PROVERBIOS 9 - Quichua Imbabura Bible

Ali Yachaimandapash, juizu illaj huarmimandapashmi villajun

1Ali yachaica paipaj huasitaca, pai

labrashca canchis pilarcunahuanmi shayachirca.

2Jatun micuipaca, animalcunata huañuchishpami,

vinotapash chapurca.

Chai jipami, mezatapash aliguta alichirca.

3Chai jipaca, paita servij huarmicunatami cacharca.

Paicunami, pueblo muyundi ashtahuan

jahuamanda caparinajurca.

4Maijan nara yachajushcacunataca:

“Caiman shamuichi” nijunmi.

Na aliguta yarishpa causajcunataca, cashnami nijun:

5“Ñuca micunata micuj shamuichi.

Ñuca chapushca ali vinota ufiaj shamuichi.

6Na yachajushca causanata saquishpaca, causanguichimi.

Ali yuyaihuan purina ñambi purichi” nijunmi.

7Na cazushpa asij runata ali tucuchun rimajca,

rimashpa pingaichi tucunatallami japin.

Diosta na manllaj runata jarcashpa rimajca,

nalicachi tucungapajllami riman.

8Canda ama millanayachishpa ricuchunga, na cazushpa

asij runataca, na jarcashpa rimanachu cangui.

Ashtahuangarin alipacha yachajushca runata,

ali tucuchun rimangui.

Paica canda juyangami.

9Alipacha yachajushca runaman yuyaita cungui,

paica ashtahuan yachajushcami tucunga.

Imatapash cashcatapacha ruraj runaman

yachachingui, paica ashtahuanmi yachajunga.

10Alipacha yachajushpa callaringapaca,

Mandaj Diostami manllashpa causana.

Ima juchapash illaj Diosta rijsinaca,

ali yuyaita charinami.

11Ñucamandami, can causana punllacunaca

ashtahuan miranga.

Can causana huatacunapash, ashtahuanmi miranga.

12Can, alipacha yachajushca cashpaca,

cambajllatami ali canga.

Na cazushpa asijuj cashpapash,

canllatami llaquichi tucungui.

13Juizu illaj huarmica, shimi cacharishca huarmimi.

Paica imatapash na yachaj, yangalla huarmimi.

14Paipaj huasica, pueblopi

tiaj ashtahuan jahuapimi shayajun.

Chai huasi pungupimi, shuj tiarinapi tiajun.

15Paica, ñanda yalijcunata cayangapajmi,

chashna tiajun.

Paica, ali ñanda yalijcunatami cayajun.

16Maijambash nara yachajushcataca:

“Caiman shamui” nijunmi.

Na aliguta yarishpa causajcunatapash, cashnami nijurca:

17“Shuhuashca yacuca mishquimari,

tandata pacalla micunaca gushtumari” nijurcami.

18Ashtahuangarin huañushcacuna

chaipi tiajtaca na yachanllu.

Pai cayashcacuna Seol ucu ucupi

cajtapash, na yachanllu.