2 CRÓNICAS 29 - Quichua Imbabura Bible

Ezequías shuti runami mandajushca(2 Rey. 18:1-3)

1Ezequías shuti runaca, ishcai chunga picha huatata charishpami mandai callarirca. Paica, ishcai chunga iscun huatatami, Jerusalenbi mandajurca. Paipaj mamaca, Zacarías runapaj ushi Abías shutimi carca.

2Ezequías runaca, Mandaj Diospaj ñaupajpica, paipaj ñaupa taita David tucui alita rurashpa causashcashnallatami, alitalla rurajurca.

Diosta mañachunmi Ezequías shuti runaca, Diospaj huasi ucuta cutin alichishca

3Ezequías runaca, pai mandai callarishca shuj huata punda quillapica, Mandaj Diospaj huasi pungucunata pascashpa yaicushpami, cutin alichijurca.

4Chai jipaca curacunata, levitacunata cayashpami, indi llujshimuj ladoman tiaj plazaman tandachirca.

5Chaipimi cashna nijurca: “¡Levitacuna, uyahuaichi! Cunanga, Diospajlla tucuichi. Cangunapaj ñaupa taitacunata Mandaj Taita Diospaj huasitapash, paipajlla cachun ruraichi. Diospaj huasi ucumandaca, mapacunatapash llujchishpa shitaichi.

6Ñucanchi taitacunaca, paita na cazushpa jariyashpami, ñucanchita Mandaj Taita Diospaj ñaupajpica, nalita ruranajurca. Mandaj Diosta saquishpami, paipaj jatun carpamandaca, ñavita shujman churashpa huashaman tigranajurca.

7Diospaj huasi corredor pungucunatapash vichashpami, lamparacunatapash huañuchinajurca. Inciensotapash na cushnichinajurcachu. Diospajlla huasipi, israelcunapaj Taita Diosman animalcunata cushpa huañuchinatapashmi saquinajurca.

8Chaimandami Mandaj Dios ninanda fiñarishcapash, Judá llactapi, Jerusalenbi causajcunapaj jahuapi shamurca. Shina shamushpami musparinajuchun, ninanda millanayachi tucuchun, asishpa ricui tucuchun saquirca. Chaitaca, cangunapaj ñavihuambachami ricunajunguichi.

9Ricuichi. Chaimandami ñucanchi taitacunaca, espadahuan huañuchi tucunajurca. Shinallata ñucanchi churicunapash, ushicunapash, ñucanchi huarmicunapashmi, prezu apai tucunajurca.

10Cunanga, israelcunata Mandaj Taita Dios ninanda fiñarishcamanda ali tucuchunmi, paihuan ari ningapaj alipacha yarircani.

11Ñuca huahuacunalla, cunanga na cangunallata umachirinshna causanachu canguichi. Mandaj Diosca, cangunataca paipaj ñaupajpi paitalla servishpa, paipajta rurajcuna cachun, inciensota cushnichinajuchunmi agllarca” nijurcami.

12Shina nijpimi, levitacunaca jatarinajurca. Coat shuti runapaj miraimandaca, Amasai shuti runapaj churi Mahat shuti runapash, Azarías runapaj churi Joel runapashmi carca. Merari shuti runapaj miraimandaca, Abdi shuti runapaj churi Cis shuti runapash, Jehalelel shuti runapaj churi Azarías runapashmi carca. Gersón shuti runapaj miraimandaca, Zima shuti runapaj churi Joa shuti runapash, Joa shuti runapaj churi Edén shuti runapashmi carca.

13Elizafán shuti runapaj miraimandaca, Simri shuti, Jeiel shuti runacunapashmi carca. Asaf shuti runapaj miraimandaca, Zacarías shuti, Matanías shuti runacunapashmi carca.

14Hemán shuti runapaj miraimandaca, Jehiel shuti, Simei shuti runacunapashmi carca. Jedutún shuti runapaj miraimandaca, Semaías shuti, Uziel shuti runacunapashmi carca.

15Paicunami, paicunapaj huauqui levitacunata tandachishpa Diospajlla tucunajurca. Chai jipaca, jatun mandaj mandashcashnallata, Mandaj Diospaj Shimipi nijunshnallatami, Mandaj Diospaj huasipi mapata fichangapaj yaicunajurca.

16Chashnami curacunaca, Mandaj Diospaj huasimanda mapata fichangapaj yaicunajurca. Shina yaicushpami, Mandaj Diospaj huasi ucupi tucui mapa tiashcata, Mandaj Diospaj huasi patioman llujchinajurca. Chai patiomandaca, canllaman llujchishpami, ninanda jatarij Cedrón shuti huaicu yacuman levitacuna apanajurca.

17Huata callari quillapaj punda punllapimi, Diospajlla tucungapaj alichiri callarinajurca. Ña alichirishca cashpami, chai quillapajllata pusaj punllapica, Mandaj Diospaj huasi corredorman shamunajurca. Mandaj Diospaj huasitaca, pusaj punllapimi Diospajlla cachun ruranajurca. Chai quillapajllata chunga sucta punllapimi, tucuita tucuchinajurca.

18Chaimandami, jatun mandaj Ezequías runapajman shamushpa, cashna ninajurca: “Mandaj Diospaj tucuilla huasimandaca, ñami mapata anchuchircanchi. Animalta cushpa tucuillata rupachina altartapash, chai altarpi imatalla rurangapaj tucui tiajtapash, Diospajlla tandata churana mezatapash, chai mezapi imatalla rurangapaj tucui tiajtapash, chashnallatami rurarcanchi.

19Shinallata jatun mandaj Acaz shuti runa na cazushpa, chai ucumanda llujchishpa shitashca tucui imalla tiashcatapashmi, Diospajlla cachun rurashpa alichircanchi. Ricui cunanga, tucui chaicunaca ñami Mandaj Diospaj altar ñaupajpillata tianajun” ninajurcami.

20Jatun mandaj Ezequías runaca, tutamandata ucha jatarishpami, pueblopi causajcunata mandajcunata tandachishpa, Mandaj Diospaj huasiman vichai rirca.

21Chaipimi, mandajuj llactapi tiaj juchamandapash, Diospaj huasimandapash, Judá llactamandapash, canchis maltun shicuta, canchis maltun llamata, canchis jari llamata, canchis jari chivota Diosman cungapaj apamunajurca. Jatun mandajca, Aarón runapaj mirai curacunatami cashna nirca: “Cai animalcunataca, Mandaj Diosman cushpa, altarpi rupachipaichi” nircami.

22Maltun shicucunata huañuchijpica, yahuartaca curacunami japinajurca. Chai yahuartaca, altarpimi tsirapachinajurca. Chai jipaca, jari llamacunata huañuchishpapash, yahuartaca altarpillatami tsirapachinajurca. Shinallata maltun llamacunata huañuchishpapash, yahuartaca altarpillatami tsirapachinajurca.

23Chai jipami, juchamanda cushca jari chivocunataca, jatun mandajpaj ñaupajman, chaipi shayanajuj ashtaca gentecunapaj ñaupajman quimichinajurca. Shina quimichijpimi paicunaca, chai chivocunapaj uma jahuapi maquita churanajurca.

24Chai jipami curacunaca, chai chivocunata huañuchirca. Shina huañuchishpami, chai chivocunapaj yahuartaca, tucui israelcuna Taita Dioshuan ali tucuchun, juchamanda cushpa altarpi tsirapachinajurca. Jatun mandajca, tucui israelcunatami, Taita Dioshuan ali tucuchun, paicunapaj juchamanda chai animalcunata Diosman cushpa tucuillata rupachinajuchun mandashca carca.

25Shinallata levitacunatapashmi, Mandaj Diospaj huasipi platillota, salteriota, arpata tocanajuchun churarca. Chaitaca, jatun mandaj Davidpash, Dios ricuchishcata villaj Gad shuti runagupash, Dios ima nishcata villaj Natán runagupashmi mandashca carca. Chai mandashcacunaca, Mandaj Diosmandami shamun. Paimi chaicunataca, pai ima nishcata villajcunahuan villachishca carca.

26Levitacunaca, David rurachishca tocanacunahuan, curacunaca trompetacunahuanmi shayanajurca.

27Shina shayanajujpimi Ezequiasca, Diosman cushpa altarpi tucuillata rupachina animalcunata huañuchinajuchun mandarca. Animalcunata tucuillata rupachi callarijpica, candajcunapashmi Mandaj Diosman candai callarinajurca. Paicunaca trompetata huacachishpa, Israel llactata jatun mandaj David rurachishca tocanacunata tocashpami candanajurca.

28Tandanajushca ashtaca gentecunaca, Diosta ninanda alicachinajujpi, candajcunaca candanajujpimi, trompetata huacachijcunaca trompetata huacachinajurca. Diosman animalcunata cushpa tucuillata rupachishpa tucuchingacamanmi, chashna ruranajurca.

29Ña rupachishpa tucuchijpica, jatun mandajpash, paihuan tandanajushca tucuilla gentecunapashmi urai cumurishpa, Diosta ninanda alicachinajurca.

30Chaimandami, jatun mandaj Ezequías runapash, caishuj mandajcunapash, levitacunataca cashna nirca: “David escribishca shimicunahuambash, Dios ricuchishcata villaj Asaf shuti runa escribishca shimicunahuambash, Mandaj Diostaca alicachinami canguichi” nircami. Shina nijpimi, paicunaca ninan cushijuihuan alicachishpa, cungurishpa Diosta ninanda alicachinajurca.

31Ezequías runaca, cashna nishpami tigrachirca: “Cangunaca, cunanga ñami Mandaj Diospajlla canguichi. Shina cashcamanda animalcunata cushpa huañuchingapaj, Mandaj Diospaj huasipi paita alicachingapaj quimirichilla” nircami. Shina nijpimi, ashtaca gentecunaca Diosta alicachishpa, animalcunata cushpa huañuchingapaj apamunajurca. Ali shunguta charijcunacarin, paicunapaj munaillatami tucuillata rupachina animalcunata apamunajurca.

32Tandanajushca gentecuna Diosman cushpa tucuillata rupachingapaca, canchis chunga huagrata, patsaj jari llamata, ishcai patsaj maltun llamatami apamushca carca. Chai tucui animalcunatami, Mandaj Diosman cushpa tucuillata rupachinajurca.

33Diosman cushcacunaca, sucta patsaj huagracuna, quimsa huaranga llamacunami carca.

34Ashtahuangarin curacunaca huaquinlla cashpami, tucuillata rupachina animalcunata lluchungapaca, na pactanajurca. Chaimandami chai animalcunata lluchushpa tucuchingacaman, shinallata caishuj curacuna, Diosta servingapaj alichiringacaman, paicunapaj huauqui levitacuna ayudanajurca. Levitacunami, Diospajlla tucungapaca curacunata ashtahuan yali alitalla shungupi yarinajurca.

35Shinami tucuillata rupachina animalcunaca, ashtacapacha tiarca. Dioshuan ali cangapaj carashca animalcunapaj viracunapashmi tiarca. Tucuillata rupachina animalhuan cushpa talina vinopashmi tiarca.

Shinami Mandaj Diospaj huasipica, cutinllata Diosta servinata callarirca.

36Tucui gentecunata Taita Dios alichishcamandami Ezequías runapash, tucui gentecunapash ninanda cushijunajurca. Tucui imapash ucha rurarishcamandami, chashna cushijunajurca.