AMÓS 9 - Quichua Imbabura Bible

Dios llaquichijujmandaca, pipash na quishpiri ushanallachu

1Jatun Diostaca, altar jahuapi shayajujtami ricurcani. Paica cashnami nihuarca: “Pungu pilarpi tiaj capitel nishcata urmachingui. Chai pungucunapash, tucuicunapaj uma jahuapi urmashpa ñuturichun, cuyuchishpa urmachingui. Chaipi maijambash na huañujpica, espadahuanmi huañuchisha. Chaimanda pacajushpa rijcunaca, pipash na tiangachu, shujllapash na quishpiringachu.

2Seolcaman allashpa pacajujpipash, ñuca maquihuan japishpami, chaimandapash llujchisha. Jahua pachacaman vichai rijujtapash, chaimandapashmi urai tigrachimusha.

3Carmelo shuti urcu pundapi pacajujpipash, chaipipash mascashpami japisha. Ñuca ñavimanda pacajungapaj mama cucha ucu ucuman yaicujpipash, yacupi causaj culebra canichunmi cachasha.

4Paicunata fiñajcuna prezu apashpa huatashcashna charinajujpipash, espadahuan huañuchinajuchunmi cachamusha. Paicunata ñuca ñavihuan ricushpapash, llaquichingapajllami ricusha, alita rurangapaca na ricushachu” nihuarcami.

5Tucuita Mandaj Jatun Dios tacarijpimi, cai pachaca yacuyanga. Cai pachapi causajcunapash, tucuicunami ninanda huacanajunga. Cai pachaca, jatun yacushnami miranga. Chai jipaca, Egipto jatun yacushnami cutin ashalla tucunga.

6Mandaj Diosca, pai causana ucucunataca, jahua pachapimi rurashca. Shinllipacha shicanyachijujtaca, cai pacha jahuamanmi shinllitapacha churashca. Paimi, mama cucha yacucunata cayashpa, alpa jahuapi jichajun. Paica, Mandaj Dios shutimi.

7Mandaj Diosca, cashnami nin: “Israelcunalla, cangunaca ñucapaca, ¿nachu Etiopía llactapi causajcunashna canguichi? ¿Nachu Egipto llactamanda cangunata llujchishcashnallata, filisteocunatapash Caftor llactamanda, arameocunatapash, Kir shuti llactamanda llujchimurcani?

8Ricuichi, Mandaj Jatun Dios ñucaca, juchatalla rurashpa causaj llactataca fiñashpami ricujuni. Shinamandami cai llactapi causajcunataca, llaquinayaita anchuchishpa tucuchisha. Shina anchuchijushpapash, Mandaj Dios ñucaca, Jacobopaj miraicunataca, napacha tucuillata tucuchishachu.

9Ricuichi, ñucami israelcunataca, tucui llacta puracunapi shuj shushunapi shushui tucushcashna cachun saquisha. Chaipica, shuj granogullapash na alpaman urmangachu.

10Ñuca agllashca puracunapi juchata rurajcunaca, espadahuanmi huañuchi tucunajunga. Paicunaca cashnami ninajun: ‘Llaquicuna na ñucanchipajman shamungachu, japitapash na japingachu’ ninajunmi.

Jipa punllacunapica, cutinmi israelcunataca alichinga

11Chai punllapica, Davidpaj jatun carpa urmashcataca, cutinmi shayachisha. Paicunapaj pirca t'unirishpa utujurishcatapashmi, alichishpa shayachisha. Tucui imalla urmashcatapashmi shayachisha. Ñaupa punllacunapi cashcashnallatami, paicunataca shayachisha.

12Paicunamandami, ñuca shutipi mañanajun. Edom llacta asha quedashcatapash, tucui llactacunatapash paicuna japinajuchunmi, chashna shayachisha” ninmi Mandaj Diosca. Paica, chaitaca pactachingapachami.

13Mandaj Diosca, cashnatapashmi nin: “Ricuichi, chai punllacunaca ñami chayamujun. Chai punllacunapica, nara tucuillata cozechajpillatami, yapuna punllacuna chayamunga. Shinallata uvasta nara tucuillata capijpillatami, trigota tarpuna punllacuna chayamunga. Llullu vinoca, yacushnami urcucunapipash, lomacunapipash jicharijunga.

14Ñuca agllashca israelcuna prezu apai tucushcataca tigrachimushami. Paicuna tigramushpami, jichushca pueblocunata shayachishpa chaipi causanajunga. Paicunaca, uvasta tarpushpami, vinotapash ufianajunga. Huertacunata rurashpami, chaipi fucushcacunatapash micunajunga.

15Paicunataca, paicunapaj alpapillatami tarpunshna churasha. Ñuca paicunaman carashca alpamandaca, napacha cutinga fitishpa anchuchishachu” ninmi cangunata Mandaj Taita Diosca.