Psalms 113 - Quichua Imbabura Bible

Taita Diosmi, imagutapash na charijtaca jatarichinMandaj Diosta alicachinguichi.

1Mandaj Diosta servijcuna, paita alicachinguichi.

Mandaj Diospaj shutitami alicachina canguichi.

2Mandaj Diospaj shutica cunanmandapacha,

causaita causaicaman alicachi tucushca cachun.

3Mandaj Diospaj shutica, indi llujshimuj ladomanda,

indi huashajuj ladocaman alicachi tucushca cachun.

4Mandaj Diosca, tucui llactacunapi alicachi tucushcami.

Paipaj punchapambapash, jahua pachapimi tiajun.

5Jahua pachapi tiajuj ñucanchita Mandaj Taita

Dioshuan chimbapurangapaca, ¿pita tiangayari?

6Paimi jahua pachatapash,

cai pachatapash urai ricujun.

7Paimi, imagutapash na charijtaca,

ñutu alpamanda jatarichin.

Imagupash illaj runagutapash, mapata

shitana pushtumandami llujchin.

8Paicunataca, mandajcunahuan tiachingapaj,

pai agllashca gentecunata mandajcunahuan

tiachingapajmi, shina ruran.

9Huahuata na tarij huarmitapash,

paimi familiata charichun saquin.

Shinamandami, huahuacunapaj mama cashpa cushijun.

Mandaj Diosta alicachinguichi.