APOCALIPSIS 6 - Quichua Imbabura Bible

Canchispi sellashca librotaca, Llamami pascashca

1Canchis sellocunahuan librota sellashcataca, shuj sellashcata chai Llama fitijtami ricurcani. Shina fitijpimi, causaita charij chai chuscu animal puracunamandaca, shuj animalca culun ninshna caparishpa: “Shamui, ricungui” nihuarca.

2Shina nijpimi, ñapash shuj yuraj caballota ricurcani. Chai caballopi tiajujca, shuj flechatami charijurca. Paimanmi, shuj coronatapash curca. Paica, ña mishashcami carca. Ashtahuan mishangapajmi llujshijurca.

3Cati sellashcata fitijpica, causaita charij cati animalpashmi: “Shamui, ricungui” nijta uyarcani.

4Chaipica, pucayajuj caballomi llujshirca. Chai caballopi tiajujmanmi, cai pachapi causajcuna casilla ali causaita quichuna ushaita curca. Shinallata caishujhuan chaishujhuan huañuchirinajuchunmi, shuj jatun espadatapash paiman curca.

5Ishcaipaj cati sellashcata chai Llama fitijpica, causaita charij chai ishcai animalpaj cati animalpash: “Shamui, ricungui” nijtami uyarcani. Shina nijpimi, ñapash shuj yana caballota ricurcani. Chai caballopi tiajujca, balanzatami maquipi chariajurca.

6Causaita charij chuscu animalcunapaj chaupimandaca, cashna nijujtami uyarcani: “Ishcai libra trigoca, shuj denario culquimi valijunga. Sucta libra cebadapash, shuj denariollatami valijunga. Ashtahuangarin aceiteta, vinotaca, na huaglichinachu cangui” nijurcami.

7Quimsapaj cati sellashcata chai Llama fitijpica, quimsa animalpaj cati animalpash: “Shamui, ricungui” nijtami uyarcani.

8Shina nijpimi, ñapash shuj quillu caballota ricurcani. Chai caballopi tiajujca, Huañuchina nishca shutitami charirca. Shinallata Hades nishcami, paipi catiriaj llujshimurca. Cai pachata chuscupi chaupishpami, chai chuscumanda shuj chaupipi causaj gentecunataca espadahuan, ninan yarjaihuan, jatun ung:uihuan, cai pachapi tiaj millai animalcunahuambash huañuchina ushaita curca.

9Chuscupaj cati sellashcata chai Llama fitijpica, altar ucupi Taita Diospaj Shimita chashnapachami nishpa aliguta villanajushcamanda huañuchi tucushca almacuna, altar ucupi tianajujtami ricurcani.

10Paicunami, cashna nishpa ninanda caparinajurca: “Jatun Dioslla, canga jucha illaj, na llullajmi cangui. Alpapi causajcuna yahuarta jichashpa ñucanchita huañuchishcamandaca, ¿ima horacamanda paicunatapash, shinallata llaquichigripangui?” ninajurcami.

11Shina ninajujpimi, paicunaman yuraj churajunacunata carashpa, cashna ninajurca: “Asha huatacaman shuyanarami canguichi. Cristota servinajuj crijcunapash, cangunashnallata huañuchi tucunarami. Diosca, pai cuentashca pactangacamanmi shuyajun. Chaicamanmi shuyana canguichi” ninajurcami.

12Pichapaj cati sellashcata chai Llama fitijpica, ñapash alpa mama ninanda cuyushpa tucuchijujtami ricurcani. Indipash yana yana, cañamu telashnami tucurca. Shinallata lunapash, yahuarshna puca pucami tucurca.

13Ninanda huairashpa jigos yurata cuyuchijpi jigoscuna urmanshnami, jahua pachamanda luzerocunapash, cai pachaman urmamurca.

14Jahua pachapash, papel pillurinshnami tucurirca. Tucuilla urcucunapash, mama cucha chaupipi tiaj llactacunapash, paicuna tiajuj pushtumandaca anchurircami.

15Shinallata cai pachapi jatun mandajcuna, jatunguna, ninan charijcuna, soldadocunata mandajcuna, ushaita charijcuna, tucui gañanguna, na gañangunapash, tucuillami jatun utujucunapi, urcucunapi tiaj huaicucunapi pacajunajurca.

16Paicunaca, chai urcucunata, huaicucunatami cashna ninajurca: “Mandangapaj tiarinapi tiajuj ñucanchita ricujujpi, quilpashpa pacahuaichiyari. Shinallata Llamapash ninanda fiñashpami, ñucanchitaca llaquichijun.

17Cunanga, paicuna ninanda fiñashpa llaquichimui punllamari pactamushca. Cashnapacha llaquipica, ¿pita shayari ushangayari?” ninajurcami.