1Saúl huañushca jipami, cashna tucurca: Davidca, amalecitacunata mishashpa tigramushca jipami, Siclag shuti pueblopi ña ishcai punllata carca.
2Ña quimsa punlla tucujpimi, cashna tucurca: Carpacunata shayachishpa Saúl tiajuj pambamandami, shuj runaca Davidpajman chayamurca. Paica churajunapash liquirishca, paipaj umapash alpayashcami carca. Pai chayamushpaca, Davidta manllan cashcata ricuchishpami, alpaman chayajta urai cumurirca.
3Chaipimi Davidca:
—¿Maimandata shamungui?— nishpa tapurca.
Shina tapujpimi chai runaca, cashna nirca:
—Carpacunata shayachishpa, israelcuna tianajuj pambamandami, pacajushpa shamupani— nircami.
4Shina nijpimi, Davidca:
—¿Imata tucurcayari? Villahuai nipanimi— nirca.
Shina nijpi chai runaca, cashna nirca:
—Israelcunaca, chai macanajuimandami pacajushpa calparca. Shinallata ashtaca soldadocunami, huañuchi tucurca. Saulpash, paipaj churi Jonatanbashmi huañurca— nircami.
5Shina nijpimi Davidca, villangapaj shamuj chairalla viñai runataca:
—Saulpash, paipaj churi Jonatanbash huañushcataca, ¿imashnata yachangui?— nishpa tapurca.
6Shina tapujpimi, villangapaj shamuj chairalla viñai runaca, cashna nijurca:
—Napash yashcapimari, Gilboa shuti urcuman shamurcani. Chaipimi Saultaca, paipaj lanzapi taunarishpalla rijujta ricurcani. Shinallata paipaj huashataca, macanajuna carretacunapi, caballopi tiarishca gentecunapash catinajujtami ricurcani.
7Pai huashaman tigrarishpa ricushpami, ñucata ricushpa cayahuarca. Shina cayajpimi, ñucaca: ‘Caipimi capani’ nircani.
8Shina nijpimi paica: ‘¿Canga, pita cangui?’ nishpa tapuhuarca. Shina tapujpimi, ñucaca: ‘Amalecita purami cani’ nircani.
9Shina nijpimi paica, cutinllata cashna nihuarca: ‘Ñucapajman quimirishpa huañuchihuai nipanimi. Ñucataca, ninan llaquimari ña japihuashca. Shina cashpapash causajunirami’ nihuarca.
10Shina nijpimi, paipajman quimirishpa huañuchircani. Chashna mishai tucushca jipacarin, na ashtahuan causai ushangachu yashpami, chashna huañuchircani. Chai jipami, paipaj umapi churajushca coronatapash, paipaj maqui rigrapi churajushca argollatapash surcuchishpa, can ñuca mandajpajman apamupani— nijurcami.
11Shina nijpimi Davidca, pai churajushcata japishpa liquirca. Paihuan chaipi tianajuj runacunapash, chashnallatami ruranajurca.
12Saulpash, paipaj churi Jonatanbash, Mandaj Dios agllashca gentecunapash, Israel aillucunapash, espadahuan huañuchi tucushcamandami, tutayangacaman na micushpa, ninanda llaquirishpa huacanajurca.
13Chai jipami Davidca, villangapaj shamuj chairalla viñai runataca:
—¿Canga, maimandata cangui?— nishpa tapujpi, paica:
—Ñucaca, caru llactamanda amalecita runapaj churimi cani— nirca.
14Shina nijpimi Davidca, cashna nirca:
—Mandaj Dios agllashpa churashca jatun mandajta, cambaj maquita chutashpa huañuchinataca, ¿imashpata na manllarcangui?— nircami.
15Shina nishca jipami Davidca, paita servij shuj runata cayashpa:
—Cai runata huañuchigri— nirca.
Shina nijpimi chai servij runaca, chugrichishpa huañuchirca.
16Davidca, paitaca cashnami nirca:
—Cambaj yahuarca, cambaj jahuallata cachun. Cambaj shimihuanllatami, can llaquichi tucungapaca: ‘Mandaj Dios agllashpa churashca jatun mandajtaca, ñucami huañuchircani’ nishpa villahuarcangui— nircami.
Davidca Saulmandapash, Jonatanmandapashmi yarishpa yarishpa huacashca17Saulpash, Saulpaj churi Jonatanbash huañushcamandami, Davidca yarishpa yarishpa huacashpandi, cashna candajurca.
18Chaitaca: “Judá aillu puracunamambash yachachinami” nircami. Ricuichi, cai candanaca, Jaser nishca libropimi, escribishca tiajun:
19“¡Israel llactapaj juyailla runacunaca,
cambaj urcucunapaj jahuapillatamari huañushca!
¡Shinlli runacunaca, llaquinayaitamari
huañushpa urmashca!
20Filisteocunapaj ushicuna ama cushijuchun,
circuncisión nishcata na rurashcacunapaj
ushicuna ama cushijushpa fahuanajuchunga,
Gat pueblopica na villanachu canguichi.
Asacalón pueblopaj plazacunapipash,
na villanachu canguichi.
21Gilboa shuti urcucunalla, cangunapica asha
paramullapash, ima tamiallapash ama urmachun.
Diosman imata carangapajpash,
chai alpacunapica ama fucuchun.
Chaipimi, shinlli runacunapaj jarcarina
escudocunapash shitai tucurca.
Saulpaj escudopash, aceitehuan na javishcashnami tucurca.
22Jonatanbaj arcoca, huañushcacunapaj
yahuar illaj, shinlli runacunapaj
vira illajca, na tigramunllu carca.
Saulpaj espadapash, yangapachaca na tigramunllu carca.
23Saulpash, Jonatanbash, ninandami juyarin carca.
Paicunapaj causaipica, na shicanyarircachu.
Paicunaca, huañushpapash na shicanyashcachu.
Jatun angatapash yali, ñapash calpajcunami carca.
Leongunatapash yali shinllicunami carca.
24Israel huarmicunalla, Saulmandaca huacaichiyari.
Paimi, juyailla morado churajunacunata
cushijuihuan cangunaman churachin carca.
Cangunapaj churajunatapash, orota churashpami,
juyaillaguta rurachin carca.
25¡Shinlli runacunaca, llaquinayaitamari
macanajunajuj chaupipica, huañushpa urmashca!
¡Jonatanbash, cambaj urcucunapimari huañushca!
26Ñuca huauqui Jonatanlla, canmandaca ninan llaquimi cani.
Ima mishquillagutapash yali mishquigumi carcangui.
Cambaj juyaica, huarmicunapaj juyaitapash
yali juyaillagumi carca.
27¡Shinlli runacunaca, llaquinayaitamari
huañushpa urmashca!
¡Jatun macanajuipi macanajunacunapash
tucurishcamari!” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
