunga’ nircami.

36Mandaj Diosca, pai agllashcacunataca, aliguta ricushpami mandanga.

Ushai illaj tucushcata ricushpami, paita servijcunata juyaimanda llaquichinata saquinga.

Servishpa causajpash, na servishpa causajpash, tucurinajujta ricushpami chashna saquinga.

37Paica cashnami ninga:

‘¿Paicunapaj dioscunaca, maipitayari?

¿Paicuna pacajuj cashca jatun rumishna diosca, maipitayari?

38Chai dioscunaman cushpa huañuchishca animalcunapaj viratami micunajun carca.

Chai dioscunaman cushpa talina vinomandami ufianajun carca.

Paicuna jatarishpa, cangunata ayudangapaj cangunata mitsangapaj shamuchunyari.

39Ricuichi cunanga ñucaca, ñucallatami cani.

Ñucahuanga, dioscunapash na tianllu.

Ñucami causaita quichuni, ñucallatami causaita cuni.

Ñucami chugrichini, ñucallatami jambini.

Ñuca maquimanda cacharichingapaca, pipash na tianllu.

40Jahua pachaman ñuca maquita vichai churashpami, cashna nisha:

Ñucaca, causaita causaicamanmi causajuni.

41Punchapamba ñuca espadata, filo filota rurashpa, ñuca maquihuan llaquichi callarishpaca, ñucata fiñajcunataca, ñucata llaquichishcashnallatami llaquichisha.

Ñucata na ricunayachij runacunamambash, cuna cashcatallatami cusha.

42Ñuca flechacunataca, yahuarsapatami rurasha.

Ñuca espadaca, aichatami micunga.

Prezu apai tucushcacunata huañuchishca yahuarpi, jatun ajchata charij ñucata fiñaj runacunapaj umacunapimi, chashna tucunga’ ningami.

43Llactacunapi causajcunaca, Dios agllashca gentecunatami alicachina canguichi.

Paita servijcunapaj yahuarta jichashcamandaca, paimi chashnallata huañuchinga.

Paita fiñajcunataca, chashnallatami llaquichinga.

Pai agllashcacuna causanajuj llactamanda, juchata anchuchingapajmi chashna ruranga” nijurcami.

44Moisés shamushpami, cai candanapi tucuilla shimicunataca, israelcuna uyajta yachachijurca. Moisesca, Nun shuti runapaj churi Josuendimi chaipi carca.

45Chai tucui shimicunatami Moisesca, tucuilla israelcunaman yachachishpa tucuchirca.

46Chai jipami, paicunataca cashna nirca:

“Cunan ñuca yachachishca tucuilla shimicunataca, cangunapaj shungupi alichishpa pactachinguichi. Cangunapaj huahuacunatapash, cai tucui mandashca shimicunataca, aligutapacha pactachishpa causanajuchun mandanguichi.

47Cai mandashca shimicunaca, na yangachu. Ashtahuangarin cangunaman causaita cuj shimicunami. Cai mandashcata pactachishpami, Jordán yacuta chimbashpa, cangunapaj cachun japishpa causagrinajuj chai llactapica unaita causanguichi” nircami.

Canaán llactata Moisés ricuchunmi, Diosca saquishca

48Chai punllallatami Mandaj Diosca, Moisesman cashna nishpa villajurca:

49“Abarim shuti chai urcu purapi tiaj Nebo shuti urcuman vichai rilla. Chai urcuca, Jericó pueblo chimba purapi tiaj Moab llactapimi. Chai urcuman vichai rishpaca, israelcunapaj cachun ñuca carashca Canaán llactata ricunguilla.

50Chai urcuman vichai rishpaca, chaipi huañushpa, cambajpura gentecunahuan tandanajunguilla. Shinallatami cambaj huauqui Aaronbash, Hor shuti urcupi huañushpa, paipajpura gentecunahuan tandanajurca.

51Zin nishca jichushca pambapi, Meriba nishca Cades shuti yacupi cashpaca, tucui israelcunapaj ñaupajpi juchata rurashpa ñucata fiñachishcamandami, chashna tucunguichi. Ñucataca, israelcunapaj chaupipi jucha illaj cajtapash na ricuchishpami purircanguichi.

52Chaimanda chai llactataca, cambaj ladollapi cajtami ricungui. Ashtahuangarin israelcunaman ñuca carashca chai llactaman yaicuitaca, na ushanguichu” nijurcami.

DEUTERONOMIO