1 TESALONICENSES 5 - Quichua Imbabura Bible

1Huauquicuna, panicuna, ima huata, ima punlla chashna tucunata cangunaman escribichunga, na shuyanachu canguichi.

2Tuta shuhua shamunshnami, Apunchi Jesusca ñapash shamunga. Chaitaca, cangunallata alipachami yachanguichi.

3“Casilla aliguta, imatapash na manllashpami causanajunchi” ninajujpimi, ñapash tucuchij llaquica, ungunalla huarmita nanai japinshna japinga. Chai jatun llaquimandaca, pipash na pacajui ushangachu.

4Ashtahuangarin huauquicuna, panicuna, cangunaca Jesús shamuna punllapash, shuhua shamunshna ama cungashcapi japij shamuchunmi, yana yana tutapishnaca na causanajunguichi.

5Cangunaca, tucuillami michapaj huahuacuna, punllapaj huahuacuna canguichi. Na yana yana tutapajchu canchi.

6Shinamandami, caishujcuna puñunajunshnaca, na causana canchi. Ashtahuangarin ñucanchica, aliguta yarishpa rijchariajmi causana canchi.

7Puñujcunaca tutami puñun, machajcunapash tutami machan.

8Ashtahuangarin ñucanchica, punllapaj cashcamanda, aliguta yarishpami causana canchi. Shunguta pacangapaj jirru churajunata soldado churajunshnami, crishcatapash juyanatapash churajushca causana canchi. Shinallata umapipash jirruta churajunshnami, quishpirinata yariashpa shuyana canchi.

9Taita Diosca ñucanchitaca, ninanda fiñashpa llaquichingapaca, na agllarcachu. Ashtahuangarin ñucanchi Apunchi Jesucristomanda quishpirinata japichunmi agllarca.

10Causashpapash, huañushpapash paihuan causachunmi, Jesucristoca ñucanchimanda huañurca.

11Ashtahuan aliguta catingapajmi, cangunaca caishuj chaishuj aliguta yarichirina canguichi. Chaitaca ñami ruranajunguichi.

Crijpura aliguta causachunmi, Pabloca yachachishca

12Huauquicuna, panicuna, canguna purapi yachachijcunaman imagutapash cushpa alicachipanguichi nishpami ninanda mañapanchi. Paicunaca, Apunchi Jesusmandami, cangunataca shinlli tacurishpa cuidanajun.

13Paicuna imagutalla rurashcamandaca, ninanda alicachishpa, ninanda juyashpa charipanguichi nipanimi. Canguna purapash, casilla ali causaigutami charina canguichi.

14Huauquicuna, panicuna, yanga yanga causangapaj munajcunataca, shinlli tacurichunmi ninanda mañapanchi. Shinallata na catinayanllu nijcunatapash ayudapanguichi. Nara ali shinlli crijcunatapash yachachipanguichi. Pitapash ama ñapash fiñashpa yachachipaichi nipanchimi.

15Cangunata nalita rurashcamanda, maijambash ama chashnallata tigrachijuchun ricurianami canguichi. Ashtahuangarin caishuj chaishuj, tucuicunaman alitalla rurashpami catina canguichi.

16Punllandimi ninanda cushijushpa causana canguichi.

17Taita Diosta mañanataca, na saquinachu canguichi.

18Imamandapash Taita Diostaca, pashi ninajunallami canguichi. Cangunataca, Cristo Jesusmandami Taita Diosca, chashna causachun munan.

19Diospaj Espíritu imata nijujtapash, pactara jarcanguichiman.

20Pactarallapash Dios ima nishcata villajcunata, yangapi churanguichiman.

21Ali cajta, nali cajta tucuita aliguta yarishpa uyapanguichi. Imatapash aliguta yachachishcatallami chasquina canguichi.

22Tucui ima nalimandapash, jarcarinami canguichi.

23Casilla ali causaiguta caraj Taita Diosllata paipajlla causanatapash carachun. Cangunapaj tucui causaita, espirituta, almata, cuerpotapash ama juchachi tucushca cachun, ñucanchi Apunchi Jesucristo tigramuna punllacaman alichishpa charichun.

24Cangunata juyashpa cayaj Diosca, tucuita pactachij cashpami, cashna nishcataca tucuillata ruranga.

Aliguta causapanguichi, Dios bendiciachun nishpami tucuchishca

25Huauquicuna, panicuna, ñucanchimanda Diosta mañapanguichi.

26Tucui crijcunatami, ima nalitapash na yarishpa muchashpa, alillachu capangui nina canguichi.

27Cai cartataca, Diospajlla causanajuj tucui crijcunapash uyachun leyipaichi nishpami, Apunchi Jesuspaj shutipi cangunata juramentuchini.

28Ñucanchi Apunchi Jesucristopaj ninan juyaipash cangunahuan cachunmi munani. Shina cachun.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help