1Mandaj Diostaca, tucui punllacunapimi alicachijushalla.
Ñuca shimihuanga, paitaca alicachijushallami.
2Mandaj Dioshuanmi, ñuca almaca cushijunga.
Ali shungucunami, paita uyashpaca cushijunajunga.
3Mandaj Diostaca, ñucahuan jatunyachishunchiyari.
Paipaj shutitaca, shujllashnalla
tucushpa jatumbi churachishunchiyari.
4Mandaj Diostami mascajurcani.
Paimi, ñuca mañajujta uyahuarca.
Ñuca tucui imatalla manllajushcamandapash cacharichihuarcami.
5Diosta chapariajcunaca, punchayachi tucunajurca.
Paicunaca, na pingaichi tucunajurcachu.
6Imagutapash na charij cai runagu caparijujpica,
Mandaj Diosca uyahuarcami.
Ñuca tucui llaquicunamandami cacharichihuarca.
7Mandaj Diosta manllajcunataca,
paipaj angelmi muyundipi cuidashpa mitsajun.
8Mandaj Dios ali cajtaca, ricushpa yachaichiyari.
Paitalla yariashpa causaj runaca, ninandami cushijun.
9Mandaj Diospajlla causanajuj cangunaca, paita manllaichiyari.
Paita manllajcunapaca, imagupash na illanllu.
10Maltun leongunaca, micunata na tarishpa yarjaimi purinajun.
Ashtahuangarin Mandaj Diosta mascajcunaca,
ima alipash na illajmi causanajunga.
11Huahuacuna, ñucata uyangapaj shamuichi.
Mandaj Diosta imashna manllanatami yachachisha.
12¿Maijan runata alicunata ricungapaj
munashpa, unai punllacunata causangapaj munan?
13Can chashna causanata munashpaca,
cambaj jalluhuan nalita rimanataca, alichirishpa causangui.
Cambaj shimihuan umachinatapash jarcaringui.
14Nalita ruranamandaca anchurishpa, alitalla rurangui.
Casilla ali causaita mascashpa, chaitalla catingui.
15Mandaj Diosca, imatapash cashcatapacha rurajcunatami ricuriajun.
Paicuna caparishpa mañanajujtaca, aligutapachami uyariajun.
16Mandaj Diosca, nalita rurajcunatami ninanda fiñashpa llaquichin.
Paicunataca, pipash ama ashtahuan yarichun,
cai pachamanda anchuchingapajmi, chashna llaquichin.
17Imatapash cashcatapacha rurajcuna caparishpa
mañanajujpica, Mandaj Diosca uyanmi.
Tucui ninan llaquicunamandapashmi, paicunataca cacharichin.
18Mandaj Diosca, shungupi ninanda
llaquirishpa causajcunapaj ladopimi.
Shungupi ninanda llaquirishpa causajcunatami quishpichin.
19Imatapash cashcatapacha rurajtaca, ashtaca llaquicunami japin.
Ashtahuangarin tucui chaicunamandaca, Mandaj Diosmi cacharichinga.
20Paimi, paipaj tucuilla tullucunatapash cuidan.
Chai tullucunamandaca, shujllapash na faquiringachu.
21Nalita rurajtaca, nalita rurashcallatami huañuchinga.
Imatapash cashcatapacha rurajta millanayachij
runacunaca, ninanda llaquichi tucunapachami canga.
22Mandaj Diosmi, paita servijcunapaj almataca quishpichin.
Paita yariashpa causajcunaca, napacha llaquichi tucungachu.
Who We AreWhat We EelieveWhat We Do
2025 by iamachristian.org,Inc All rights reserved.
