HECHOS 23 - Quichua Imbabura Bible

1Chai mandajpura tandanajushcata ricushpami, Pabloca cashna nirca:

—Huauquicuna, cunan punllacamanmi Taita Diospaj ñaupajpica, ali yuyaihuambacha ali cazushpa causajuni— nircami.

2Shina nijpimi curacunata mandaj Ananías shuti runaca, Pablota shimipi huactaichi nishpa, paipaj ladopi shayajcunataca mandarca.

3Shina nijpimi Pabloca, cashna nirca:

—¿Canga, mandashca shimipi nijunshnachu ñucata tapuchingapaj tiajungui? ¿Canga, mandashca shimita na cazushpachu, ñucata huactachun mandangui? Pirca jahualla yurajyachishca runalla. Shinamandami, Taita Diosca candapash huactanga— nircami.

4Shina nijpimi, chaipi tiajcunaca:

—¿Taita Dios churashca mandaj curatachu chashna nalicachishpa rimangui?— ninajurca.

5Shina nijpimi Pabloca, cashna nirca:

—Huauquicunalla, paica curacunata mandaj cajtaca, na yachapashcanichu. Dios escribichishca Shimipica: ‘Cambaj llactapi mandajtaca, ama nalicachinguichu’ nijunmi— nircami.

6Pablo chashna nijushpaca, chai tandanajushca puracunapi, huaquingunaca saduceocuna, huaquingunaca fariseocuna tianajujtami ricurca. Shina ricushpami, tucuicunata shinlli rimashpa cashna nirca:

—Huauquicunalla, ñucaca fariseo runapaj churi cashpami, ñucapash fariseo cani. Huañushcacuna causarinata cushijushpa shuyajushcamandami, cashna tapuchi tucujuni— nircami.

7Shina nijpimi fariseocunahuan, saduceocunahuan paicunapura ninanda fiñanajurca. Shina fiñanajushpami, chaipi tandanajushca tiajcunaca chaupirirca.

8Saduceocunaca, huañushcacuna causarinata, angelcuna tiajta, espiritucuna tiajtapash na crinllu. Ashtahuangarin fariseocunaca, chai tucui tiajtami crin.

9Paicuna purami, ashtahuan ninanda caparirca. Shina cashpami, mandashca shimita yachachij fariseo puramanda huaquinguna fiñarishpa jatarishpaca, cashna ninajurca:

—Cai runa ima nalita rurashcapash, na ricurinllu. Ashtahuangarin shuj espíritu cashpa, na cashpaca shuj ángel cashpapash, paiman rimashca cajpica, Taita Diostaca na fiñachinachu canchi— ninajurcami.

10Paicunapura ninanda fiñanajujpimi, huaranga soldadocunata mandaj runaca, Pablota ñutushpa huañuchinataca manllarca. Shina manllashpami, soldadocunataca: “Paicunapaj chaupimanda Pablota llujchishpa, canguna tianajuj shinlli torreman apaichi” nishpa mandarca.

11Chai tutallatami Apunchi Jesusca, Pabloman ricurishpa cashna nirca: “Pablo, ama manllaichu. Imashnami Jerusalenbi ñucamanda villajurcangui, chashnallata Roma pueblopipash villagrinapachami cangui” nircami.

Pablota huañuchingapajmi yarinajushca

12Chai tutamandami, Judea llactapi causanajuj huaquin runacunaca, shujllashnalla yarishpa cashnata rurashunchi ninajurca: “Cunanga, Pablota huañuchingacaman na micushpa, na ufiashpami shuyana canchi. Chaita na pactachishpaca, ima llaquipash japishpami ali canman” nishpami juramentunajurca.

13Chashna huañuchingapaj munashpa juramentushca runacunaca, chuscu chunga yalishnami carca.

14Paicunaca, curacunata mandajcunapajman, mandaj rucucunapajman rishpami cashna ninajurca:

—Ñucanchica, chaita na pactachijpica, ima llaquipash japishpami ali canman nishpami, cashna juramenturcanchi: ‘Pablota huañuchingacaman, imatapash na micunachu canchi’ nircanchimi.

15Cunanga, cashna rurashunchi: Mandaj puralla cangunapura tandanajushpa, huaranga soldadocunata mandajtaca: ‘Pablota ashtahuan ali tapuchingapaj, cayapaca apamupai’ nij tucupaichi. Ñucanchica, chaupi ñambimi huañuchingapaj chapanajushun— ninajurcami.

16Chashna pacalla chapashpa huañuchingapaj yarishcataca, Pablopaj panipaj churimi uyarca. Paimi, soldadocuna tiaj shinlli torreman yaicushpa, Pabloman villarca.

17Shina villajpimi, patsaj soldadocunata mandaj puramanda shuj runata Pablo cayashpa, cashna nirca:

—Cai huambragutaca, huaranga soldadocunata mandajpajman pushapai. Paimi, shuj villanata charipan— nircami.

18Shina nijpimi, huaranga soldadocunata mandajpajman chai huambrata pushashpaca cashna nirca:

—Prezu tiajuj Pablomi ñucata cayashpa, cai huambrataca cambajman pushapai nihuan. Canman imatachari villanata charin ninmi— nircami.

19Shina nijpimi mandaj runaca, chai huambrata maquimanda ashaguta pushashpa:

—¿Imatata villagrihuangui?— nishpa tapurca.

20Shina tapujpimi chai huambraguca, cashna nirca:

—Mandaj puralla tandanajushpa, Judea llactapi causajcunaca, Pablota ashtahuan ali tapuchishun nij tucushpallami: ‘Paicunapajman caya punlla pushamupai’ nishpa, canda mingangapaj parlarinajun.

21Ashtahuangarin chashna nishpa shamujpipash, ama umai tucupanguichu. Runacunaca, chuscu chunga yalimi huañuchingapaj chapagrinajun. Paicunaca, cashna nishpami juramentushca: ‘Pablota huañuchingacaman na micushpa, na ufiashpa shuyanami canchi. Chaita na pactachijpica, ima llaquipash japishpami ali canman’ ninajunmi. Cunanga, can imata nijtallami shuyashpa chapagrin— nircami.

22Chai mandajman chashna villajpimi:

—Ñucaman cashna villashcataca, pacta pimambash villanguiman— nishpa, chai huambrataca tigrachirca.

Mandaj Félix runapajmanmi, Pablotaca cachashca

23Patsaj soldadocunata ishcai mandajcunata cayashpami, huaranga soldadocunata mandaj runaca cashna nirca: “Cunan tutayashcapi, Cesarea shuti puebloman richunga, chaquilla rij ishcai patsaj soldadocunata tandachinguichi. Shinallata caballopi tiarij canchis chunga soldadocunatapash, lanzata charij ishcai patsaj soldadocunatapash tandachinguichi.

24Pablo tiarichumbash, caballocunata alichishpa cunguichi. Paitaca, mandaj Félix shuti runapajman llaquipash illajta chayachinguichi” nircami.

25Félix shuti runaman cuchunmi shuj cartatapash, cashna nishpa escribirca:

26“Claudio Lisias ñucami, ninanda alicachi tucushca mandaj Félix quiquindaca, alillachu causajupangui nishpa cachamupani.

27Cai runataca huañuchingapajmi, Judea llactapi causajcunaca japishpa charishca carca. Paitaca, Roma llactapura cajta yachashpami, soldadocunahuan rishpa cacharichircani.

28Imamanda chashna juchachinajujta yachangapaj munashpami, mandaj puralla tandanajushcapaj ñaupajman pusharcani.

29Chaipimi, mandashca shimicunata na pactachinllu nishpalla juchachinajurca. Ñucapica, paica huañuchi tucungapaca, ima nalitapash na rurashcachu carca. Prezuna huasipipash, na churanashnami carca.

30Ashtahuangarin: ‘Judea llactapi causajcunamari, cai runataca huañuchingapaj pacalla chapanajun’ nishpami villahuarca. Chaimandami, cambajman ucha cachamuni. Paita huañuchingapaj munajcunataca, cambaj ñaupajpi imatapash nigrichi nircanimi. Caicunata nishpallami, cayacaman” nishpa escribirca.

31Chai soldadocunaca, paicunata mandashcashnallatami Pablotaca, chai tutallata pushashpa, Antípatris shuti pueblocaman rirca.

32Chai cayandi punllami, chaquilla rij soldadocuna, caballopi rij soldadocuna, Pablota pushashpa richun saquishpa, shinlli torreman tigramurca.

33Chai cayandi punlla Cesarea shuti puebloman chayashpaca, mandajman cartatara punda cushpami, Pablotapash cushpa paipaj ñaupajpi saquirca.

34Cartata chai mandaj leyishpaca:

—¿Maimandata cangui?— nishpami, Pablotaca tapurca.

Shina tapujpimi:

—Cilicia shuti llactamandami capani— nirca.

35Shina nijpica:

—Canda juchachijcuna shamujpimi, can imata nijtapash uyasha— nirca.

Shina nishpaca, Herodes rurashca jatun huasipi Pablota churashpami, soldadocuna cuidachun cacharca.