JEREMÍAS 30 - Quichua Imbabura Bible

Taita Diosca, prezu causajcunaca tigrangapachami nishcami

1Mandaj Diosca, cai shimicunatami Jeremiasman cashna nishpa villarca:

2Israelcunata Mandaj Taita Diosca, cashna nishpami rimarca: “Ñuca canman rimashca tucui shimicunataca, tucuillata shuj libropi escribi.

3Mandaj Dios ñucami, cashna nini: Ricui, ñuca agllashca Israel puramanda, Judá llactapi causaj puramanda, prezu apai tucushcacunata tigrachimuna punllami chayamujun. Paicunapaj ñaupa taitacunaman ñuca carashca cai llactamanmi pushamusha. Caipimi aligutapacha causanajunga” nircami Mandaj Diosca.

4Caicunami Israel llactapi, Judá llactapi causajcunamanda, Mandaj Dios rimashca shimicuna.

5Mandaj Diosca, cashnami nijurca: “Paicunaca: ‘Casilla ali causaimi tianga nishpa caparijtaca na uyashpami, ninanda manllarishpa chujchushpa caparinajujta uyarcanchi’ ninajunmi.

6¿Shuj jari runaca, huahuata ungunllachu? Cunanga, chaita tapushpa yachaichi. Ñucaca, tucui jaricunatami unguna nanaihuan huarmishna, cinturasta llapirinajujta ricurcani. Tucuicunami, ñavipash quillu quillu tucunajurca.

7¡Aij chai punllacunapica, jatun llaquimari cagrin! Ima horapash na tiashca, ninan llaqui punllami chayamugrin. Jacobopaj miraicunapaca, ninan llaqui huatacunami canga. Ashtahuangarin paicunaca, chai llaquimandaca cacharichi tucungami.

8Tucuita Mandaj Diosca, cashnatapashmi nin: Chai punllapica, ñucami cangunapaj cunga tullupi tiajuj yugota faquisha. Cangunata yugushpa huatashcatapashmi fitisha. Chashna rurajpimi, shuj llactapi causajcunaca, na ashtahuan gañanda rurashpa charinga.

9Ashtahuangarin paicunata Mandaj Taita Diosta, paicunata jatun mandaj Davidtapashmi servinajunga. Paitami, mandaj cachun churasha” nijurcami.

10Mandaj Diosca, cashnatapashmi nin: “Ñucata servij Jacobopaj miraicunalla, na manllanachu canguichi. Can israelcunaca, ashallatapash na manllarinachu canguichi. Ricuichi, ñucami cangunataca cangunapaj miraicunandi, prezu causanajuj caru llactamanda quishpichimusha. Shinami Jacobopaj miraicunaca, aliguta samashpa causanga. Paicunataca, pipash na manllachingachu.

11Ñucaca, cangunata quishpichingapaca cangunahuanmi cani. Ñucami cangunataca, caiman chaiman shuj llactacunaman cacharcani. Chai tucui llactacunatami tucuchisha. Ashtahuangarin cangunataca, na tucuchishachu. Imashna llaquichina cashcatallami llaquichisha. Cangunata llaquichinataca, napacha saquishachu” ninmi Mandaj Diosca.

12Mandaj Diosca, cashnatapashmi nin: “Cambaj jatun llaquica, na alichi ushanallami. Cambaj chugrica, ninanda nanachij chugrimi.

13Cambaj llaquita ricushpa alichingapaj mandajca, pipash na tianllu. Cambaca, ima jambi chayanapash na tianllu.

14Canda tucui juyajcunapash cungarcami. Candaca, pipash na mascanllu. Candaca, fiñaj runashnami chugrichircani. Canllata, yapa jatun nalita rurashcamanda, ashtaca juchacunata rurashcamandami, na llaquishpa ninanda fiñaj runashna astircani.

15Canda ninanda llaquichishcamandaca, ¿imashpata ninanda caparijungui? Cambaj nanaica, na jambinallachu. Canllata yapa jatun nalita rurashcamanda, ashtaca juchacunata rurashcamandami, chashna llaquichircani.

16Shina cajpipash canda tucuchijcunaca, tucuillami tucuchi tucunga. Canda tucui fiñajcunami, tucuilla prezu rinajunga. Canda sarujcunapashmi, sarui tucunajunga. Imatalla can charishcacunata tucui quichujcunatapash, shujcuna quichunajuchunmi saquisha.

17Ashtahuangarin can ali tucunata ñucallata cachamushpami, cambaj chugricunataca alichisha. Candaca, shitashcami sirin nishpami: ‘Cai Sion shuti pueblotaca, pipash na yarinllu’ ninajun” ninmi Mandaj Diosca.

18Mandaj Diosca, cashnatapashmi nin: “Ricuichi, Jacobopaj carpacunamanda prezu apai tucushcacunataca tigrachimushpami, paicunapaj carpacunataca llaquisha. Lomapi tiashca pueblopash, chai lomapillatami shayachi tucunga. Ñuca huasipash, punda imashna cashcashnallatami shayachi tucunga.

19Paicuna pashi ninajushcapash, ninanda cushijushca gentecuna caparinajujmi uyaringa. Paicunataca, ashtacatami mirachisha. Shinamandami, huaquinllapash na huañuchi tucunga. Paicunataca, ñuca mirachishcamanda na yangapi churai tucungachu.

20Paicunapaj huahuacunaca, pundashnallatami canga. Paicuna tandanajushcapash, ñuca ñaupajpica shinllipachami canga. Paicunata llaquichishpa charijcunataca, tucuillatami llaquichisha” ninmi.

21Mandaj Diosca, cashnatapashmi nin: “Paicuna puramandallatami, paicunata mandajca llujshinga. Paicunata mandajca, paicunapaj chaupimandallatami llujshinga. Paitaca, ñucapajman quimirichun saquijpimi, ñucapajman quimirimunga. Ñucapajman quimirimuitaca, pipash na ushanllu.

22Cangunaca, ñuca agllashcacunami canguichi. Ñucapash, cangunapaj Taita Diosmi casha” ninmi.

23Ricuichi, Mandaj Dios cachamushca ninan huairahuan tamiashna llaquica, ninanda fiñarishpami llujshimunga. Pai alichishca charijuj ninan huairahuan tamiashna llaquica, paita na manllajcunapaj jahuapimi urmamunga.

24Mandaj Dios ninanda fiñarishpa llaquichinataca, paipaj shungupi imashna yarijushcata rurashpa pactachingacaman, napacha ali tucungachu. Tucurimui punllacunapimi, chaitaca yachanguichi.