ROMANOS 12 - Quichua Imbabura Bible

Crijcuna imashna causanatami villajun

1Huauquicuna, panicuna, Taita Dios ninanda llaquishcamandami, cashna rurapanguichi nini: Cangunapaj cuerpotaca, animalta Diosman caranshna cangunapaj tucui causaita cushpami, paipajlla causashpa Taita Diosta cushichina canguichi. Shina causanami, Diosta yarishpa causanaca.

2Na cai pachapajtalla rurashpa cushijushpa causanachu canguichi. Ashtahuangarin cangunapaj yuyaita Dios mushujyachishcamandami, mushujta causana canguichi. Shina causashpami, imami Taita Diospaj munai cajta, paita cushichinata, ima pandatapash na rurashpa causanata yachanguichi.

3Cutimbashmi nini: Dios ñucaman ninan juyaita carashcamandami, tucui canguna yachajuchun villajuni. Na cangunapaj munailla alicachirishpa, jariyanachu canguichi. Ashtahuangarin crinataca, Taita Dios ricushpa tucuicunaman chaupishpa carashcashnami, aliguta yarishpa tucuicuna causana canguichi.

4Ñucanchi shujlla cuerpopica, imatapash ashtacatami charinchi. Shina cashpapash na tucuilla shujllata ruranllu.

5Chashnallatami ñucanchica, ashtacacuna cashpapash Cristohuanga shujlla cuerposhna canchi. Shina cashpami caishujhuan, chaishujhuambash tucuicuna pai purallata canchi.

6Shinamandami Diosca, pai munashcashnallata ñucanchita ninanda juyashpa, imatapash shican shican rurachun ushaita carashcata charinchi. Dios ima nishcata villanata cushca cajpica, crinata Dios medishpa cushcashnallata villachun.

7Servishpa causaj cashpaca, servishpa causanata yariaj cachun. Yachachij cashpaca, yachachinatalla yariashpa causachun.

8Aliguta yarichishpa rimaj cashpaca, chaitalla yariashpa causachun. Carajpash, ama cutin japinataca yarishpa carachun. Mandajpash, aliguta ricushpa mandachun. Llaquishpa ayudajpash, cushijushpa ayudaj cachun.

9Na nij tucushpallami, aliguta juyarina canguichi. Nalita ruranataca, na ricunayachishpa, alita ruranata catinguichi.

10Huauqui purashnami, aliguta juyarina canguichi. Paimi, ñucatapash yali ali yashpami, caishuj chaishuj alicachirina canguichi.

11Imata cashpapash ucha ruranataca, na quillanayachinachu canguichi. Diospaj Espíritu ninanda yarichijpimi, Apunchi Jesustaca aligutapacha servina canguichi.

12Japigrinata shuyanajushpami, cushijushpa shuyana canguichi. Jatun llaqui japijpipash, llaquita apanallami canguichi. Diostaca, na cungashpami mañajunalla canguichi.

13Diospajlla causajcunapaj imagu illajpipash, caranami canguichi. Huasiman shamujpipash, mingachinami canguichi.

14Catiriashpa llaquichijcunataca, bendicianami canguichi. Ima llaquipash japishpachari ali canman ningapaj randica, paicunataca bendiciaichi.

15Cushilla tiajcunahuanga cushijuichi, huacajcunahuanga huacaichi.

16Canguna purapash, shujllashnalla yarishpa causaichi. Na jariyashpa causanachu canguichi. Ashtahuangarin na jariyajcunahuanmi tandanajuna canguichi. Cangunapaj yuyaillapi alipacha yachajushcami cani yashpa, na causanachu canguichi.

17Cangunata nalita rurajpipash, na chashnallata tigrachinachu canguichi. Tucuicunapaj ñaupajpi, aliguta ruranatami yarina canguichi.

18Canguna rurai ushanalla cajpica, tucuicunahuan casilla aligutami causana canguichi.

19Ñuca juyashca crijcuna. Cangunata na ricunayachij gentecunataca, na tigrachishpa llaquichinachu canguichi. Ashtahuangarin Taita Dios ninanda fiñarishpa llaquichijuchun saquinguichi. Dios escribichishca Shimipica, cashnami nijun: “Ñucami llaquichisha. Ñucami, paicunaman imatapash tigrachisha ninmi Jatun Diosca” nijunmi.

20Shinallata: “Canda fiñaj runa yarjaihuan cajpica, micunaguta caranguilla. Yacunayaihuan cajpipash, yacuta caranguilla. Shina carajpica, ninanda llaquirishpa nalita rurashcamandaca, pingai tucungami” nijunmi.

21Ima nalita yarichinajuj mishachunga, na saquinachu cangui. Ashtahuangarin aliguta rurashpami, chai nalitaca mishana cangui.