1Josafat shuti runa huañushpa paipaj ñaupa taitacunahuan tandanajujpica, chai taitacunata pambashca ladopillatami, Davidpaj pueblopi pambarca. Paipaj randica, paipaj churi Joram shuti runami mandajurca.
2Paica: Azarías, Jehiel, Zacarías, Azarías, Micael, Sefatías shuti huauquicunatami charirca. Tucui paicunami, Judá llactata jatun mandaj Josafat runapaj churicuna carca.
3Paicunamanmi, paicunapaj taita Josafat runaca, orota, culquita imatalla rurashcata, imalla ashtahuan valishcata ashtacata carashca carca. Shinallata muyundi jatun pircacunahuan pueblocunatapashmi, Judá llactapi carashca carca. Ashtahuangarin Judá llactata mandanataca, punda churi cajpimi, Joram shuti runaman cushca carca.
4Joram shuti runaca, paipaj taitapaj randi mandanapi tiarishpa, ña tucuita mandai callarishpaca, paipaj tucuilla huauquicunatami, espadahuan huañuchirca. Shinallata israelcunata huaquin mandajcunatapashmi huañuchirca.
5Joram shuti runaca, quimsa chunga ishcai huatata charishpami, mandai callarirca. Paica, pusaj huatatami Jerusalenbi mandajurca.
6Paica, Israel llactata jatun mandajcuna imashna causashcashnami, Acab shuti runapaj huasi ucu puracunashnallata nalita rurajurca. Paica, Acab shuti runapaj ushitami paipaj huarmi cachun japirca. Chaimandami Mandaj Diospaj ñaupajpica, chashna nalita rurashpa causajurca.
7Ashtahuangarin Mandaj Diosca, Davidhuan ari nishcamandami, Davidpaj huasi ucu purata tucuchingapaca na munarca. Paica Davidmambash, paipaj miraicunamambash cashnami nishca carca: “Micha lámpara rupajunshna cambaj miraicuna mandanajuchunmi, mandanataca causaita causaicaman cangunaman cusha” nishcami carca.
8Joram shuti runa mandajui punllacunallatami, Edom llactapi causajcunaca, Judá llacta mandajujta na cazushpa, paicunata mandachunga, shuj jatun mandajta churanajurca.
9Chaimandami Joram shuti runaca, pai churashca mandajcunandi, paipaj tucui carretacunandi rirca. Paica, tuta jatarishpami paitapash, paipaj carretacunapi purij soldadocunata tucui mandajcunatapash chaupipi churashca tianajuj edomitacunahuan macanajushpa misharca.
10Shina cajpipash Edom llactapi causajcunaca, Judá llactata jatun mandaj mandashpa charijushcamandaca cacharirircami. Cunangamanmi, chashna causanajun. Chai punllacunallatami, Libna shuti pueblopi causajcunapash, mandai tucushpa causanajushcamandaca cacharirirca. Paipaj ñaupa taitacunata Mandaj Taita Diosta cungashcamandami, chashna tucurca.
11Chashna nalita rurajushca jahuami Joram shuti runaca, Judá llactapi tiaj lomacunapipash altarcunata rurarca. Chaita rurashpami, Jerusalenbi causajcunataca, chai dioscunata catishpa huainayana yuyaita cushpa pandachirca. Chashna nalita rurachunmi, Judá llactapi causajcunataca pandachirca.
12Chaimandami, Dios ima nishcata villaj Eliasca, paipajman shuj cartata cacharca. Chai cartapica, cashnami nijurca: “Cambaj ñaupa taita Davidta Mandaj Taita Diosca cashnami nin: ‘Canga, cambaj taita Josafat runa imashna causashcashnallapash, Judá llactata jatun mandaj Asa shuti runa imashna causashcashnallapash na causajushcanguichu.
13Ashtahuangarin Israel llactata jatun mandajcunashnami causajushcangui. Shina causashpami, Judá llactapi causajcunata, Jerusalenbi causajcunataca, Acab shuti runapaj huasi ucu puracuna huainayashcashnallata huainayachishcangui. Chaita rurashca jahuami, cambaj tucui huauquicunatapash huañuchishcangui. Paicunaca, cambaj taitapaj familiacunami carca. Paicunaca, candapash ashtahuan yali alicunami carca.
14Ricui, cambaj llacta puracunata, cambaj churicunata, cambaj huarmicunata can tucui imatalla charishcacunatapash, Mandaj Diosca jatun llaquihuanmi llaquichinga.
15Candapash, jatun ung:uicunahuanmi llaquichigrin. Chunlluli nanaihuanmi llaquichigrin. Chai nanaihuan causajushpami, chunllulicuna llujshijpi huañungui’ ninmi” nishpami, cartata cacharca.
16Shinamandami Mandaj Diosca, filisteocunapipash, Etiopía llacta ladoman causaj arabecunapipash, Joram shuti runata fiñana yuyaita churarca.
17Paicunaca, Judá llactapi causajcunahuan macanajungapaj vichai shamushpa, chai llactaman yaicumushpami, jatun mandajpaj huasipi tucui imalla tiashcacunatapash, paipaj churicunatapash, paipaj huarmicunatapash apanajurca. Paipaj churicunamandaca, tucuicunapaj cati churi Joacaz shuti runallami puchurca.
18Tucui chai jipami Mandaj Diosca, na jambi ushanalla chunlluli ung:uita cachamushpa llaquichirca.
19Ña tauca punllacuna yalishpa ishcai huata yalishca jipami, cashna tucurca: Chai nanaihuan vijsa ismujpimi, chunllulicuna llujshirca. Chashnami paica, chai ung:uihuan ninan nanaita apashpa huañurca. Pai huañujpica, paipaj ñaupa taitacuna huañujpi paicunata alicachishpa ninata rupachishcashnaca, na rupachinajurcachu.
20Paica, quimsa chunga ishcai huatata charishpami, mandai callarirca. Paica, pusaj huatatami, Jerusalenbi mandajurca. Pai huañujpica, pipash na llaquircachu. Paitaca, Davidpaj pueblopimi pambarca. Ashtahuangarin jatun mandajcunata pambana utujupica, na pambarcachu.
Who We AreWhat We EelieveWhat We Do
2025 by iamachristian.org,Inc All rights reserved.
