1Jerobaal shuti runapaj churi Abimelec shuti runaca, paipaj mamapaj turicunahuan parlangapajmi, Siquem shuti puebloman rirca. Chaipi paicunahuan parlashpami, paipaj mamapaj taitamanda huasi ucupura tucui familiacunataca, cashna nijurca:
2—Ñucami, Siquem shuti pueblopi tucui causajcuna uyajta cashna nichun, cutin cutin mañapani: ‘¿Cangunapaj yuyaipica, cai Siquem shuti pueblopi causajcunataca, Jerobaal shuti runapaj tucui canchis chunga churicuna mandanachu ali, na cashpaca shujlla mandaj tianachu ali? Ñucapash, cangunapaj tullullata, cangunapaj aichallata cajtaca yarinami canguichi’ nipaichiyari— nijurcami.
3Shina nijpimi, Siquem shuti pueblopi tucui causajcuna uyajta, Abimelec shuti runapaj randi tucui chai shimicunata rimanajurca. Chaimandami tucui paicunapaj shungupica, paitalla ashtahuan yarinajurca. Paicunaca: “Abimelec shuti runaca, ñucanchi huauquimari” ninajurcami.
4Paicunaca, Baal-berit shuti diospaj huasimandaca, pusaj patsaj gramota pezaj culquitami cunajurca. Chai culquita japishpami Abimelec runaca, imata rurangapajpash na munaj, yanga purij runacunaman chai culquita cushpa pusharca.
5Abimelec runaca, paipaj taita Jerobaal shuti runa causashca Ofra shuti puebloman rishpami, paipaj canchis chunga huauquicunataca, shuj rumi jahuapilla huañuchirca. Chai churicunamandaca, Jerobaal shuti runapaj Jotam shuti jipa churillami pacajushpa quishpirirca.
6Shinamandami, Siquem shuti pueblopi tucui causajcunaca, Milo nishca huasipi tucui causajcunandi, Siquem shuti pueblo ladollapi shuj jatun pilar shayajuj pambapi tandanajurca. Chaipimi Abimelec shuti runataca, jatun mandaj cachun agllanajurca.
7Jotam shuti runaman chaita villajpimi, Gerizim shuti urcu jahua umaman rirca. Chaipi shayarishpami, ninandapacha caparishpa cashna nirca:
“Siquem shuti pueblomanda runacuna, ñuca nishcata uyahuaichi. Shina uyajpica, Taita Diospash cangunata uyangami.
8Shuj punllami quirucunaca, jatun mandajta charishun nishpa, olivos quirutaca: ‘Ñucanchita jatun mandaj tucupai’ ninajurca.
9Ashtahuangarin olivos quiruca, cashna nishpami tigrachirca: ‘¿Quirucunata jatun mandaj tucungapajllachu, ali aceiteta fucunata saquisha? Ñucamandami Taita Diospash, runacunapash alicachi tucunajun’ nircami.
10Chai jipami quirucunaca, jigos yurataca: ‘Can, ñucanchi jatun mandaj tucupai’ ninajurca.
11Jigos yurapash, cashna nishpami tigrachirca: ‘¿Quirucunata jatun mandaj tucungapajllachu, ali mishquilla jigosta fucunata saquishpa risha?’ nircami.
12Chai jipaca quirucunaca, uvas yuratami: ‘Ñucanchita jatun mandaj tucupai’ ninajurca.
13Uvas yurapash, cashna nishpami tigrachirca: ‘¿Quirucunata jatun mandaj tucungapajllachu Taita Diostapash, runacunatapash cushichij llullu vino llujshina uvasta fucunata saquishpa risha?’ nircami.
14Chaimandami tucuilla quirucunaca, casha yurata: ‘Can, ñucanchita jatun mandaj tucupailla’ ninajurca.
15Chai quirucunataca, chai casha yurapashmi cashna nishpa tigrachirca: ‘Cangunata jatun mandaj cachun, na llullashpa ñucata agllanajushpaca, ñuca llandujuj ucupi llanduj shamuichi. Na cashpaca, ñucamanda nina llujshishpami, Líbano shuti urcupi tiaj cedro yuracunataca tucuchinga’ nircami.
16Cunanga, Abimelec shuti jatun mandaj cachunga, ¿na umashpa ima nalitapash na rurana yuyaihuanllu churarcanguichi? ¿Jerobaal shuti runa cangunata juyashpa imatapash rurashcashnallatachu, cangunapash paipaj huasi ucu puracunaman aliguta rurarcanguichi?
17(Ashtahuangarin ñuca taitami, cangunamanda macanajurca. Madián shuti llacta runacunapaj maquimanda cacharichingapaca, huañunatapash na manllashpami macanajurca.
18Cunanga cangunaca, ñuca taitapaj huasi ucu puracunata fiñashpa jatarishpami, ñuca taitapaj canchis chunga churicunataca, shuj rumi jahuapilla huañuchishcanguichi. Chai jipaca, ñuca taitata servij huarmipaj churi Abimelec shuti runataca, cangunapaj huauqui cajpimi Siquem shuti pueblopi causajcunata jatun mandaj cachun churashcanguichi).
19Cunanga, Jerobaal shuti runatapash, paipaj huasi ucu puracunatapash na umashpa, ima nalitapash na rurana yuyaihuan chashna rurashca cashpaca, Abimelec shuti runahuan cushijuichilla. Shinallata paipash, cangunahuan cushijuchunlla ninimi.
20Ashtahuangarin na chashna cajpica, Siquem shuti pueblopi causajcunata, Milo nishca huasipi causajcunataca, Abimelec shuti runamanda nina llujshinshna tucuchishpami ali canman. Na cashpaca, Siquem shuti pueblopi causajcunamandapash, Milo nishca huasipi causajcunamandapash, nina llujshinshna Abimelec shuti runata tucuchishpami ali canman” nijurcami.
21Jotam shuti runaca, paipaj huauqui Abimelec shuti runata manllashpami, Beer shuti puebloman pacajungapaj rishpa, chaipi causajurca.
22Abimelec runaca, israelcunataca ña quimsa huatatami cazuchishpa mandajurca.
23Chai jipami Taita Diosca, Abimelec shuti runahuan Siquem shuti pueblopi causajcunahuan fiñanajuchij, nali shuj ayata cacharca. Chaimandami, Siquem shuti pueblopi causajcunaca, Abimelec runata fiñashpa jatarirca.
24Jeroboaal shuti runapaj canchis chunga churicunata huañuchishpa, paipaj huauquicunata yahuarta jichashcamanda chai yahuarca, paicunapaj huauqui Abimelec runapaj jahuapillata urmachunmi, chashna jatarirca. Shinallata paipaj huauquita huañuchijuchun shinllichishca, chai Siquem shuti pueblopi causanajuj runacunapaj jahuapipashmi, llaqui shamuna carca.
25Siquem shuti pueblopi causajcunaca, loma jahua umacunapimi, pacalla chapajcunata churarca. Paicunami, paicunapaj ladolla ñangunata tucui yalijcunataca, imatalla charishcata shuhuashpa llaquichinajurca. Shina ruranajujtami, Abimelec runaman villanajurca.
26Shinallata Ebed shuti runapaj churi Gaal shuti runami, paipaj huauquicunandi, Siquem shuti puebloman shamushpa chaipi quedarca. Chaimandami chaipi causajcunaca, chai runatalla yarianajurca.
27Paicunaca, uvas chagracunaman llujshishpa paicunapaj uvasta pallashpami, chai uvasta sarushpa fiestata ruranajurca. Chaipica, paicunapaj dioscunapaj huasiman yaicushpami micushpa, ufiashpa Abimelec runataca, ima llaquipash japishpaca alichari canman ninajurca.
28Ebed shuti runapaj churi Gaal shuti runaca, cashnami nijurca: “Ñucanchi paita servingapaca, ¿Abimelec runaca pitayari? ¿Siquem shuti pueblopash, imatayari? Abimelec runaca, ¿nachu Jerobaal shuti runapaj churi? Paita ayudajpash, ¿nachu Zebul shuti runa? Abimelec runata servingapaj randica, Siquem shuti runapaj taita Hamor shuti runapaj miraicunata servishpa causashunchi. ¿Imashpata Abimelec runataca, servina canchi?
29Cai pueblotaca, ñuca mandajushcaiman, Abimelec runataca llujchishpa cachaimanllami. Shinallata Abimelectaca, cashnami niman: ‘Tauca soldadocunata tandachishpa, ñucahuan macanajungapaj llujshimui’ nimanmi” nijurcami.
30Ebed shuti runapaj churi Gaal shuti runa chashna rimashcata uyashpami, chai pueblota mandaj Zebul shuti runaca, nina japirinshna fiñarirca.
31Chaimandami pipash na yachajta, Abimelec runaman cashna nishpa villachun villajcunata cacharca: “Ricui, Ebed shuti runapaj churi Gaal shuti runami, paipaj huauquicunandi, Siquem shuti puebloman shamushca. Ricui, paicunami cai pueblopi causajcunataca, canda na cazushpa canhuan macanajuchun yarichinajun.
32Chaimanda cunanga cambash, canhuan tandanajushca cambaj soldadocunapash tuta jatarishpa, pambapi pacalla chapajcunata churangui.
33Cayapaca, indi ña llujshijujhuan, macanajungapaj cai puebloman tutamanda ucha shamungui. Gaal shuti runa canhuan macanajungapaj, paipaj runacunandi llujshimujpica, cambaj imashna ali cajpipash, chashna ruranguilla” nishpa villachunmi cacharca.
34Shina villajpimi Abimelec shuti runaca, paihuan tandanajushca paipaj tucui runacunandi tuta llujshimushpa, chuscupi shicanyarishpa, Siquem shuti pueblopi pacalla chapanajuchun churarca.
35Chaipimi, Ebed shuti runapaj churi Gaal shuti runaca, chai puebloman yaicuna punguman llujshimushpa shayarirca. Chaita Abimelec runa ricushpami, pacalla chapajushcamandaca, tucui paipaj runacunandi llujshimurca.
36Chai gentecunata Gaal shuti runa ricushpami, Zebul shuti runataca cashna nirca:
—Ricui, urcucunapaj jahua umacunamandaca tauca runacunami urai shamunajun— nircami.
Shina nijpimi, Zebul shuti runaca:
—Canga, urcucunapaj llandutami runacunatashna ricujungui— nishpa tigrachirca.
37Shina nijpimi Gaal shuti runaca, cutin cashna nishpa rimarca:
—Ricui, llacta chaupitami ashtaca gentecuna urai shamunajun. Shinallata yachajcuna tiarina encina quiru lado ñandapashmi, tandanajushca soldadocuna uriajumunajun— nircami.
38Shina nijpimi Zebul shuti runaca, cashna nishpa tigrachirca:
—¿Imashpata cunanga, punda rimashcashnalla na rimangui? Canga: ‘Abimelec runaca, paita servishpa causangapaca, pitayari?’ nircanguimi. ¿Nachu cai gentecunata yangapi churashpa, chashna rimajurcangui? Cunanga llujshishpa, paicunahuan macanajugri— nircami.
39Shina nijpimi Gaal shuti runaca, Siquem shuti pueblopi causajcunata pushashpa, Abimelec runahuan macanajurca.
40Ashtahuangarin Abimelec runa catijpimi Gaal shuti runaca, paicunapaj ñaupajmanda pacajushpa calparca. Paicunaca, puebloman yaicuna pungu ladocamanmi, ashtacacuna huañushca sirinajurca.
41Abimelec runaca, Aruma shuti pueblopillami shuyarca. Shinallata Gaal shuti runatapash, paipaj huauquicunatapash, Siquem shuti pueblopi ama causachunmi, Zebul shuti runaca llujchishpa cacharca.
42Chai cayandi punllami, cashna tucurca: Siquem shuti pueblopi causajcunaca, pambamanmi llujshinajurca. Chaitami, Abimelec runaman villanajurca.
43Chaimandami paipaj soldadocunataca, quimsapi shicanyachishpa, pacalla chapachun pambapi churarca. Siquem shuti pueblomanda gentecuna llujshinajujta ñapash ricushpami, Abimelec runaca paicunahuan macanajungapaj llujshirca.
44Abimelec runaca, tandanajushca paipaj soldadocunandi ninanda calpashpa catishpami, chai pueblo pungupi shayarigrirca. Shinallata ishcaipi tandanajushca caishuj soldadocunaca, pambata rinajujcunata ninanda catishpa japishpami huañuchinajurca.
45Abimelec runaca, chai pueblopi causajcunahuan tucui chai punlla macanajushpa, chai pueblota quichushpami, chai pueblopi causajcunatapash huañuchirca. Chai pueblotaca llaquinayaita tucuchishpami, chaipica cachita shitarca.
46Siquem shuti pueblo jatun torrepi tianajuj tucui gentecuna chaita yachashpami, Berit shuti diospaj huasi shinlli torrepi pacajungapaj yaicunajurca.
47Siquem shuti pueblo torremanda tucui runacuna chaipi tandanajushcatami, Abimelec runaman villanajurca.
48Chaimandami Abimelec runaca, paihuan tandanajushca tucui soldadocunandi, Salmón shuti urcuman vichai rirca. Chaiman chayashpami Abimelec runaca, shuj jachata japishpa, quirucunamanda shuj malquita cuchushpa, rigrapi churarca. Shina rurashpami, paihuan rishca soldadocunataca: “Ñuca rurashcata canguna ricushcashnallata, cangunapash ucha ruraichi” nirca.
49Shina nijpimi, tucuicuna quiru malquicunata cuchushpa, Abimelec runata catishpa rinajurca. Chai malquicunataca, shinlli torre muyundipi churashpami, chai shinlli torretaca chai malquicunahuan rupachinajurca. Chashnami, Siquem shuti pueblo torrepi tucui tianajuj jaricunapash, huarmicunapash shuj huarangashna gentecuna huañurca.
50Chai jipami Abimelec runaca, Tebes shuti puebloman rishpa, chai Tebes shuti pueblota chaupipi churashpa, macanajushpa quichurca.
51Chai pueblo chaupipica, ashtahuan shinllita jarcashca shinlli torremi tiarca. Chaimanmi tucui jaricunapash, huarmicunapash, chai pueblota tucui mandajcunapash yaicushpa, pungucunataca ali vichashpa chai torre jahuaman vitsianajurca.
52Abimelec runaca, macanajushpa chai torre punguman chayashpami, chai torre pungupica ninata japichirca.
53Ashtahuangarin cutana jatun rumi faquirishcata, Abimelec runapaj umapi shuj huarmi cacharijpimi, paipaj uma tullu faquirirca.
54Chaimandami Abimelec runaca, paipaj escudota apashpa purij runataca ucha cayashpa, cashna nirca: “Ñucataca, ama shuj huarmimi huañuchishca ninajuchun, cambaj espadata surcushpa huañuchihuai” nircami. Shina nijpimi, paipaj escudota apashpa purij runa, espadapash huashaman yalijta satijpimi, paica huañurca.
55Israelcunaca, Abimelec runa huañushcata ricushpami, tucuicuna paicunapaj huasicunaman tigranajurca.
56Chashnami Taita Diosca, canchis chunga paipaj huauquicunata Abimelec runa huañuchishpa, paipaj taitata nalita rurashcamandaca llaquichirca.
57Siquem shuti pueblopi causajcuna imashna nalita rurashcashnallatami, Taita Diosca paicunamambash tigrachirca. Shinami Jerobaal shuti runapaj churi Jotam shuti runa, paicuna llaquita apachun nishpa ninanda nalicachishpa villashca shimica pactarca.
Who We AreWhat We EelieveWhat We Do
2025 by iamachristian.org,Inc All rights reserved.
