AMÓS 1 - Quichua Imbabura Bible

Ladolla llactacunataca, fiñashpami llaquichinga

1Cai shimicunaca, israelcuna ima tucunata Tecoa shuti pueblomanda michijpura Amós shuti runa villashca shimicunami. Judá llactataca, jatun mandaj Uzías runami mandajurca. Israel llactataca, Joás shuti runapaj churi Jeroboam shuti runami mandajurca. Alpa mama ninanda chujchungapaca, ishcai huata tiajpillatami,

2cashna villajurca: Sion shuti urcupi tiaj Jerusalenmandami Mandaj Diosca, león huacanshna shinllita caparishpa rimamunga. Michina jihuacunapash, llaquillami ricuringa. Carmelo shuti jahua urcupashmi chaquinga.

3Mandaj Diosca, cashnami nin: “Damasco pueblopi causajcunataca, quimsa juchacunata rurashpapash, chuscu juchata rurashcamanda, llaquichinataca na saquishachu. Paicunaca, Galaad llactapi causajcunataca, trillana jirruhuan trillanshnami tucuchinajurca.

4Shinamandami Hazael shuti runapaj huasipica, ninata japichisha. Chai ninallatami, Ben-adad shuti runa mandashpa tiajuna huasicunatapash, tucuillata rupachinga.

5Damasco pueblopaj jatun pungu aldabacunatapashmi faquisha. Avén shuti pugru pambapi causajcunatapash, Bet-edén shuti llactata mandajcunatapashmi tucuchisha. Siria llactapi causajcunaca, Kir shuti llactamanmi prezu apai tucunga” ninmi Mandaj Diosca.

6Mandaj Diosca, cashnatapashmi nijurca: “Gaza shuti pueblopi causajcunataca, quimsa juchacunata rurashpapash, chuscu juchata rurashcamanda llaquichinataca, napacha saquishachu. Paicunaca, Edom llactapi causajcunaman cungapajmi, shuj pueblopi causajcunataca tucuicunata prezu japinajurca.

7Shinamandami, Gaza shuti pueblo muyundi pircapica, ninata japichisha. Chai ninami, mandashpa tiajuna huasicunatapash, tucuillata rupachinga.

8Asdod shuti pueblopi causajcunatapash, Ascalón pueblopi mandajcunatapashmi tucuchisha. Ecrón shuti pueblopi causajcunatapash, huaquinlla puchushca filisteocunatapash fiñashpa tigrarishpa ñuca maquihuan llaquichijpimi, huañushpa tucuringa” nijurcami Mandaj Jatun Diosca.

9Mandaj Diosca, cashnatapashmi nijurca: “Tiro shuti pueblopi causajcunataca, quimsa juchacunata rurashpapash, chuscu juchata rurashcamanda llaquichinataca, napacha saquishachu. Paicunaca, shuj pueblopi causajcunataca, prezu japishpami, Edom llactapi causajcunaman cunajurca. Huauqui purashna ari nishcataca na yarishpami, chashna ruranajurca.

10Shinamandami, Tiro shuti pueblo muyundi pircapica, ninata japichisha. Chai ninami, mandashpa tiajuna huasicunatapash, tucuillata rupachinga” nijurcami.

11Mandaj Diosca, cashnatapashmi nijurca: “Edom llactapi causajcunataca, quimsa juchacunata rurashpapash, chuscu juchata rurashcamanda llaquichinataca, napacha saquishachu. Paicunapaj huauquicunatallatami catiriashpa, espadahuan huañuchinajurca. Shujcunata juyaj cashcatapash cungashpami, llaquitapash na llaquishpa, shuhuashpa causanajurca. Paicunapaj huauquicunataca, ninandapacha fiñashpami causanajurca.

12Shinamandami Temán shuti llactapica, ninata japichisha. Chai ninami, Bosra shuti pueblopi mandashpa tiajuna huasicunatapash, tucuillata rupachinga” nijurcami.

13Mandaj Diosca, cashnatapashmi nijurca: “Amón llactapi causajcunataca, quimsa juchacunata rurashpapash, chuscu juchata rurashcamanda llaquichinataca, napacha saquishachu. Paicunapaj alpa ashtaca tucuchun yashpami, Galaad llactapi causaj vijsayu huarmicunataca, vijsata liquishpa huañuchinajurca.

14Shinamandami, Rabá shuti pueblo muyundi pircapica, ninata japichisha. Jatun macanajui punllapica culunlla shamushpami, paicuna mandashpa tiajuna huasicunatapash tucuchinga. Ninan huairahuan tamiashnami, tucuillata tucuchinga.

15Paicunata jatun mandajca, pai churashca tucui mandajcunandimi, prezu rijunga” nijurcami Mandaj Diosca.