Psalms 10 - Quichua Imbabura Bible

Nalicunata Dios tucuchijuchun mañashcami

1Mandaj Dioslla, ¿imashpata carupi cangui?

Ñucata ninanda llaquichijui huatacunapica,

¿imashpata pacajupangui?

2Nalita ruraj runaca ninanda jariyashpami,

imagutapash na charij runataca catiriashpa llaquichijun.

Shinamandami llaquichingapaj pai

yarijushcapillata, urmashpa japi tucunga.

3Nalita ruraj runaca, pai munashcata

rurashpami cushijun.

Ashtahuan ashtahuan charingapaj munaj

runatarami alicachin.

Mandaj Diostaca, yangapimi churan.

4Nalita ruraj runaca, yapa jariyashca

purishpami, Taita Diostaca na mascan.

Pai imatalla yarijushpapash,

Taita Diostaca imatallapash na yarinllu.

5Paica, tucui causaipimi vishtu

ñangunapi purinshna causan.

Can llaquichinacunaca, paipaj ñaupajmanda

carupipacha cashcatami yarijun.

Tucui paita fiñajcunatapash, yangapimi churan.

6Paipaj shungupica: “Ñucataca, pipash

na urmachingachu, ima llaquipash

na japihuangachu” yajunmi.

7Paipaj shimipica, llaqui japishpachari

ali canman ninapash, umachinacunapash,

umashpalla quichunapash jundami tiajun.

Paipaj jallupash, rimashpa llaquichinahuan,

nalitalla rimanahuan jundami.

8Uchilla llactacuna tiaj ladocunapimi,

pacalla chapashpa llaquichingapaj tianajun.

Pacalla pushtucunapimi, ima nalitapash

na ruraj runataca japishpa huañuchinajun.

Imatapash na rurai ushajtaca, pacalla

chapashpa llaquichingapajmi ricurianajun.

9Paipaj jatun utujumanda león chapajunshnami,

na ricunalla pushtumanda pacalla chapanajun.

Imagutapash na charij runata quichushpa

llaquichingapajmi, pacalla chapanajun.

Imagutapash na charij runataca, paipaj linlliman

aisashpami, imatapash quichun.

10Na mitsari ushajcunaca, taucacunami

cumurishpa curparishpa, paipaj shinlli

sillucunapishna japi tucun.

11Paipaj shungupica, cashnami yarijun:

“Taita Diosca cungashcami.

Paipaj ñavitaca quilparishcami, ima

horapash na ricungachu” yajunmi.

12Mandaj Taita Dioslla, jatarishpa

cambaj maquita alsapairi.

Imagutapash na charijcunataca ama cungapaichu.

13¿Imashpata nalita ruraj runaca,

Taita Diosta yangapi churan?

Paipaj shungupica: “Canga, imata ricunatapash

na charinguichu” yajurcami.

14Canllata ricurcanguimi.

Canga, imatalla rurajtapash rimashpa

llaquichijtapash, cambaj maquihuan chashnallata

tigrachingapajmi ricuriajungui.

Imatapash na rurai ushajcunaca,

cambajmanmi chayan.

Canmi, taita mama illaj

huahuacunataca, ayudaj cangui.

15Nali shungu runataca, rigrata faquipairi.

Nali runa imatalla rurashpa llaquichijushcataca,

imapash ña na ricuringacaman

catiriashpa tucuchipairi.

16Mandaj Diosca, na tucurij causaita

causaicaman Jatun Mandajmi.

Paipaj alpamandaca, llactacunapi causajcunaca

tucuchi tucushcami.

17Mandaj Dioslla, na jariyashpa causajcuna

imatalla mañajtaca uyaparcanguimi.

Canmi paicunapaj shunguta alichishpa,

paicuna mañajtapash aligutapacha uyapangui.

18Taita mama illaj huahuacunatapash,

llaquichi tucushcacunatapash mitsashpa uyariajupangui.

Alpata rurashca runa ama ashtahuan llaquichishpa

catijuchunmi, chashna rurapangui.