NÚMEROS 6 - Quichua Imbabura Bible

Nazareo tucushpaca, imatalla ruranatami villajun

1Mandaj Diosca, Moisestaca cashnami nijurca:

2“Israelcunaman, cashna nishpa villangui: ‘Maijan jari cashpa, huarmi cashpapash, nazareo tucushpa shicanyashpa, Mandaj Diosta servishapacha nishpaca,

3vinota, sidrata na ufiangachu. Vinomanda, sidramanda rurashca vinagretapash, uvasta cutashpa llujchishca ima ufianacunatapash na ufiangachu. Shinallata chaira pallashca uvastapash, chaquichishca uvastapash na micungachu.

4Nazareo tucushca punllacunapica, uvasmanda rurashcacunataca, imatallapash na micungachu. Muyutapash, caratapash na micungachu.

5Nazareo tucushapachami nishca tucui punllacunapica, ajchatapash na rutuchingachu. Mandaj Diospajlla shicanyashca punllacuna pactangacamanmi, Diospajlla causanga. Shinallata ajchatapash, viñachun saquingallami.

6Mandaj Diospajlla shicanyashca tucuilla punllacunapica, huañushcapajmambash na quimiringachu.

7Paipaj taita cajpipash, paipaj mama cajpipash, paipaj huauqui cajpipash, paipaj pani huañujpipash, ama mapayangapaca na quimiringachu. Taita Diospajlla shicanyashcataca, paipaj uma ajchami ricuchijunga.

8Nazareo tucushca punllacunapica, Mandaj Diospajlla shicanyashcami canga.

9Maijan cashpapash, paipaj ladopi ñapash cungashcapi huañujpica, Diospajlla tucushcata ricuchijuj paipaj uma ajchaca mapami tucunga. Shinamandami pai armana punllapica, paipaj ajchata rutuchinga. Canchis punllapimi, ajchata rutuchinga.

10Pusaj punllapica, ishcai urpita, na cashpaca ishcai palomata apamushpami, Dioshuan tuparina jatun carpa pungupi curaman cunga.

11Chai animalcunataca curallatami, shujtaca juchamanda Diosman cujunga. Caishujtaca, Diosman cushpami tucuillata rupachijunga. Chai huañushcapi tacarishca juchamanda Diosman cushpami, chai punllapica paipaj ajchataca, cutin Diospajlla tucushcata ricuchishpa viñachijunga.

12Chai jipaca, cutinmi Mandaj Diospajlla tucushpa nazareo tucunga. Diosta cutin servi callaringapaca, shuj huatata charij jari llamatami, juchamanda Mandaj Diosman cunga. Nazareo tucushcata mapayashcamandaca, punda punllacunapi, Diosta servishcapash yangami quedanga.

13Nazareo tucushpa Diospajlla shicanyachishca punllacuna pactajpica, chai nazareo runaca, cai mandashcatami rurana: Dioshuan tuparina jatun carpa pungumanmi shamunga.

14Chaipica, shuj huatata charij, imapash na tucushca maltun llamatami, Mandaj Diosman cushpa tucuillata rupachinga. Shinallata shuj huatata charij, imapash na tucushca malta llamatami, juchamanda cunga. Dioshuan ali cangapaca, imapash na tucushca jari llamatami cunga.

15Shinallata ashtahuan ali jacuta aceitehuan chapushpa masashcatapashmi, levadura illaj mishqui tandata rurashpa, canastapi apamunga. Levadura illaj rurashca tortillacunatapash, aceitehuan javishpami apamunga. Chai caranacunataca, talina vinohuanmi apamunga.

16Juchamanda cushcatapash, animalta Diosman cushpa tucuillata rupachinatapash, curami Mandaj Diospaj ñaupajpi cunga.

17Mandaj Dioshuan ali cangapaj carashca jari llamataca, levadura illaj tandacunata churashca canastahuanmi Diosman cunga. Shinallata curallatami, Diosman imatalla caranatapash, talina vinotapash Diosman cunga.

18Chai jipami, nazareo tucushpa Diospajlla shicanyarishca runaca, Diospajlla viñachishca ajchataca, Dioshuan tuparina jatun carpa pungupi rutuchinga. Chai ajchata japishpami, Dioshuan ali cangapaj Diosman carashcata rupachijuj nina jahuapi churashpa rupachinga.

19Chai jipami, jari llamapaj rigra aicha yanushcatapash, canastamanda levadura illaj shuj mishqui tandatapash, levadura illaj shuj tortillatapash curallata japishpa, nazareo runapaj maquipi churanga. Diospajlla viñachishca ajchata rutuchishca jipami, chashna churanga.

20Chaicunataca, curami Mandaj Diospaj ñaupajpi vichai cuyuchishpa, Diosman cunga. Chaicunaca, Diospajlla shicanyachishca cashcamandami, curapajlla canga. Shinallata Diospaj ñaupajpi vichai cuyuchishpa, paiman cushca pecho aichapash, rigra aichapash curapajllami canga. Chai jipami nazareo runaca, vinota ufiai ushanga.

21Nazareo tucushcamanda, Mandaj Diosman imagutapash carashapachami nishcata, nazareocuna carachun mandashcacunaca chaicunami. Ashtahuan imaguta carai ushashpapash caranallami. Diosman imagutapash carashapachami nishcashnallatami, chashnatapacha pactachinga. Nazareo tucushpa imashna cachun mandashcashnallatami pactachinga’ nishpa villangui” nijurcami.

Israelcunata bendiciachunga, curacunatami mandashca

22Mandaj Diosca, Moisestaca cashnami nijurca:

23“Aaronmambash, paipaj churicunamambash, cashna nishpa villangui: Israelcunataca, cashna nishpa bendicianguichi:

24‘Mandaj Diosca, canda bendiciapachun,

paillata candaca huacaichipachun.

25Mandaj Diosca, candaca paipaj ñavihuan

punchayachipachun, paillata candaca llaquipachun.

26Mandaj Diosca, canda ricupachun.

Paillata canman casilla ali causaita cupachun’

ninguichi, nishpa villangui.

27Ñuca shutipi israelcunata bendiciajpimi, ñucapash paicunataca bendiciasha” nijurcami.