NÚMEROS 19 - Quichua Imbabura Bible

Mapayashcacunami mapa illaj tucushca

1Mandaj Diosca Moisestapash, Aarondapash cashnami nijurca:

2“Mandaj Dios ñucaca, cai mandashcatami cashna rurachun mandani: Israelcunaman, cashna nishpa villangui: ‘Imapash nara tucushca, imapash na illaj, nara yapushca, puca huarmi huagratami apamuna canguichi.

3Chai huagrataca, Eleazar shuti curaman cunguichi. Paimi, chai huagrataca, cangunapaj carpacunamanda caruman llujchishpa, paipaj ñaupajpillata cungata muchushpa huañuchijuchun mandanga.

4Chai jipaca, Eleazar curami chai yahuartaca, paipaj maqui dedohuan japishpa, ñucahuan tuparina jatun carpa ladoman, canchiscaman tsirapachinga.

5Chai huarmi huagra huañushcataca, pai ricujujpillatami caratapash, aichatapash, yahuartapash, huanundi rupachinga.

6Chai jipaca, curallatami cedro caspitapash, hisopo nishca malquitapash, puca telatapash japishpa, huagra aicha rupajuj chaupipi shitanga.

7Chai jipaca curami, paipaj churajunacunata tajshashpa, paipash armanga. Chai jipami, carpacunaman tigranga. Chaipica, tutayangacamanmi mapara canga.

8Shinallata huagra aichata rupachij runapash, paipaj churajunata tajshashpa, paipash armachun. Chai runapash, tutayangacamanmi mapallata canga.

9Huarmi huagrata rupachishca uchufataca, mapa illaj shuj runami pallanga. Chai uchufataca, israelcunapaj carpacunamanda caruman apashpami, mapa illaj pushtupi churagringa. Chai uchufataca, tandanajushca israelcunami mapa illaj cangapaj, armana yacupi chapungapaj alichinajunga. Chaica, juchamanda cushcami canga.

10Huarmi huagra rupashca uchufata pallaj runapash, paipaj churajunacunataca tajshangami. Paipash, tutayangacamanmi mapara canga. Chashna ruranaca israelcunapajpash, shuj llactamanda shamushpa Israel puracunapi causajcunapajpash, tucui causaipi pactachinajuchun cushca shimicunami canga.

11Huañushcapi maijambash tacarishpaca, canchis punllacamanmi mapa canga.

12Quimsa punlla tucujpimi, mapa illaj cana yacuhuan armashpa, canchis punllapica mapa illaj canga. Mapa illaj cangapaj quimsa punlla tucujpi na armashpaca, canchis punllapica na mapa illaj cangachu.

13Huañushcapi maijambash tacarishpata mapa illaj cangapaj na armashpaca, Mandaj Dios ñucapaj jatun carpatami mapayachin. Chai runaca, Israel puramandaca anchuchi tucungami. Mapa illaj cana yacuhuan na tsiraparishcamandami, paica mapa canga. Chai mapaca, paipaj jahuallatami canga.

14Maijambash carpapillata huañushca cajpica, cashnata rurachunmi cai mandashcata cuni: Maijambash chai carpaman yaicujpash, chai ucupi tucui tiajcunapash, canchis punllacamanmi mapa canga.

15Tucui calderacuna pascariashpa, na aliguta quilpashca cashpapash, mapami canga.

16Espadahuan huañuchi tucushpa, pambapi sirijuj huañushcapi, na cashpaca yangata huañushca sirijujpi, na cashpaca gente tullupi, na cashpaca huañushcata pambashca utujupi maijan cashpapash tacarishpaca, canchis punllacamanmi mapa canga.

17Chashna mapayashcapaca, juchamanda cushca chai huarmi huagrata rupachishca uchufatami japinga. Chai uchufataca, shuj jatun tastapi churashpami, ninanda rijuj yacuta japishpa chaipi churanga.

18Chai jipaca, mapa illaj shuj runami, hisopo nishca malquita japishpa, chai yacupi mutiyachinga. Chai mutiyachishcatami, chai carpa jahuapi, chai carpapi imalla tiashcacunapaj jahuapi, chaipi causajcunapaj jahuapipash tsirapachinga. Shinallata gente tullupi, na cashpaca huañuchijpi huañushca sirijujpi, na cashpaca yangata huañushca sirijujpi, na cashpaca huañushcata pambashca utujupi tacarishca runapipashmi tsirapachinga.

19Mapa illaj runallatami, mapayashca runataca, quimsa punlla tucujpipash, canchis punlla tucujpipash, chai yacuhuan tsirapachinga. Canchis punllapi ña mapa illaj tucushpaca, paipaj churajunacunata tajshachun, paipash armachun. Shina rurashpami tutayajpica, mapa illaj canga.

20Maijambash mapayashca cashpata, na armashpaca chai runaca, tandanajushca Israel puramanda anchuchi tucungami. Paica, Mandaj Dios ñucapajlla carpata mapayachishcamanda, mapa illaj tucuna yacuta na tsirapachi tucushcamandami, mapa canga.

21Chaica, cangunapaj tucui causaipi pactachinajuchun cushca shimicunami. Shinallata mapa illaj tucuchun yacuhuan tsirapachij runapash, paipaj churajunata tajshachun. Mapa illaj tucuna yacuta maijambash tacarishpaca, tutayangacamanmi mapa canga.

22Tucui ima charishcacunapi, chai mapayashca runa tacarijpica, mapami canga. Shinallata imapash mapayashcapi maijan runapash tacarishpaca, tutayangacamanmi mapa canga’ nishpa villangui” nijurcami.