DEUTERONOMIO 18 - Quichua Imbabura Bible

Levitacuna imatalla japinatami villajun

1Leví shuti aillu puramanda tucui levita curacunaca, imata cashpapash, alpata cashpapash, Israel llactapica na japingachu. Paicunaca, Mandaj Diosman carashpa rupachishcacunata, paipaj cachun carashcacunatami micushpa causanga.

2Paicunapaj huauquicunahuanga, ima japinatapash, paicunaca na charingachu. Paicunapaj japinaca, Dios imashna nishcashnallata, Mandaj Diosmi paicuna japina canga.

3Gentecuna Diosman carashpa huañuchishca huagramanda, jari llamamandaca, caicunatami curacunaca japinata charin: Rigra aichata, quijadas aichata, puzungunatami paicuna japinata charin.

4Punda fucushca cambaj granocunata, vinota, aceiteta, punda rutushca llama milmatapashmi cuna canguichi.

5Levitacunataca, canda Mandaj Diosllatami paicunapaj churicunandi, Mandaj Diospaj shutipi tucui causaipi paipajta rurashpa causachun, cambaj tucui aillu puramanda agllarca.

6Tucui Israel puramanda, cangunapaj maijan pueblopi pai causajushpapashmi, shuj levita runa llujshinga. Paica, Mandaj Dios agllashca pushtuman, tucui shunguhuan shamujushpaca shamuchunlla.

7Chaipica, canda Mandaj Taita Diospaj shutipi, paipaj huauqui levitacuna Diospajta ruranajunshnallata, paipash Mandaj Diospajta rurangallami.

8Micunatapash, caishujcuna japinshnallatami japinga. Taitamanda imagutapash chasquishca jahuami, chashna japinga.

Diosta na rijsijcuna rurashcacunata ama catichunmi, shinlli tacurishca

9Canda Mandaj Taita Dios carashca llactaman yaicushpaca, chai llactapi causajcuna millanayaicunata rurashpa causashcataca, na yachajunachu cangui.

10Canguna purapica, paipaj churita, paipaj ushita cashpapash, rurashcalla diosman carashpa rupachij runaca na tianachu. Shinallata yachaj cangapaj, brujo cangapaj, jipa punlla ima tucunata yachaj cangapaj, yumbu cangapaj yachajuj runapash na tianachu.

11Yumbu canata, yachaj canata, ayacunata mañaj canata, huañushcacunata tapuj canata yachajuj runapash na tianachu.

12Imatapash chashna nalicunata ruranaca, Mandaj Diospaj ñaupajpica millanayaimi. Canda Mandaj Taita Diosca, chai llactapi causajcunataca, chashna millanayaicunata rurashcamandami, cambaj ñaupajmanda llujchinga.

13Canda Mandaj Taita Diospaj ñaupajpica, ima pandatapash na ruranachu cangui.

14Can japigrijuj cai llactapi causajcunaca, brujocunata, yachajcunatami uyashpa causanajun. Ashtahuangarin canda Mandaj Taita Diosca, candaca napacha chaita rurachun saquishcachu.

Taita Diosca, Moisestashnalla shuj villajtami cusha nishcami

15Canda Mandaj Taita Diosca, cangunapaj chaupimandami pai ima nishcata ñucashnalla villachunga, shuj villajta churanga. Paitami, uyana cangui.

16Horeb shuti urcupi tandanajushca punllapi, canda Mandaj Taita Diosta can mañashcashnallatami chashna ruranga. Canga, cashna nishpami mañarcangui: ‘Ñuca ama huañungapaca, ñucata Mandaj Taita Dios rimajtaca, cutinga na uyai ushashachu. Chashna jatun ninataca, na ashtahuan ricungapaj munapanichu’ nijurcanguimi.

17Shinamandami Mandaj Diosca, cashna nihuarca: ‘Paicunaca, chashna nishpaca alitami mañanajun.

18Shinamandami, paicunapaj huauqui purapica, ñuca ima nishcata villaj runata canshnalla villachun churasha. Paimi, tucui ñuca imata villachun mandashcata villajunga.

19Ashtahuangarin ñuca shutipi pai villajujpi, ñuca shimicunata na cazujtaca, imamanda na cazushcatami tapuchisha.

20Ashtahuangarin napash ñuca villachun mandajpita, ñuca shutipi villaj runa, na cashpaca na rijsishca dioscunapaj shutipi villaj runaca, huañuchi tucungami’ nihuarcami.

21Canga, cambaj shungupica cashnami ningui: ‘¿Imashnata Mandaj Dios na villachishca shimi cajtaca yachashunyari?’ ninguimi.

22Mandaj Diospaj shutipi villaj runa villashca na pactajpi, na imapash tucujpimi, Mandaj Dios napash villachijpita villajushcata yachangui. Chai villaj runaca, paipaj yuyaimandalla llujchishpami villajunga. Shina cashcamanda paitaca, na manllanachu cangui.