1Chai punllami Mandaj Diosca, pillurij leviatán nishca jatun culebratapash, ñapash purij leviatán shuti jatun culebratapash, paipaj manllanayai jatun shinlli espadahuan huañuchinga. Mama cuchapi tiaj jatun dragondapashmi huañuchinga.
2Chai punllapica, puca juyailla vinota rurana uvas chagratami, candana canguichi.
3“Chai chagrataca, Mandaj Dios ñucami cuidashpa, yacutapash punllandi churasha. Pipash ama yaicushpa huaglichinajuchunmi punllapash, tutapash cuidajusha.
4Chai chagrataca, na fiñashachu. ¿Pita ñucata fiñashpa, ñucahuan macanajungapaj shayaringa? ¿Casha yuracuna, nali jihuacunachu shayaringa? Ñucami chaicunataca sarushpa, tucuillata rupachisha.
5Na cashpaca ñuca shayachishca torretaca, ¿maijambash t'uni ushangachu? Ashtahuangarin fiñajcunaca, ñucahuan casilla ali causaita charingapaj ari nichunlla. Ari, ñucahuan casilla ali causaita charingapaj ari nichunlla”.
6Jacobopaj miraicunapaca, shinllipacha sapiyana punllacunami chayamunga. Israelcunamandaca, mushuj yuracuna retoñashpami sisanga. Tucui cai pachami, paicuna fucushca granocunahuan jundanga.
7Diosca paicunataca, ¿fiñaj runacunatashnachu llaquichishca? Na cashpaca, ¿paicunata huañuchij runacunatashnachu huañuchishca?
8Paicunapaj jipa miraicunataca, llaquita apai ushanata ricushpallami, jipa miraicunataca llaquichinga. Paimi rupajlla, shinlli huairata cachamushpa, yuracunata anguyachishpa urmachinshna anchuchinga.
9Chashnami, Jacobopaj miraicuna jatun nalita rurashcataca cunganga. Rumihuan paicuna rurashca altarcunataca, cal rumicunatashna tucuillatami ñutunga. Asera shuti huarmi diosman rijchaj caspicunatapash, indiman rijchajta rurashca dioscunatapash tucuillata urmachishpami, paicunapi jucha tiashcataca, tucuillata anchuchinga.
10Jatun pircahuan muyundi jarcashca puebloca, llaquinayaitami tucuchi tucunga. Ashtacacuna causanajuj puebloca, jichushca pambashnami shitashca siringa. Chaipimi, shicucunata michinajunga. Corraltapash chaipimi charinga. Paicunami, yuracunapaj malquicunata micushpa tucuchinga.
11Chai malquicuna chaquijpica, faquishpami saquinga. Chaitaca, huarmicunami yamdashpa rupachinajunga. Cai gentecunaca, napacha yuyaita japijcunachu. Chaimandami, paicunata ruraj Diosca napacha llaquinga. Paicunata ruraj Diosca, na llaquishpami llaquichinga.
12Chai punllacunapica, cashnami tucunga: Eufrates shuti jatun yacu ladomandaca, Egipto llacta jatun yacu ladocamanmi, Mandaj Diosca trillanshna tandachijunga. Chaipimi can israelcunaca, shuj shuj tandachi tucunguichi.
13Chai punllapica, cashnapashmi tucunga: Jatun trompetatami huacachinga. Shina huacachijpimi, Asiria llactaman caita chaita cachai tucushcacunapash, Egiptoman apai tucushcacunapash shamunajunga. Paicuna tigramushpami, Mandaj Diostaca paipajlla urcupi tiaj Jerusalenbi mañanajunga.
Who We AreWhat We EelieveWhat We Do
2025 by iamachristian.org,Inc All rights reserved.
