JOSUÉ 14 - Quichua Imbabura Bible

Canaán llactataca, suerteta rurashpami chaupinajushca

1Canaán llactapica, cai alpacunatami israelcunaca, paicunapaj cachun japinajurca. Chai alpacunataca, Eleazar shuti curapash, Nun shuti runapaj churi Josuepash, Israel aillucunata mandaj taitacunapashmi chaupishpa cunajurca.

2Chai alpacunataca Mandaj Dios, Moisesta mandashcashnallatami, iscun aillucunamambash, Manasespaj chaupi aillumambash, suerteta rurashpa paicunapaj alpa cachun cunajurca.

3Rubenbaj, Gadpaj ishcai aillucunaman, Manasespaj chaupi aillumambash, Jordán yacu chimba ladomanmi, Moisesca paicunapaj alpa cachun ña cushca carca. Ashtahuangarin levitacunamanga, paicuna purapica alpacunata na curcachu.

4Josepaj churicunapaj miraicunaca, ishcai aillucunami carca. Paicunaca Manasés shuti, Efraín shuticunami carca. Chaimandami levitacunamanga, alpacunata na curca. Ashtahuangarin paicuna causachunga, pueblocunatami curca. Chai pueblocunataca, huagracunata, llamacunata michina pambacunandimi curca.

5Mandaj Dios, Moisesta mandashcashnallatami, israelcunaca alpacunata chaupirinajurca.

Caleb shuti runaca, Hebrón shuti pueblotami chasquishca

6Judá shuti runapaj miraicunami, Josuehuan parlangapaj Gilgal shuti puebloman shamunajurca. Cenezeopura Jefone shuti runapaj churi Caleb shuti runami, Josuetaca cashna nijurca: “Cades-barnea shuti pueblopi cashpa canmandapash, ñucamandapash Mandaj Taita Dios, Moisesman imatalla nishcataca canllata yachanguimi. Paica, Taita Diospaj runagumi.

7Llactata rijsishpa tigramuchun, Mandaj Diosta servij Moisés, Cades-barnea shuti pueblomanda cachajui punllapica, chuscu chunga huatatami charircani. Chai llactata ricushpa tigramushpaca, ñuca shungupi imashna yarijushcatami, chaitapacha villangapaj shamurcani.

8Ñucahuan vichai shamuj ñuca huauquicunami, israelcunaman shungupi manllana yuyaita cunajurca. Ashtahuangarin ñucaca, ñucata Mandaj Dios imata nishcatami pactachijurcani.

9Chaimandami Moisesca, cashna nishpa juramentuhuarca: ‘Ñucata Mandaj Taita Diosta, tucui shunguhuambacha can catishpa cazushcamandaca, maitalla cambaj chaquihuan sarushca llactacunaca, cambajpash, cambaj huahuacunapajpashmi, tucui causaipaj canga’ nihuarcami.

10Cunanga Mandaj Diosllatami, pai nishcashnallata cai chuscu chunga picha huatata causajuchun saquihuashca. Chaitaca, jichushca pambapi israelcuna purinajui punllacunapimi Mandaj Diosca, Moisesman chashna villarca. Cunanga ricuhuayari. Ñucaca, ñami pusaj chunga picha huatata charini.

11Cai llactata ricuchun Moisés cachamui punllapi shinlli cashcashnallata, shinllirami cani. Macanajuiman llujshingapajpash, tigrangapajpash chai punllacunapi shinlli cashcashnallata, cunambipash shinllirami cani.

12Mandaj Diosca, chai punllapimi cai urcutaca carashapacha nihuarca. Chaimanda cunanga, ñucaman cuhuailla. Chai punllacunapica, canllata alimi yacharcangui. Cai urcupica, anaceocuna causanajuj pueblocunapash, muyundi pircashca jatun pueblocuna tiajtami yachangui. Shina cajpipash Mandaj Diosca ñucahuan cashcamandami, chai runacunataca Mandaj Dios nishcashnallata, chai pueblocunamanda llujchishpa cachai ushasha” nijurcami.

13Shina nijpimi Josueca, Jefone shuti runapaj churi Caleb shuti runata bendiciashpa, Hebrón shuti pueblotaca, paipaj cachun curca.

14Chaimandami Hebrón puebloca, cenezeopura Jefone shuti runapaj churi Caleb shuti runapaj tucurca. Paica, israelcunata Mandaj Taita Diosta tucui shunguhuambacha catishpa cazushcamandami, chai puebloca cunan punllacaman paipaj.

15Hebrón shuti pueblopica pundaca, anaceopura Arba shuti manllanayai jatun runami causajurca. Chaimandami pundaca chai puebloca, Quiriat-arba shuti carca. Shinami chai llactapica, cutinga na macanajushpa samarca.