1Asiria llactata jatun mandaj Sargón shuti runaca, paipaj soldadocunata mandaj Tartán nishca runatami, Asdod shuti puebloman cacharca. Chai huatapi pai shamushpami, Asdod shuti pueblopi causajcunahuan macanajushpa, chai pueblota japirca.
2Chai punllacunami Mandaj Diosca, Amoz shuti runapaj churi Isaiastaca, cashna nishpa rimarca: “Caimanda rishpa, can churajushca cañamu churajunata llujchi, cambaj chaquipi churajushcacunatapash llujchi” nircami.
Shina nijpimi churajunapash illaj, chaquipash lluchulla purijurca.
3Chai jipami Mandaj Diosca, cashna nirca: “Ñucata servij Isaiasca, quimsa huatatami churajunapash illaj, chaquipash lluchulla purijurca. Shina purijushpaca, Egipto llactapi, Etiopía llactapi causajcuna llaquichi tucunatami ricuchijurca.
4Chashnami, Asiria llactata jatun mandajca, Egipto llactapi, Etiopía llactapi causajcunataca, chairalla viñaicunatapash, rucucunatapash, churajunapash illaj, chaquipash lluchullata prezu apanga. Egiptopi causajcuna pingai tucuchunmi, changapash lluchullacunata apanga.
5Shina rurajpimi, Etiopía llacta runacunata yariashpa causajcunapash, Egipto llacta runacunahuan cushijushpa causajcunapash, pingai tucushpa musparinajunga.
6Chai punllacunapica, chai mama cucha manñacunapi causajcunaca, cashnami ninajunga: ‘Ricuichi, ñucanchica paicunatami yariashpa causarcanchi. Asiria llactata jatun mandajpaj ñaupajmanda ñucanchita cacharichijuchunga, paicunapajmanmi rin carcanchi. ¿Cunanga, imashnashi ñucanchica quishpirishun?’ ninajungami” nircami.
Who We AreWhat We EelieveWhat We Do
2025 by iamachristian.org,Inc All rights reserved.
