JUECES 16 - Quichua Imbabura Bible

1Shuj punllami Sansón shuti runaca, Gaza shuti puebloman rirca. Chaipimi, culquimanda huainayaj shuj huarmita ricushpa, chai huarmipi chayarca.

2Chaitami, Gaza shuti pueblopi causajcunaman: “Sansón runaca, caiman shamushcami” nishpa villanajurca. Chaimandami, tucui muyundipi cuidashpa, chai pueblo pungupipash, tucui tuta pacalla chapanajurca. Paicunaca: “Caya punllayangacaman shuyapashunchilla. Caya punllayajpi, huañuchishunllami” nishpami, tucui chai tutaca upalla shuyanajurca.

3Ashtahuangarin Sansón runaca, chaupi tutacamanllami puñurca. Chaupi tuta jatarishpami, chai pueblo pungutaca, chai pungupi charijuj ishcandi pilarcunandi, pungupi quingraiman churashca jirrundi llujchirca. Shina llujchishpaca, rigra jahuapi churashpami, Hebrón shuti pueblo chimbapura urcuman apashpa, vichai rirca. Sansón shuti runamandapash, Dalila shuti huarmimandapashmi villajun

4Chai jipami, cashna tucurca: Sansón runaca, Sorec shuti pugru pambapi causajuj shuj huarmitami munarca. Paica, Dalila shutimi carca.

5Chaimandami filisteocunata mandajcunaca, chai Dalila shuti huarmipajman shamushpa, cashna ninajurca: —Sansón runataca, imashpa ninan shinlli cajtapash, paita imashna mishai ushanatapash, umachishpalla tapui. Chaita yachashpaca, paitaca ali huatashpa, mandashpa charishunllami. Chashna tapujpica, tucuicunami chunga ishcai kilo yalita pezaj culquita canman cushun— ninajurcami.

6Shina nijpimi Dalila shuti huarmica, Sansón runataca cashna nirca: —Canga, ¿imashpata ninan shinlli cangui? Canda mandashpa charingapaca, ¿imashnata candaca huatana capan? Chaita villahuai nipanimi— nircami.

7Shina nijpimi Sansón runaca, cashna nishpa tigrachirca: —Nara chaquishca canchis mushuj angucunahuan huatajpica, imata ruraitapash na ushashpa, caishuj runacunashnallatami tucusha— nircami.

8Chaita villajpimi, filisteocunata mandajcunaca nara chaquishca canchis mushuj angucunata paiman cunajurca. Chai angucunahuanmi chai huarmica, Sansón runataca huatarca.

9Dalila huarmica, tauca runacunatami shuj ucupi pacashpa charijurca. Chaimandami chai huarmica: —¡Sansón, filisteocunami canda japingapaj shamunajun!— nishpa caparirca. Shina caparijpimi Sansón runaca, paita huatashca angucunataca, ujsha jupa cauchushcata nina rupachijpishna fitirca. Shina fitijpimi paitaca, imashpa ninan shinlli cajtapash, na yachai usharca.

10Chaimandami Dalila shuti huarmica, Sansón runataca cashna nirca: —Ricui, canga umachihuashcanguimi, llullashpami villahuashcangui. Cunanga, canda imashna huatai ushanata villahuayari nipanimi— nircami.

11Shina nijpimi Sansón runaca, cashna nirca: —Nara huatashca mushuj huascacunahuan shinllita huatajpica, imata ruraitapash na ushashpa, caishuj runacunashnallatami tucusha— nircami.

12Shina nijpimi Dalila huarmica, mushuj huascacunata japishpa, chaicunahuan huatashpaca: —¡Sansón, filisteocunami canda japingapaj shamunajun!— nishpa caparirca. Shuj ucupimi, tauca runacuna pacalla chapanajurca. Ashtahuangarin paica, paipaj maquita huatashcacunataca, jamzi puchatashnami fitirca.

13Dalila huarmica, cutinmi Sansón runataca cashna nirca: —Cunangaman llullashpallami, umachishpa charihuangui. Cunanga, canda imashna huatai ushanata villahuai— nircami. Shina nijpimi Sansón runaca, cashna nirca: —Ñuca ajchataca, ahuashca telahuan canchis shambacunata rurashpami, estacapi ali huatana cangui— nircami.

14Shina nijpimi Dalila huarmica, Sansón puñujujpi estacapi ali huatarca. Shina huatashpallami: —¡Sansón, filisteocunami canda japingapaj shamunajun!— nishpa caparirca. Ashtahuangarin Sansón runaca puñujushcamanda rijcharishpami, telar estacataca ahuashca telandi llujchishpa jatarirca.

15Chashna rurajpimi Dalila huarmica, cashna nirca: —¿Imashpata ñucataca, cambaj shunguca napash ñucahuan cajpita, juyanimi nihuangui? Ñami quimsacaman umachihuangui. Shinamandami, imashpa ninan shinlli cajtapash, cangunaman nara villahuangui— nircami.

16Villahuai nishpa, punllandi chai huarmi fiñachijujpillatami, cashna tucurca: Sansón runaca, paipaj tucui almahuanmi huañungashna ninanda llaquirijurca.

17Chaimandami Sansón runaca, paipaj shungupi tucui yachashcata villashpa, cashna nirca: —Ñucaca, mamapaj vijsamandapachami Taita Dios agllashca nazareo cani. Chaimandami, ñuca ajchataca ima horapash na muchuhuashca. Ñuca ajchata muchujpica, ñucamanda ushai anchurijpimi, imata ruraitapash na ushashpa, caishuj runacunashnallata tucusha— nircami.

18Sansón runapaj shungupilla tucui yachashcata, paiman ña villashcata yachashpami, Dalila huarmica filisteocunata mandajcunata, cashna nishpa cayachun cacharca: —Cunangarimbash shamuichilla. Sansón runaca, paipaj shungupi tucui yachashcatami villahuarca— nircami. Shina villajpimi filisteocunata mandajcunaca, Dalila huarmiman culquita apashpa shamunajurca.

19Chaimandami Dalila huarmica, Sansón runataca paipaj migllapi puñuchirca. Shina puñuchishpami, shuj runata cayarca. Chai runami, Sansón runapaj umamanda canchis shambacunataca muchurca. Shina muchujpi paipaj ushai anchurijpimi, chai huarmica Sansón runata llaquichi callarirca.

20Paitaca cashnami nirca: —¡Sansón, filisteocunami canda japingapaj shamunajun!— nishpami caparirca. Shina caparijpi puñujushcamanda Sansón rijcharishpami, cunambash pundashnallata quishpirishallami yashpa jatarirca. Ashtahuangarin Mandaj Dios paimanda ña anchurishcataca, na yacharcachu.

21Filisteocuna paita japishpaca, ñavita surcushpami, Gaza shuti puebloman aparca. Chai pueblopimi cadenacunahuan huatashpa, prezuna huasi ucupi tiaj molinopi cutachun churarca.

22Sansón runapaj ajchata muchushca jipaca, cutinmi viñai callarirca. Sansón shuti runa huañushcatami villajun

23Sansón runata mishashcamandami, filisteocunata mandajcunaca, Dagón shuti paicunapaj diosman animalcunata carashpa huañuchishpa cushijungapaj tandanajurca. Paicunaca: “Ñucanchi diosmi, ñucanchita fiñaj Sansón runataca, ñucanchi maquipi churashca” ninajurcami.

24Chaita ricushpami gentecunaca, paicunapaj diosta alicachishpa, cashna ninajurca: “Ñucanchi diosmi ñucanchita fiñashpa, ñucanchi chagracunata tucuchij runataca, ñucanchi maquipi churashca. Ñucanchi purataca, ashtacacunatami huañuchirca” ninajurcami.

25Chai jipami, cashna tucurca: Paicunapaj shungupi ninanda cushijunajushpami: “Pugllashpa asishpa cushijungapaj, Sansón runata cayamuichi” ninajurca. Shina nijpimi Sansón runataca, prezuna ucumanda pusharca. Paica, filisteocunapaj ñaupajpica paicuna pugllangapajllami carca. Paitaca, pilar chaupicunapimi churarca.

26Chaimandami Sansón runaca, paita maquimanda aisashpa pushajuj chairalla viñai huambrataca, cashna nirca: —Cai huasita charijuj pilar ladocunaman pushashpa, chaicunapi taunaringapaj ñuca maquihuan tacachihuai— nircami.

27Chai huasipica jaricunapash, huarmicunapash jundami carca. Filisteocunata tucui mandajcunapashmi, chaipi carca. Huasi jahua patiopipash, quimsa huarangashna jaricuna, huarmicunami, Sansón runata asinajujta ricungapaj rishca tianajurca.

28Chaimandami Sansón runaca, Mandaj Diosta caparishpa mañashpa cashna nirca: “Mandaj Jatun Dioslla, cunanga ñucata yarihuayari. Taita Dioslla, ñuca ishcandi ñavita filisteocuna surcushcamanda, paicunatapash tucuillata llaquichingapajmi, cunangulla shinllichihuai nishpa ninanda mañajupani” nijurcami.

29Shina mañashpaca, chai huasita charijuj ishcandi pilar chaupipimi, lluqui maquitaca shuj pilarpi, ali lado maquitaca caishuj pilarpi huarcurishpa shinlli charirirca.

30Chaipi charirishpami, Sansón runaca: “Filisteocunahuanmi huañugrini” nishpa caparirca. Shina caparishpa, tucui ushaihuan chai ishcai pilarcunata t'angajpimi chai huasica, filisteocunata mandajcunatapash, chaipi tianajuj tucui gentecunatapash llapishpa urmarca. Sansón chaipi huañushpaca, pai causashpa huañuchishcatapash yali ashtaca gentecunatami huañuchirca.

31Chai jipaca, Sansón runapaj huauquicunapash, paipaj taitapaj tucui huasi ucu purapash urai rishpami, paitaca aparca. Paita apashpaca, Zora shuti pueblohuan, Estaol shuti pueblohuan chaupipimi, paipaj taita Manoa shuti runata pambashca utuju ladopi pambarca. Sansón runaca, ishcai chunga huatatami israelcunataca mandajurca. Micaía shuti runaca, imamambash rijchaj dioscunapajmi, shuj curata churashca