1Taita Diosca, dioscuna tandanajushcapica chaipimi.
Dioscunapaj chaupipi tiarishpami,
aliguta ricushpa mandajun:
2¿Ima punllacamanda cangunaca, imatapash cashcatapacha
na rurashpa, ñucata na manllajcunamanra alita
rurashpa causagringuichi? Selah
3Imata ruraitapash na ushajcunamanda, taita mama
illaj huahuacunamanda shayarishpa mitsaichiyari.
Llaquichi tucujmanda, imagupash illajmandaca
imatapash cashcatapacha ruraichiyari.
4Llaquichi tucujujta, imagupash
illajtaca, llaquimanda cacharichipaichi.
Diosta na manllajcunapaj maquimanda cacharichipaichi.
5Paicunaca, imatapash na yachanllu, na entendinllu.
Yana yana tutapimi purinajun.
Alpapash ucumandapachami tucuilla cuyujun.
6Ñucaca cashnami nircani: “Cangunaca,
dioscunami canguichi.
Tucui cangunami, jahua pachapi causajuj
Diospaj churicuna canguichi” nircanimi.
7Ashtahuangarin runacuna huañunshnallatami huañunguichi.
Maijan mandajpash huañunshnallatami huañunguichi.
8Taita Dioslla, cai pachataca jatarishpa mandapairi.
Canmi, tucuilla llactacunata cambaj cachun japingui.
Who We AreWhat We EelieveWhat We Do
2025 by iamachristian.org,Inc All rights reserved.
