ISAÍAS 54 - Quichua Imbabura Bible

Mandaj Diosca, israelcunataca causaita causaicamanmi juyan

1Vijsayu tucunatapash, huahuata ungunatapash na yachaj huarmilla, cushijuyari. Ima horallapash huahuata na unguj huarmilla, jatun cushijuihuan caparishpa candayari. Cusa jichushca huarmirami, cusayu huarmitapash yali ashtahuan huahuacunata charigrin” ninmi Mandaj Diosca.

2Cambaj carpataca, ashtahuan jatunda shayachiyari. Can causana ucu muyundi telacunatapash, ashtahuan caruta churayari. Ama chashna quichijipi causaichu. Huascacunatapash, ashtahuan largota churayari. Carpa estacacunatapash, ashtahuan shinllita pambayari.

3Cambaj miraicunaca ali ladomambash, lluqui ladomambashmi jundanga. Paicunami, ashtaca llactacunata japishpa, llaquinayaita tucuchishca sirijuj pueblocunapipash causanajunga.

4Ama manllaichu, na pandachi tucunguichu. Ama pingai tucuichu, candaca na rimashpa pingaichingachu. Ashtahuangarin chairalla viñai huarmi cajpillata, cusa jichushcamanda pingai tucushcataca cunganguimi. Cusa illaj cashcamanda, rimajpi pingai tucushpa causajushcatapash, na ashtahuan yaringuichu.

5Canman causaita cuj Diosmi, cambaj cusa. Paica, tucuita Mandaj Dios shutimi. Canda Quishpichijca, israelcunapaj jucha illaj Diosmi. Paica, tucui cai pachapi causajcunapaj Taita Dios ni tucushcami canga.

6Candaca, cusa jichujpi, shungupi llaquilla causajuj huarmitashnami, Mandaj Diosca cayarca. Chairalla viñai huarmi cajpillata, cusa jichushca huarmitashnami, cambaj Taita Diosca cashna nijurca:

7“Huaquin punllatallami, candaca jichurcani. Shinamandami ninandapacha llaquishpa, candaca cutin pushamugrini.

8Ñucaca, ashata fiñarishca cashpami, canda ama ricungapaj asha punllacunacamanlla ñuca ñavita pacarcani. Shina cashpapash, causaita causaicaman llaquishpami, candaca juyasha. Canda Quishpichij Mandaj Dios ñucami, chashna nini.

9Noé shuti runa causajui punllacunapica: ‘Cai pachataca, napacha cutinga yacuhuan chingachishachu’ nishpami juramenturcani. Chashnallatami canhuambash: ‘Cutinga na fiñarishachu. Cutinga candaca, na rimashachu’ nishpa juramentuni.

10Urcucunaca cuyuringami, lomacunapash chujchungami. Shina cajpipash, canda llaquinaca napacha ñucamanda anchuringachu. Canman casilla ali causaita carashapacha nishcatapash, napacha yangapi churashachu. Canda llaquij, Mandaj Dios ñucami chashna nini.

11Canga, huairahuan tamia llaquichijpishnami, pipash na cushichijpi, llaquinayaita causajungui. Ricui, shina cajpipash ñucami candaca, ucuman callari rumicunata churashpa, carbunclo nishca rumicunata churashpa shayachigrini. Pircai callaringapaca, zafiro nishca rumicunatami churasha.

12Cambaj ventanacunataca, juyailla rumicunahuanmi rurasha. Cambaj pungucunatapash, carbunclo rumicunahuanmi rurasha. Cambaj muyundi tucuilla jatun pircataca, juyailla rumicunahuanmi shayachisha.

13Tucuilla cambaj huahuacunataca, Mandaj Dios ñucami yachachisha. Cambaj churicunaca, ashtahuan ashtahuanmi casilla ali causaita japinajunga.

14Imatapash cashcatapacha rurashpami, juyailla charijushcashna cangui. Canga, llaquichishpa churajcunamandapash carupimi cangui. Ima llaqui japina manllaipash illajmi causangui. Pipash na candaca, llaquichingapaj quimiringachu.

15Canda llaquichingapaj maijambash pacalla parlarishpa jatarijcunaca, na ñuca mandajpi chashna rurangachu. Canda llaquichingapaj pacalla jatarijcunaca, cambaj ñaupajpimi urmanga.

16Ricui, ninata fucuchishpa jirruta rupajyachishpa, imamambash tigrachij runataca, ñucami rurarcani. Chaimandami, imata rurangapajpash jerramentacunata ruranlla. Imata tucuchijuchumbash ñucallatami, tucuchij runataca rurarcani.

17Maijan shinlli macanajunacunahuan shayarishpapash, candaca pipash na mishangachu. Canda llaquichingapaj juchachijtapash, canrami llaquipi churangui. Mandaj Dios ñucata servijcuna japinaca, chashnami canga. Paicunapaj quishpirinaca, ñucapajmandami shamunga” nijurcami Mandaj Diosca.