ISAÍAS 39 - Quichua Imbabura Bible

Babilonia shuti llactamanda cachamushcacunatami, Ezequías shuti runaca chasquishca(2 Rey. 20:12-19; 2 Crón. 32:27-31)

1Chai huatacunallatami, Babilonia llactata jatun mandaj Baladán shuti runapaj churi Merodac-baladán shuti runaca, Ezequías shuti runa nanaihuan huañunalla cashcamanda, ña ali tucushcata yacharca. Chaita yachashpami cartacunatapash, ashtahuan shuj caranacunatapash cachamurca.

2Chai saquij shamujcunahuanmi Ezequías shuti runaca, ninanda cushijujurca. Chai jipami, ninan valishcacunata alichina paipaj huasipi tiashcata, culquita, orota, mishquilla ashnajuj jambicunata, ninan valishca aceitecunatapash ricuchijurca. Shinallata macanajunacunata alichishca huasitapash, ima juyaillacunata alichishca ucucunatapashmi ricuchijurca. Ezequiasca imatallapash na pacashpami, paipaj huasipi pai mandajuj tucui llactacunapi tucui imalla tiashcata ricuchijurca.

3Chai jipami, Dios ima nishcata villaj Isaiasca, jatun mandaj Ezequiaspajman shamushpa cashna nirca:

—Cai runacunaca, ¿imatata nirca? ¿Paicunaca, maimandata cambajman shamushca?— nircami.

Shina nijpimi, Ezequías runaca:

—Paicunaca, Babilonia caru llactamandami ñucapajman shamushca— nirca.

4Shina nijpimi, Isaiasca:

—¿Cambaj huasipica, imatallata ricurca?— nirca.

Shina nijpimi Ezequías runaca, cashna nirca:

—Ñuca huasipi tucui imalla tiashcatami ricunajurca. Ima tiashcacunata alichishca huasipica, imatallapash na pacashpami ricuchircani— nircami.

5Shina nijpimi Isaiasca, Ezequiastaca cashna nirca:

—Tucuita Mandaj Dios rimashcata uyai:

6‘Ricui, cambaj huasipi tucui ima tiashcatapash, cambaj ñaupa taitacuna tucui imatalla alichishcacuna cunangaman tiashcatapash, Babilonia llactaman apana punllacunami chayamujun. Imatallapash na saquishpami apanga’ ninmi Mandaj Diosca.

7‘Can charishca cambaj churicunatapashmi apanajunga. Paicunaca, Babilonia llactata jatun mandaj mandashpa tiajuna huasipi, eunuco nishca runacuna tucushpami causanajunga’ ninmi— nircami.

8Shina nijpimi Ezequiasca, Isaiastaca cashna nirca:

—Mandaj Dios rimashca shimicunata, ñucaman can villashcapash alimi capan— nircami.

Shinallata cashnatapashmi nirca:

—Ñuca causajui punllacunallapash, ima llaquipash na japishpa, casilla ali causaigu tiapachun— nircami.