JEREMÍAS 9 - Quichua Imbabura Bible

1¡Ñuca umaca, yacushna tucushpachari ali canman. Ñuca ñavimandapash, pugyu yacushna viqui llujshijushpachari ali canman. Shina cajpica, ñuca llactapi causajcuna huañushcamandaca, tutapash punllapash huacajuimanllami!

2¡Na cashpaca ñanda purijcuna, jichushca pambapi llandunatallapash ñucaman cushpachari ali canman! Ñuca llactapi causajcunata saquishpa rishpaca, paicunamanda caruyaimanmi. Paicunaca tucuicunami, cazarashca jahuapash shujcunahuan causanajun. Yachashpata na cazuj puralla tandanajushca gentecunami.

3Mandaj Diosca, cashnami nin: “Paicunapaj jalluhuanga, flechata arcohuan shitanshnami llullanajun. Chaimandami cai llactapica, shinlli canata, na llullashpa causanataca na usharca. Ashtahuangarin nalicuna tucushpami, ashtahuan ashtahuan ñucataca na rijsinajurca.

4Tucuicuna cuidarishpa, paipaj cumbahuanga ama cungashca purichun. Maijan cashpapash, ama huauquitalla yariashpa causachun. Tucui huauquicunallata, llullashpa umachinllami. Cumbacunapash tucuicunami yangata juchachishpa parlashpa purinajun.

5Tucuicunami, paicunapaj cumbatallata umachishpa, llullashpalla parlanajun. Paicunapaj jalluca, llullashpa parlanata yacharishca cashpami, jatun nalitalla ruranajun.

6Paicunaca, umachijcunapaj chaupipimi causanajun. Chashna yapata umachinajuj cashpami, ñucata rijsinataca na munarca” ninmi Mandaj Diosca.

7Chashnacuna cajpimi tucuita Mandaj Diosca, cashna nin: “Ricui, imashna cajta ricungapaca ninapi churashpami, tucuilla mapata anchuchigrini. Ñuca agllashcacunataca, ¿imatata ashtahuan rurasha?

8Paicunapaj jalluca, filo filota rurashca flechashnami. Shimihuanga, umachingapajllami cumba purapash, casilla aliguta causashun ninajun. Ashtahuangarin shungu ucupica, imashnamambash pacalla llaquichinatami yarinajun.

9Chashna ruranajushcamandaca, ¿nachu llaquichina cani? Chashna llactacunataca, ¿nachu ñucapash chashnallata tigrachina cani?” ninmi Mandaj Diosca.

10Cunanga chai llactacunataca, maijanllapash na yalijuj ricurinllu. Huagra huacajllapash, na uyarinllu. Sacha animalcunapash, jahuata rij alasyu animalcunapashmi, llaquinayaita pacajushpa maimambash rishca. Chaimandami urcucunamandapash huacagrisha, jichushca pambacunapi tiaj michina pambacunamandapashmi ninanda huacasha.

11Jerusalendaca, tucuillata urmachishpa rumi mundundallami saquisha, chacal nishca animalcuna causanamanmi tigrachisha. Judá llacta pueblocunatapash, llaquinayaita tucuchishpami, shuj runallapash na causana puchunata saquisha.

Tucuilla urmachishpa, prezu apanata villachishcami

12¿Imashpata cai llactapi ima tiashcacunapash, tucuilla llaquinayaita tucurirca? ¿Imashpata jichushca pambashna tucurca? Cunanga, maijan yalijpash, na ricurinllu. Tucui cai imashpa chashna tucushcata yachangapaca, ¿pita alipacha yachajushca canga? Mandaj Diosca, shujcunaman villachunga, ¿maijanmambash imatallapash villarcachu?

13Mandaj Diosca, cashnatapashmi nirca: “Ñucaca, paicunapaj maquipimi ñuca mandashca shimitaca curcani. Chaitaca napacha cazushpa saquishpami, chai mandashcapi nijunshnaca na catinajurca.

14Ashtahuangarin paicunapaj shungupi yanga yarishcatallami ruranajurca. Paicunapaj taitacuna yachachishcashnallatami, Baal shuti dioscunata catinajurca” nircami.

15Chaimandami cunanga, tucuita Mandaj, israelcunapaj Taita Diosca, cashna nin: “Ricuichi, cai gentecunamanga, ajenjotami micuchigrini. Shinallata jayajhuan chapushca yacutami ufiachigrini.

16Paicunapash, paicunapaj taitacunatapash na rijsishca llactacunamanmi, caita chaita cachagrini. Paicunataca catishpa, tucuchingacaman espadahuan huañuchinajuchunmi cachasha” ninmi.

17Tucuita Mandaj Diosca, cashnatapashmi nin: “Caita aliguta yarichi. Huacanata yachaj huarmicuna shamuchun cayaichi. Huacanata alipacha yachajcunata mascaichi” ninmi.

18Ñucanchimanda huacangapaj ucha jatarishpa shamuichi. Ñucanchi ñavimanda viquipash, yacushnami llujshinga. Ñucanchi ñavi milmamandapash, viquica yacushnami shutujunga.

19Sion shuti pueblomandaca cashna nishpami, yarishpa yarishpa huacanajuj uyarirca: “Ñucanchi alpacunata shitashpamari rigrinchi. Ñucanchi huasicunatapashmi urmachinajurca. ¡Llaquinayaitamari tucuchi tucurcanchi! Ninandapachami pingaichi tucushcanchi” nishcami uyarirca.

20Huarmicunapash, Mandaj Diospaj Shimi imatalla nishcataca rinrita pascashpa, uyashpa chasquichiyari. Paipaj shimihuanmi cashna nin: “Cangunapaj ushicunatarami yarishpa yarishpa huacanataca, yachachina canguichi. Cangunapaj cumba huarmicunamambash, tucuicunallatami chashna llaquirishpa huacanata yachachina canguichi.

21‘Huañuica, ñucanchi ventanacunata vichai yaicumushpami, mandashpa tiajuna ñucanchi huasicunamambash yaicumushca. Shinallata ñangunapi purinajuj huahuacunatapash, plazacunapi purinajuj chaira viñaicunatapashmi tucuchishca’ ninmi ningui.

22Cashnatapash ningui: Mandaj Diosca, cashnami nin: ‘Huañushcacunaca, pambapi huanuta shitashcashnami sirinajunga. Trigota cuchushpa, tandachinajujpi urmashpa puchushcashnami, pipash na tandachijpi sirinajunga’ ninmi ningui” nircami.

Taita Diosta rijsishpami, runaca juyailla causan

23Mandaj Diosca, cashnami nin: “Alipacha yachajushca runapash, alipacha yachashcamandalla ama alicachirichun. Ninan shinlli runapash, ninan shinlli cashcamandalla ama alicachirichun. Charij runapash, charij cashcamandalla ama alicachirichun.

24Ashtahuangarin maijan alicachiringapaj munashpaca, ñucata yarishcamanda, ñucata rijsishcamanda alicachirichun. Mandaj Dios ñucaca, cai pachapica llaquijpash, aliguta ricushpa mandajpash, imatapash cashcatapacha rurajpashmi cani. Ñucaca, chashna rurashpa causachunmi munani” ninmi Mandaj Diosca.

25Mandaj Diosca, cashnatapashmi nin: “Ricuichi, circuncisión nishcata tucui rurashcacunatapash, chaita na rurashcacunatapash, ñuca llaquichina punllacunami chayamujun.

26Egipto, Judá, Edom, Amón, Moab shuti llactacunapi causajcunata, shinallata jichushca pamba ashtahuan juchucunaman causajcunatapashmi, tucuicunata llaquichisha. Chai tucui llacta runacunaca, circuncisionda na rurashcacunami. Tucuilla israelcunacarin, circuncisionda na rurashcashnallatami, nali shunguhuan causanajun” ninmi.