2 PEDRO 2 - Quichua Imbabura Bible

Llullashpa villajcuna, llullashpa yachachijcuna shamungami(Jud. 3-13)

1Israel puracunapi lullashpa villajcuna tiashcashnallatami, canguna purapipash llullashpa yachachijcuna tianga. Paicunaca, tucuchi tucunaman richunmi, pandata pacalla yachachinga. Apunchi Jesús paicunata quishpichishca cajpipash, paitaca na rijsinichu ninajujpimi, paicunataca ñapash ninan llaqui japishpa tucuchinga.

2Paicuna nalita rurashpa causanajujta ricushpami, ashtacacuna chai nalita ruranata catinajunga. Paicunamandami, na llullashpa villajuj Shimita catinataca nalicachishpa, nali shimicunata rimanajunga.

3Paicunaca, charijyanatalla munashpami, randishpa jatunshna paicuna llujchishca parlocunatalla yachachinajunga. Paicunapaca, pundamandapacha ninanda llaquichi tucunapacha nishcami ña chayamujun. Chingaita chingachinapash chapariajunmi.

4Taita Diosca, angelcuna juchata rurashcatapash na cungashcachu. Ashtahuangarin ucu pachaman shitamushpami, llaquichina punllacaman yana yana ucupi vichai tucushca tiachun churarca.

5Cai pachapi ñaupa punllacunapi gentecuna Diosta na manllashpa, juchata ruranajushcatapash, Diosca na cungarcachu. Paica, cai pachataca ninan tamiahuanmi, tucuillata tucuchishca. Imatapash cashcatapacha rurashpa causanata villaj Noé runagutallami, canchispura gentecunandi quishpichishca.

6Shinallata Sodoma shuti, Gomorra shuti pueblocunapi causajcunatapash, Diosca ninanda llaquichishpami, uchufa tucungacaman rupachishpa, tucuillata tucuchishca. Diosta cunambi na manllashpa causajcunaman ricuchingapajmi, chashna tucuchishca.

7Ashtahuangarin imatapash cashcatapacha ruraj Lot shuti runagutallami quishpichishca. Paica, nali gentecuna millanayaita causanajujta ricushpami, ninanda llaquirishpa causajushca.

8(Imatapash cashcatapacha ruraj Lot runaguca, chai gentecunapaj chaupipimi causajushca. Paicuna nalita rurashpa causanajujta ricushpa uyashpami, paipaj ali almaguhuan punllandi ninanda llaquirijushca).

9Jatun Diosca, paita yariashpa causajcunataca, imatapash nalita rurana munaicunamanda cacharichinmi. Ashtahuangarin imatapash cashcatapacha na rurajcunataca, ninanda llaquichina punllapi llaquichi tucuchunmi, alichishca shuyajun.

10Dios mandajujtapash yangapi churashpa, quiquin munaitalla catishpa, nali munaicunata rurashpa, millanayaita rurashpa causajcunataca ashtahuanmi llaquichinga. Paicunaca, ninanda jariyashpa, na cazushpami, mandana ushaita charijcunatapash, na manllashpa nalita rimanajun.

11Paicunatapash ashtahuan yali ushaita charij angelcunapash, chai mandajcunataca, Jatun Diospaj ñaupajpi paicunata ninanda nalicachishpa llaquichi tucungapachami nishpaca, na rimanllu.

12Ashtahuangarin cai yachachijcunaca, animalcunashna yuyaitapash na charishpa na entendishpa, nalitalla parlajcuna cashpami, japi tucushpa huañuchi tucungapajlla huacharishca. Paicunaca, animalcunashna huañushpami chingaita chingagringa.

13Imatapash cashcatapacha na rurashcamandami, paicunaca japina cashcatallata japinga. Punllandimi nali munaicunata rurashpa, ninanda cushijunajun. Cangunahuan tandanajushpa micunajushpapash, paicunapaj pandarishcahuanmi cushijunajun. Chashnata ruranacunaca, tinirishcashna mapayashcami.

14Paicunapaj ñavihuan ricushpapash, huainayana munaihuanllami ricunajun. Juchata ruranatapash, na aminllu. Chairalla yachajujcunatapash, nalitara yachachishpami pandachinajun. Paicunapaj shungupipash, shujcuna charishcata munashpallami causan. Paicunaca, ninanda nalicachi tucushcacunami.

15Ali causana ñandapash saquishpa, naliman tigrashpami, Beor shuti runapaj churi Balaam shuti runa nalita rurashcatara catishpa, chingashca purinajun. Balaam runaca, nalita rurashpa culquita japingapajmi ninanda munashca.

16Nalita rurangapaj juizu illanshna rijujpimi, na rimaj burroca, genteshna rimashca. Shina rimashpami, Profeta runataca jarcashca.

17Chai yachachijcunaca, chaquishca pugyucunashnami. Fuyuta ninan huaira maimambash apashcashnami. Paicunapaca, yana yanapi causaita causangapaj rinami alichishca shuyajun.

18Paicunaca, ninanda jariyashpami, cacharishcata rimanajun. Shinallata pandata causanajuj puramanda ali causaitapacha mascashpa llujshishca gentecunatapash, quiquin causaipi nali munaicunahuanmi pandachinajun.

19Huatashcashna causajcunata cacharishunmi nishpapash, paicunallatami huaglita rurashpa gañanshna causanajun. Pipash mishai tucushpaca, paita mishajpaj gañanmi tucun.

20Mandaj Quishpichij Jesucristota rijsishpami, cai pachapi mapayashcamandapash, paicunaca ña anchurishca. Shina anchurishca cashpapash, cutin nalitallata rurangapaj tigrashpaca, mishai tucunmi. Chashna cashpami, punda causashcatapash ashtahuan yali nali causanajun.

21Paicunaca, imatapash cashcatapacha rurashpa causana ñanda na rijsishca cashpachari, ashtahuan ali canman carca. Mandashpa yachachishca, jucha illaj Shimita yachashca jahua, nalita rurangapaj tigranallata cashpaca, na yachashpachari ashtahuan ali canman carca.

22Ashtahuangarin paicuna chashna tucujpimi, na llullashpa cashna yarichij shimica pactajun: “Alcumi, shungu tigrachishpalla cutinllata tigrashpa micunlla. Chairalla armashca cuchipash, turupi cutin shitarinllami”.