1Imatapash cashcatapacha rurajcunalla,
Mandaj Diospi cushijuichiyari.
Ima nalitapash na rurajcunapaca,
paita alicachinaca juyaillagumari.
2Mandaj Diostaca, arpata tocashpa candaichiyari.
Chunga cuerdata charij tocanata, salteriota
tocashpa candaichiyari.
3Mushuj candanahuan candaichi.
Ninanda cushijuna tonohuan, aliguta tocaichi.
4Mandaj Dios rimashca shimica, aligupachami.
Tucui imatalla pai rurashcacunapash,
pactachij cajtami ricuchijun.
5Mandaj Diosca, imatapash cashcatapacha ruranata,
aliguta ricushpa mandanatami juyan.
Cai pachaca, paipaj llaquinahuan jundami.
6Mandaj Dios rimajpillami, jahua pachaca rurarirca.
Chaipi tucui ima tiajcunapash,
paipaj shimihuan fucujpillami rurarirca.
7Paimi, mama cucha yacucunatapash,
mundunanshna tandachin.
Manllanayai ucu ucu yacucunatapash,
paimi yacuta alichinata ruran.
8Mandaj Diostaca, tucui cai
pachapi causajcuna manllachun.
Tucui cai pachapi causajcuna
paipaj ñaupajpi manllachun.
9Pai rimajpica, ima tiajcunapash rurarircallami.
Pai mandajpimi, tucui imapash tiai callarirca.
10Mandaj Diosca, llactacunapi causajcuna
yarinajushcataca yangapimi churan.
Gentecuna imatalla rurangapaj
parlarinajujtapash jarcanllami.
11Mandaj Dios imatalla rurashami nishcapash,
causaita causaicaman pactajungallami.
Paipaj shungupi yarishcacunataca,
tucui jipa miraicunapaj rurajunllami.
12Mandaj Dios paicunapaj Taita Dios cajpi
causanajuj llactaca, ninandami cushijun.
Paicunataca paipajllata cachunmi, paillata agllashca.
13Mandaj Diosca, jahua pachamandami ricujurca.
Huañuna aichayu tucui runacunatami ricujurca.
14Pai causajuj pushtumandami, cai pachapi
tucui causajcunataca ricujurca.
15Paimi, tucuicunapaj shungutaca rurarca.
Chaimandami imatalla paicuna ruranajujtaca,
aligutapacha ricuriajun.
16Jatun mandajca, na ashtaca soldadocunata
charishcamandalla quishpiri ushanllu.
Ninan shinlli runapash, pai shinlli cashcamandalla,
pacajungapaj calpaitaca na ushanllu.
17Quishpiringapaj, caballota charishcapash yangami.
Ninan ushaita charij caballo cashpapash,
pitapash na cacharichi ushangachu.
18Ricuichi, Mandaj Diosca paipaj ñavihuanmi
paita manllajcunatapash, pai llaquinata
shuyajcunatapash ricujun.
19Huañunamanda paicunapaj almata cacharichingapaj,
yarjai punllacunapipash causaita cungapajmi
chashna ricujun.
20Ñucanchi almaca, Mandaj Diostami shuyan.
Paica ñucanchita ayudaj,
ñucanchi jarcarina escudoshnami.
21Chaimandami ñucanchi shunguca, paipi cushijunga.
Jucha illaj paipaj shutigutami,
yariashpa causanajurcanchi.
22Mandaj Dioslla, imashna ñucanchi
canda shuyashcashnallata llaquihuayari.
Who We AreWhat We EelieveWhat We Do
2025 by iamachristian.org,Inc All rights reserved.