1 SAMUEL 22 - Quichua Imbabura Bible

1David chaimanda ña rishpaca, Adulam shuti jatun utujupimi pacajungapaj rirca. Paipaj huauquicunapash, paipaj taitapaj huasi ucu purapash, David chaipi cajta yachashpami paipajman shamunajurca.

2Shinallata llaquichi tucushpa tucui causajcunapash, divi tucushpa tucui causajcunapash, paicunapaj shungupi llaquilla tucui causajcunapashmi, paihuan tandanajunajurca. Chaipimi Davidca, paicunata mandaj tucurca. Paica, chuscu patsajshna runacunatami tandachishca charirca.

3Chai pacajushcamandaca, Moab llactapi tiaj Mizpa shuti pueblomanmi Davidca rirca. Chaiman chayashpami, Moab llactata jatun mandajtaca cashna nirca: —Taita Dios ñucata imatalla mandajtapash yachangacaman, ñuca taitatapash, ñuca mamatapash, caipi canhuan causachun saquipai nipanimi— nircami.

4Shina nishpami, Moab llactata jatun mandajpaj ñaupajman pushamurca. Pircashca huashapi, David pacajushpa causajui tucui punllacunacamanmi, paicunaca jatun mandajhuan causanajurca.

5Shina causanajujpimi, profeta Gad shuti runaguca, Davidta cashna nirca: —Pacajungapaj pircashca cai pata huashapica, ama tiajuillachu. Judá llactaman ri— nijpimi Davidca, Haret shuti bosqueman shamurca. Nob pueblomanda curacunatami, Saulca huañuchishca

6Saulca, Gabaa shuti pueblo ladollapi tiaj, loma jahuapi shayajuj tamarisco nishca quiru ucupimi, lanzata chaririaj tiajurca. Chaipica, paita tucui servijcunapashmi, muyundi shayanajurca. Chaipi tiajushpami Saulca, Davidtapash, paipaj cumbacunatapash, shujcuna ricushcata yacharca.

7Chaimandami Saulca, paipaj muyundipi shayanajuj paita servijcunataca, cashna nijurca: —Benjamín aillu runacuna, cunanga uyahuaichi. ¿Isaí shuti runapaj churica, tucui cangunamanllu alpacunata, uvas chagracunata caranga yanguichi? ¿Shinallata tucui cangunatachu huaranga soldadocunata, patsaj soldadocunata mandaj cachun churanga yanguichi?

8¿Chashna yashpachu tucui cangunapash, ñucata fiñashpa pacalla parlarircanguichi? ¿Chaimandachu ñuca churi Jonatanhuan, Isaí runapaj churi Davidhuan, imata rurangapaj ari ninajushcata yachashpapash, maijanllapash na villahuarcanguichi? Cangunaca, maijanllapash ñucataca na llaquishpami puringuichi. Chaimandami, ñucata servij David ñucata fiñashpa jatarichun, ñuca churillata imashna yachachishcata yachashpapash, na villahuarcanguichi. Paitaca, ñucata pacalla chapachunmi yachachishca. Cunanga, paica chaitami rurajun— nijurcami.

9Shina nijpimi, Saulta servijcunata mandaj, Edom llactamanda Doeg shuti runaca, cashna nirca: —Ñucami, Isaí shuti runapaj churitaca, Nob shuti pueblopi causajuj Ahitob shuti runapaj churi Ahimelec shuti runapajman shamujta ricurcani.

10Chaipimi Ahimelec runaca, David imatalla ruranataca, Mandaj Diosta tapurca. Chai jipaca micunacunatapash, Goliat shuti filisteo runapaj espadatapashmi curca— nircami.

11Shina nijpimi jatun mandajca, Ahitob runapaj churi Ahimelec curatapash, paipaj taitapaj tucuilla familiacunatapash, Nob shuti pueblomanda curacunatapash, cayachun cacharca. Shina cayajpimi, jatun mandajpajman tucuilla shamurca.

12Chaipimi Saulca: —Ahitob runapaj churi, cunanga ali uyahuai— nirca. Shina nijpimi, Ahimelec runaca: —Caipimi capani, ñucata mandajlla— nirca.

13Shina nijpimi Saulca, cashna nirca: —¿Imashpata canhuan, Isaí runapaj churihuanga, ñucata llujchingapaj pacalla parlarircanguichi? Tandatapash, espadatapash cushpami, David imatalla ruranatapash, Taita Diosta tapushcangui. Chaitaca, ñucata fiñashpa jatarishpa, ñucata pacalla chapashpa purichunmi, chashna rurashcangui. Cunan punllapica, paica chaitami rurajun— nircami.

14Shina nijpimi Ahimelec runaca, jatun mandajtaca cashna nirca: —Tucuilla canda servij puramandaca, can jatun mandajpaj masha Davidshna can imata mandashcatapash, tucuita pactachij runaca, ¿pita tianyari? Paica, can mandashpa tiajuna huasipipash, tucuicuna alicachijpimi causan.

15¿Ñucaca, Davidmanda Taita Diosta tapunataca, cunanllu callarishcani? Napacha shinachu. Jatun mandajlla, canda servij ñucatapash, ñuca taitapaj tucui familiacunatapash, ama yangaca juchachijuichu. Canda servij ñucaca, chaicunataca ali cajtapash yangalla cajtapash nimata na yachapanichu— nircami.

16Shina nijpimi jatun mandaj Saulca, cashna nirca: —Ahimelec runa cambash, cambaj taitapaj tucui huasi ucu purapash huañunapachami canguichi— nircami.

17Shina nishpallami jatun mandajca, paita muyundi cuidashpa shayanajuj soldadocunataca, cashna nirca: —Mandaj Diospaj curacunataca, tigrarishpa huañuchichi. Paicunapashmari, Davidtaca tandanajushpa ayudanajushca. Chaimandami, pai pacajushpa rijujta yachashpapash, na villahuashca— nircami. Shina nijpipash, jatun mandajta servijcunaca, Mandaj Diospaj curacunata huañuchingapaca na munarcachu.

18Chaimandami jatun mandajca, Doeg shuti runataca: —Can tigrarishpa, curacunata huañuchi— nishpa mandarca. Shina mandajpimi, Edom llactamanda Doeg shuti runaca, linota rurashca efod nishcata churajushca pusaj chunga picha curacunata, chai punllallata huañuchirca.

19Chai jipaca, curacuna causanajuj Nob shuti puebloman rishpami jaricunata, huarmicunata, huahuacunata, chuchujuj huahuacunatapash chugrichishpa huañuchijurca. Shinallata huagracunata, burrocunata, llamacunatapashmi, espadahuan chugrichishpa tucuillata huañuchijurca.

20Shina huañuchijujpimi, Ahitob runapaj churi Ahimelec runapaj churi puramanda Abiatar shuti shuj runaca, quishpirishpa Davidta catishpa rirca.

21Abiatar shuti runaca, Mandaj Diospaj curacunata Saúl imashna huañuchishcatami, Davidman villarca.

22Chaimandami Davidca, Abiatar shuti runataca cashna nirca: —Chai punlla ñuca chaipi cashpallatami, Edom llactamanda Doeg shuti runa, Saulman villanataca yacharcani. Cambaj taitapaj tucui familiacunaca, ñucamandami huañuchi tucushca.

23Canga ama manllaichu, ñucahuan quedailla. Ñucata huañuchingapaj mascaj runaca, candapashmi mascanga. Can ñucahuan cashpaca quishpiringuimi— nircami. Davidca, jichushca pambapimi purijushca