1 CORINTIOS 9 - Quichua Imbabura Bible

Villachun cachashca runaguca, imagutapash japinatami charin

1¿Nachu villachun cachashca cani? ¿Nachu imagutapash rurai ushanalla cani? ¿Nachu ñucanchi Apunchi Jesustapash ricurcani? ¿Nachu cangunaca, Apunchi Jesuspajta ñuca rurajushcata ricuchinajunguichi?

2Shujcunapaca, na villachun cachashca cashpapash, cangunapaca villachun cachashcapachami cani. Cangunami, ñucata villachun cachashcataca, sellota churai tucushcashna, Apunchi Jesusta crij cashcamandaca ricuchinajunguichi.

3Ñucata juchachijcunatami, cashna nishpa tigrachini:

4¿Nachu ñucanchipash ufiaita, micuitaca ushanchi?

5Villachun cachashca caishujcunashna, Apunchi Jesuspaj huauquicunashna, Cefas shuti huauquishna, ¿nachu ñucanchipash, crij huarmita cazarashpa pushamui ushanalla canchi?

6Na cashpaca, Bernabepash, ñucapash, ¿nachu imatapash rurashpa causana canchi?

7¿Maijanda soldado tucungapaca, paipaj culquihuanllata rin? ¿Maijanda uvasta tarpushpapash fucujpica, na micun? Na cashpaca, ¿maijanda llamacunata michishpa purijpash, chai llamacunamanda lecheta na ufianga?

8Caitaca, ¿ñuca yarishpallachu shina nijuni? ¿Nachu mandashca shimipipash, chashnallata nijun?

9Moisés mandashca shimipica: “Trillajuj huagrataca, ama shimita huatanguichu” nijunmi. Taita Diosca, ¿huagracunata llaquishpallachu chashna nishcanga?

10Na cashpaca, ¿ñucanchipaj ali cachunllu chashna nijun? Ari, ñucanchipaj ali cachunmi chaitaca escribishca. Yapujpash, fucungami yashpami yapun. Trillajpash, granota japishami yashpami trillan.

11Ñucanchica tarpuj runashnami, Diosmanda cangunaman villarcanchi. Shina villashcamandaca, cangunamanda imagutapash japinaca, ¿yapachu canga?

12Shuj villajcunaca, japi ushanchimi nishpami, cangunataca imatapash mañan. ¿Nachu ñucanchicarin, ashtahuan mañanata charinchi?

Ashtahuangarin Cristomanda ali villaita villajui ama jarcarichunmi, imatapash na mañarcanchi. Shina cashpami, tucui ima llaquitapash apanchilla.

13Diosman carangapaj apashcataca, ¿nachu Diospaj huasipi Diosta servijcuna micun? Shinallata Diosman carashcacunata altarpi rupachishpa servijcunapash, ¿nachu chai altarmandallata micun?

14Shinallata ali villaita villajcunaca, ali villaita villashcamanda micuchunmi, Apunchi Jesusca mandashca.

15Chashna japinata charishpapash, ñuca imatapash japisha yashpaca na mañashcanichu. Cangunata ñuca mañashami yashpaca, na shina escribimunichu. Ñuca chashna rurashpa cushijujtaca, pipash nara chingachijpillata huañungapajmi munani.

16Ali villaita villajushpa jariyanataca, na charinichu. Chaitaca villanapachami cani. Ali villaita ñuca na villajushpaca, ¡aij imachari tucuiman!

17Ñuca tucui munaihuan villajushpaca, carashcata japinata charishami. Ashtahuangarin na tucui munaihuan villajushpapash, Dios ñucaman mingashcataca pactachinami cani.

18Chashna villashpa purishcamandaca, ¿ima alita japinatata charini? Cristomanda ali villaita villajushpaca, imatapash na mañanichu. Shina rurajushpami, ali villaita villajushpa japinata charishpapash na mañani.

19Shinamandami, na pipaj gañan cashpapash, ashtacacuna quishpirichun, tucuicunapaj gañanshna tucushcani.

20Judea llacta gentecunahuan cashpaca, paicuna quishpirichunmi, Judea llacta runashna purini. Paicunaca, mandashca shimicunatami catinajun. (Chaita ñuca na cazuj cashpapash), paicunapash quishpiririchunmi, paicunahuan cashpaca, chai mandashca shimicunata cazujuni.

21Shinallata chai mandashcata na charijcunahuan cashpaca, paicunapash quishpirichunmi, chai mandashcata na charinshnallata purini. (Shina cashpapash, Taita Dios mandashcataca na saquishpami, Cristo mandashcata pactachijuni).

22Chairalla yachajujcunahuan cashpaca, paicunapash quishpirichunmi, chairalla yachajujunshna purini. Imashnallapash huaquingunallapash quishpiripashcanman yashpami, tucuita rurashpa tucui gentecuna imashna causajta catini.

23Ali villaita villajushpaca, chai villajuj shimi aliguta carasha nishcata japingapajmi, chashna causajuni.

24Pugllaj pambapi mishangapaj calpajcunaca, tucuillami calpanajun. Shina cashpapash, shuj mishajllami japinataca charin. Chaitaca, ¿nachu yachanguichi? Cangunapash japigringapaca, mishashpa calpanshnami causana canguichi.

25Maipipash pugllagringapaca, paipaj cuerpo ama huaglichunmi, nalitaca tucuita saquin. Paicunaca ismunalla, tucurinalla coronata japingapajllami mishashpa pugllanajun. Ashtahuangarin ñucanchica, na tucurina coronaguta japingapajmi causanajunchi.

26Shina cajpimi, ñucapash na yanga cushijushpa calpanshna causajuni. Shinallata macanajushpapash, na yanga huairata huactanshna macanajunichu.

27Ashtahuangarin ñuca cuerpotami macanshna cazuchishpa, servishpa causajuni. Shujcunaman villashca jahuaca, ama ñucara nalipi ricuringapajmi, chashna rurajuni.