Psalms 55 - Quichua Imbabura Bible

Cumba cashpata llaquichij runacunata tucuchijuchunmi mañashcaCuerdacunahuan tocanacunata tocashpa, candajcunata mandaj candachijuchun, yachachingapaj David rurashca Salmomi.

1Taita Dioslla, ñuca mañajujta uyahuayari.

Ñuca ninanda mañajujpica, ama pacajupaichu.

2Ñuca mañajujtaca, aligutapacha

uyariashpa tigrachihuayari.

Llaquilla cashpami, caparishpa mañajupani.

3Ñucata fiñaj runa ninanda caparijujpi, canda na

manllaj runa ninanda llaquichijujpimi mañajupani.

Ñucatami llaquipi churanajun,

ninanda fiñarishpami catirianajuhuan.

4Ñuca ucu shungutaca nanajumbachami.

Huañungashna manllaimi, ñucapajman shamuhuashca.

5Manllaihuan chujchunami, ñucapajman shamuhuashca.

Ninan manllaimi ñucataca quilpahuashca.

6Chaimandami cashna yajurcani:

“¡Palomapaj alastashna pipash cuhuashcanman!

Shina cujpica, jahuata jatarishpa samagrimanllari.

7Carumambachami pacajushpa riman.

Jichushca pambapimi causagriman. Selah

8Manllanayai huairahuan shinlli

tamiamandaca, uchami pacajugriman” yajurcanimi.

9Jatun Dioslla, paicunataca tucuchipairi.

Paicunapaj rimaitaca pandachipairi.

Pueblopica, ninandapacha llaquichinajujta

fiñanajushpa rimarinajujtami ricurcani.

10Punllapash tutapashmi, pueblo jatun

pirca jahuacunata muyunajun.

Chai pueblo chaupipica, jatun nalita

ruranapash jatun llaquipashmi tian.

11Jatun nalita ruranami, pueblo chaupipica tian.

Plazacunapica, umachishpa quichunatapash,

imashna umachinatapash na saquinllu.

12Ñucata fiñaj runaca, na rimashpa pingaichihuarcachu.

Chai runa pingaichijpica, pingai tucuimanllami carcani.

Ñucata millanayachij runaca,

imata ningapajllapash na jatarircachu.

Chai runamandaca pacajuimanllami carcani.

13Ashtahuangarin ñucapaj ali cumba, ñucahuan purij,

ñuca familiashna cashpapash, canmi chashna rurangui.

14Pipash na yachanallacunataca,

ishcandimi juyaillaguta parlarin carcanchi.

Taita Diospaj huasipipash, cumba

tucushpami purin carcanchi.

15Paicunataca, cungashcapi huañui japichun.

Seolmambash, causaj urai rinajuchun.

Paicuna causanajuj huasicunapi, paicunapaj

chaupipica jatun nalicunalla tiashcamandami,

chashna tucunga.

16Ñucamandaca, Taita Diostami caparisha.

Mandaj Diosmi quishpichihuanga.

17Chishipash, tutamandapash, chaupi punllapashmi,

caparishpa mañajusha.

Ñuca mañajujtaca, paimi uyahuanga.

18Ñucata fiñashpa huañuchingapaj ashtacacuna

shamunajujpipash, paimi casilla ali

causaihuan quishpichihuanga.

19Ñaupa huatacunamandapacha causajujlla Taita

Diosmi, ñucata uyashpa paicunataca llaquichinga.

Paicunallata ali tucungapaj na munashpa,

Taita Diostapash na manllashcamandami,

chashna ruranga. Selah

20Nalita ruraj runaca, paihuan casilla ali causajuj

cumbacunatapash fiñashpa llaquichircallami.

Paihuan ari nishcatapash, na pactachircachu.

21Paipaj shimihuan rimashcacunaca,

leche viratapash yali llambullami.

Ashtahuangarin paipaj shungupica,

macanajunatallami yariajun.

Aceitetapash yali llambulla shimicunatami parlan.

Shina cashpapash macanajungapaj,

espadata ña llujchishcashnami.

22Llasha quipishna cambaj llaquitaca,

Mandaj Diosman saquilla.

Paica ayudangallami.

Imatapash cashcatapacha rurajtaca,

na tucui causaipi llaquita apajuchun saquingachu.

23Ashtahuangarin Taita Dioslla, canga paicunataca

chingaita chingana utujumanmi urai cachangui.

Huañuchijcunapash, umachijcunapash, chaupi

causaitallapash na causanajungachu.

Ashtahuangarin ñucaca, canda yariashpami causasha.