1 SAMUEL 14 - Quichua Imbabura Bible

1Shuj punllami, cashna tucurca: Saúl runapaj churi Jonatanga, macanajunacunata apashpa purij, paita servij runatami: —Chimbapi cuidanajuj filisteocunahuan macanajungapaj chimbashun— nirca. Chaitaca, paipaj taitaman na villarcachu.

2Saulca, Gabaa shuti urcu chaquipi shayajuj granadilla shuti quiru ladopimi tiajurca. Chai quiruca, Migrón shuti pueblo ladopimi shayajun. Saulhuan tandanajushca runacunaca, sucta patsajshnami carca.

3Ahitob shuti curapaj churi Ahías runami, efod nishcataca apan carca. Ahitob runaca, Icabod shuti runapaj huauquimi carca. Ahitob runaca, Finees shuti runapaj churimi carca. Finees shuti runaca, Elí curapaj churimi carca. Elí runaca, Silo shuti pueblopimi, Mandaj Diosta servin carca. Israelcunaca, Jonatán runa rina cajtaca na yacharcachu.

4Ashtahuangarin filisteocuna cuidanajuj ladoman chayangapaca, Boses shuti, Sene shuti jatun rumi jaca chaupitami, Jonatanga yalina carca.

5Uraman tiaj jaca rumica, Micmas shuti pueblohuan chimba purami tiajun. Vichaiman tiaj rumica, Gabaa pueblohuan chimba purami tiajun.

6Jonatanga, paipaj macanajunacunata apaj runataca, cashnami nirca: —Circuncisión nishcata na rurashcacuna cuidanajuj ladoman jacu, chimbashun. Mandaj Diosca, ñucanchita ayudangapashchari. Mandaj Diospaca, imapash na shinllichu. Ashtaca cajpipash, ashalla cajpipash, paica quishpichi ushanllami— nircami.

7Shina nijpimi, paipaj macanajunacunata apaj runaca, cashna nirca: —Cambaj shungupi tucui yarishcata rurailla. Ñucapash, can imata rurangapaj munashcata rurashpa ayudangapaca, caipimi cani— nircami.

8Shina nijpimi Jonatanga, cashna nijurca: —Ricui, chimbaman chai runacunapajman yalishun. Shina yalishpami, chai runacunapajpi ricurishun.

9Shina ricurijpi paicuna: ‘Ñucanchi cangunapajman uriajungacaman shuyaichi’ nijpica, paicunapajman na vichai rishpa, chaipillata shuyashunllami.

10Ashtahuangarin: ‘Ñucanchipajman vichai shamuichilla’ nijpica, paicunapajman vichai rishunllami. Paicuna ñucanchita chashna nijpica, ñucanchi maquipi Mandaj Dios churashcata ricuchinami canga— nijurcami.

11Chai jipami, cuidaj filisteo soldadocunapajpi ishcandi ricurirca. Chaita ricushpami filisteocunaca: “Ricuichi, chai hebreocunaca, paicuna pacajushca jatun utujucunamanda, ñami llujshinajun” ninajurca.

12Chai jipami, cuidaj filisteocunaca Jonatandapash, paipaj macanajunacunata apaj runatapash, cashna ninajurca: —Caiman ñucanchipajman, vichai shamuichilla. Ñucanchimi, cangunaman shuj villanata charinchi— ninajurca. Chashna ninajujpimi Jonatanga, paipaj macanajunacunata apaj runataca: —Ñuca huashata vichai catimuilla. Mandaj Diosca, israelcunapaj maquipimi churashca— nirca.

13Shina nishpallami Jonatanga, llucashpalla vichai rijurca. Paipaj macanajunacunata apaj runapash, paipaj huashatami vichai catijurca. Filisteocunahuan macanajushpa Jonatán urmachijpica, paipaj macanajunacunata apashpa huashata catij runami, huañuchishpa catijurca.

14Chashnami, cai punda macanajuipica Jonatanhuan, paipaj macanajunacunata apaj runahuanga, ishcai chungashna filisteocunata ashatalla catishpa huañuchirca.

15Chaimandami carpacunapi tiajcunapash, canllaman shayajcunapash ninanda manllarinajurca. Cuidaj tucui soldado puracunapash, shuhuangapaj rishca soldadocunapashmi ninanda manllarinajurca. Alpa mamapash chujchujpimi, imata ruraitapash na ushanajurca.

16Saúl chapachun churashca soldadocunaca, chai ashtaca gentecunataca imata ruraitapash na ushashpami, caiman chaiman calparianajurca. Chashna llaquinayaita tucuchi tucushcatami, Benjamín llactapi tiaj Gabaa pueblomanda ricunajurca.

17Shinamandami Saulca, paihuan chaipi tianajuj soldadocunataca: —Ali ricuichi, ñucanchi puramandaca maijanda rishca— nirca. Shina nijpi, tucuillacunata ali ricujpica, Jonatanhuan paipaj macanajunata apaj runahuanllami illarca.

18Shina cajpimi Saulca, Ahías shuti curataca: —Taita Diospaj arcata caiman apamui— nirca. Chai punllacunapica, Taita Diospaj arcataca israelcunami charinajurca.

19Ahías shuti curahuan, Saulhuan parlanajujpillatami, cashna tucurca: Filisteocunapaj carpacunapica, ashtahuan ashtahuan ninandapacha caparinajujmi uyarirca. Chaimandami Saulca, chai curataca: —Shuyailla, ama apamuichu— nirca.

20Saulca, paipaj tucuilla soldadocunata tandachishpami, macanajuna pambaman chayagrirca. Chaipimi, filisteocunaca ninandapacha musparishpa, tucuicuna cumba purallata espadahuan huañuchirinajurca.

21Shinallata huaquin hebreocunaca, pundamandapacha filisteocunahuan causashpami, paicunapash tandanajushpa llujshimushca carca. Ashtahuangarin paicunapash Saulpaj, Jonatanbaj, Israel soldadocunahuanmi tandanajurca.

22Shinallata Efraín shuti urcupi pacajushca tianajuj tucui israelcunaca, filisteocuna pacajushpa calpanajujta uyashpami, paicunapash catishpa macanajungapaj rinajurca.

23Chashnami Mandaj Diosca, chai punllapica israelcunataca quishpichirca. Bet-avén shuti pueblocamanmi, macanajushpaca chayagrirca.

24Ashtahuangarin chai punllapica, musparina llaquipimi Israel runacunaca churai tucurca. Saulca, tucui gentecunatami cashna nishpa juramentuchishca carca: “Nara tutayajpillata, ñucata fiñajcunataca, paicuna imashna llaquichishcashnallata, paicunatapash ñuca nara llaquichijpillata, maijan cashpapash imatapash micushpaca, ninandami llaquichi tucunga” nishcami carca. Shina nishcamandami, tucuicuna imatallapash na micunajurca.

25Chai jipami, shuj bosqueman tucuicuna chayagrirca. Chaipica, tucui pambapimi balun mishqui tiarca.

26Chai bosque ucuman tucuicuna yaicushpami, balun mishquica ashtacapacha tiajta ricunajurca. Shina ricushpapash, pacta micunguichiman nishpa juramentuchishcata manllashpami, ashatallapash na shimipi churanajurca.

27Ashtahuangarin Jonatanga, tucuicunata paipaj taita juramentuchijtaca, na uyashcachu carca. Chaimandami pai charijushca caspi pundataca, chai mishqui shinlliyashcapi mutiyachishpa malirca. Shina malishpami, juizu japirca.

28Chashna rurajpimi paicuna puramanda shuj runaca, cashna nirca: —Cambaj taitami, soldadocunata cashna nishpa juramentuchirca: ‘Maijan runapash cunan micushpaca, llaquichi tucungapachami’ nirca. Chaimandami, soldadocunaca ña huañunalla tucunajunchi— nircami.

29Shina nijpimi Jonatanga, cashna nirca: —Ñuca taitaca, cai llactapi causajcunataca pandachishcami. Ricuichi, cunanga cai balun mishquita ashaguta malijpillami, ñuca ñavipash ashtahuan pascarin.

30Paicunata fiñajcunata imatalla quichumushcacunata micuchun gentecunata cunan saquishcalla cajpicarin, ¿nachu filisteocunataca ashtahuan llaquichinchiman carca?— nircami.

31Chai punllapica, Micmas shuti pueblomanda Ajalón shuti pueblocaman catishpami, filisteocunataca chugrichishpa huañuchinajurca. Ashtahuangarin soldadocunaca, ninandapacha shaijushcacunami carca.

32Chaimandami soldadocunaca, chai quichumushcacunata japingapaj calpanajurca. Paicunaca llamacunata, huarmi huagracunata, shicucunata japishpa alpapi shitashpami, cungata muchushpa huañuchishpa, yahuarndi micunajurca.

33Chaita ricushpami, cashna nishpa Saulman villanajurca: —Gentecunaca, aichata yahuarndi micushpami, Mandaj Diosta na cazushpa juchata ruranajun— nishpami villanajurca. Shina villajpimi Saulca, cashna nirca: —Cangunaca, yachashpatami na cazushcanguichi. Shuj jatun rumita t'angashpa, caiman apamuichi— nircami.

34Paica cashnatapashmi nirca: —Caita chaita rishpa, cashna nishpa villaichi: ‘Tucuicuna cangunapaj huagrata, llamata caiman apamushpa, cungata muchushpa huañuchishpa micuichi. Mandaj Diosta na cazushpa, aichata yahuarndi micushpaca, juchata na ruranachu canguichi nijunmi’ nigrichi— nircami. Shina nijpimi tucui gentecunaca, chai tutallata paicunapaj huagrata apamushpa, cungata muchushpa huañuchinajurca.

35Shinallata Saulca, Mandaj Diosmanmi shuj altarta rurachirca. Paica chai altartami, Mandaj Diosman punda rurashpa callarirca.

36Chai jipami, Saulca cashna nirca: —Filisteocunahuan macanajungapaca, tuta urai rishpami, pacaringacaman tucuillata huañuchishpa, paicuna imatalla charishcatapash quichumushunchi— nircami. Shina nijpimi paicunaca: —Cambi ima ali cana cajpipash, chaita rurailla— ninajurca. Chashna ninajujpimi, shuj curaguca: —Taita Diospajman quimirishpa, caipillata tapushunchi— nirca.

37Shina nijpimi Saulca, Taita Diosta cashna nishpa tapurca: —¿Filisteocunata catishpa, urai rinallachu capanchi? ¿Paicunataca, ñucanchi israelcunapaj maquipi churagringuichu?— nishpami tapurca. Shina tapujpipash chai punllapica, Mandaj Diosca imatallapash na tigrachircachu.

38Chaimandami Saulca, cashna nirca: —Soldadocunata tucui mandajcuna, caiman tandanajumuichi. Maijan ima juchata cunan rurashcatapash, tapuchishpa yachaichi.

39Israelcunata quishpichij Mandaj Diosca causajumbachami. Ñuca churi Jonatán nalita rurashca cajpipash, huañungapachami ninimi— nircami. Shina nijpica, chai tucui gentecunamandaca, maijanllapash na imatapash nircachu.

40Chaimandami Saulca, tucui israelcunata cashna nirca: —Cangunaca, shuj ladoman shayarichi. Ñucahuan, ñuca churi Jonatanhuanga, caishuj ladoman shayarishun— nijpimi gentecunaca, Saultaca: —Cambi ima ali cana cajpipash, chaita rurailla— ninajurca.

41Shina nijpimi Saulca, israelcunata Mandaj Taita Diostaca cashna nirca: —Suerteta rurajpica, chashnapacha cajta ricuchipangui— nijpimi, suerteta rurajpica Jonatanbajpi, Saulpajpi urmarca. Shina urmajpimi gentecunaca, ima llaquitapash na apana carca.

42Chai jipami, Saulca: —Ñucahuan, ñuca churi Jonatanhuan, suerteta ruraichi— nirca. Shina rurajpimi suerteca, Jonatanbajpi urmarca.

43Chaimandami Saulca, Jonatandaca: —¿Imatata rurarcangui? Villahuai— nirca. Shina nijpimi Jonatanga, cashna nishpa villarca: —Ari, ñuca apamushca caspi pundahuanmi, balun mishquita ashaguta malircani. ¿Chaimandallachu huañuna capani?— nircami.

44Shina nijpimi Saulca, cashna nirca: —Taita Diosca, chashna llaquichishca jahuapash, ashtahuan llaquichihuachunlla. Jonatán, canga huañunapachami cangui— nirca.

45Shina nijpimi Saultaca, gentecuna cashna ninajurca: —¿Cashna jatun quishpirinata israelcunaman rurashca Jonatanga huañungachu? Napacha chashna cangachu. Mandaj Diospash causajumbachami. Paipaj umamandaca, shuj ajchallapash na alpapi urmangachu. Cunanga, paica Taita Dios ayudajpimi, macanajuitaca chashna misharca— nishpami, Jonatanda huañuchinataca saquichinajurca.

46Chaimandami Saulca, filisteocunata catishpa rinataca saquirca. Filisteocunapash, paicunapaj llactamanmi tigranajurca.

47Israel llactapaj jatun mandaj tucushca jipami Saulca, muyundi llactacunapi causaj tucuilla paita fiñajcunahuan macanajurca. Moab, Amón, Edom shuti llactacunapi causajcunatapash, Soba llactata jatun mandajcunatapash, filisteocunatapash macanajushpami misharca. Maiman rishpapash, paica mishajujllami carca.

48Shinallata ashtaca soldadocunata tandachishpami, amalecitacunataca macanajushpa misharca. Chashnami, israelcunataca paicuna imatalla charishcacunata quichushpa apajcunapaj maquimandaca llujchirca.

49Saulpaj churicunaca: Jonatán, Isúi, Malquisúa shuticunami carca. Shinallata paipaj ishcai ushicunaca, punda ushica Merab shuti, jipa ushica Mical shutimi carca.

50Saulpaj huarmica, Ahinoam shutimi carca. Paica, Ahimaas shuti runapaj ushimi carca. Saulpaj soldadocunata mandajca, Abner shutimi carca. Paica, Ner shuti runapaj churimi carca. Ner shuti runaca, Saulpaj taitapaj huauquimi carca.

51Saulpaj taita Cis shuti runapash, Abner shuti runapaj taita Ner shuti runapash, Abiel shuti runapaj churicunami carca.

52Saúl causajui tucui huatacunapimi filisteocunahuanga, ninandapacha macanajushpa causanajurca. Chaimandami Saulca, ninan shinlli, macanajunata ali yachaj runacuna cajta ricushpaca, paipaj soldadocuna cachun tandachijlla carca. Diosta na cazujpimi, Saúl mandajushcamandaca llujchishca