2 CRÓNICAS 9 - Quichua Imbabura Bible

Sabá shuti llactata jatun mandaj huarmimi, Salomonda ricungapaj rishca(1 Rey. 10:1-13)

1Sabá shuti llactata jatun mandaj huarmica, Salomonda alicachishpa tucuicuna parlanajujta uyashpami, ashtaca gentecunata catichishpa Jerusalenman shamurca. Chai huarmica, mishquillagu ashnajuj jambicunata, ashtaca orota, juyailla rumicunata camellocunapi apachishpami, na tigrachi ushanalla tapunacunata Salomonda tapushpa yachangapaj shamurca. Salomonbajman chayamushpaca, paipaj shungupi tucui imatalla yarijushcatami parlajurca.

2Ashtahuangarin Salomonga, chai huarmi tapushcataca tucuillatami tigrachijurca. Salomón na tigrachi ushanaca, imallapash na tiarcachu.

3Sabá shuti llactata jatun mandaj huarmica, ali yachaita Salomón charijtapash, paipaj huasita shayachishcatapashmi ricujurca.

4Paipaj mezapi micunacunata, paita servijcuna causana ucucunata, culquipaj servijcunata, paicuna churajushcata, paiman micunata yalichijcunata, paicuna churajushcacunatapashmi ricujurca. Shinallata Mandaj Diospaj huasiman maita vitsianatapashmi ricujurca. Chaita ricushpami, ninanda manllarishpa ricunman quedarca.

5Chaimandami jatun mandajtaca, cashna nijurca: “Ñuca llactapi cashpallatami, can imatalla rurashcatapash, can alipacha yachajushcatapash uyarcani. Chaica na llullachu cashca.

6Ashtahuangarin ñuca caiman nara shamushpaca, paicuna parlashcataca na crijurcanichu. Cunan ñuca ñavihuambacha ricushpami crini. Ricui, can alipacha yachajushcataca, chaupitallapash na parlahuashcachu. Canda alicachishpa parlanajujta ñuca uyashcataca, ashtahuan yalitami ricujuni.

7Cambaj runacunaca, ninanda cushijushcami. Cambaj ali yachaita, cambaj ñaupajpi punllandi uyaj, canda servij cai runacunaca, ninanda cushijushcami.

8Canda Mandaj Taita Diosca, alicachi tucushca cachun. Paica canda alicachishpami, canda Mandaj Taita Diosta servishpa jatun mandaj cachun, pai mandashpa tiarinapi churashca. Cambaj Taita Diosca, israelcunata juyashpami, causaita causaicaman paipajlla cachun shinllitapacha churashca. Chaimandami candaca, paicunata jatun mandaj cachun churashca. Aliguta ricushpa, imatapash cashcatapacha rurashpa mandachunmi churashca” nijurcami.

9Shina nishca jipami, pusaj chunga shuj quintal orota, mishquillagu ashnajuj ashtaca jambicunata, juyailla rumicunata, jatun mandajman cararca. Sabá shuti llactata jatun mandaj huarmi, jatun mandaj Salomonman mishquillagu ashnajuj jambicunata apamushcashnaca, ima horallapash nara tiarcachu.

10Shinallata Hiram shuti runata servijcunapash, Salomonda servijcunapash, Ofir shuti llactamandami orota apamushca carca. Paicunallatami, sándalo nishca caspicunatapash, juyailla rumicunatapash apamunajurca.

11Chai sándalo caspicunahuanmi jatun mandajca, Mandaj Diospaj huasipipash, pai mandashpa tiajuna huasicunapipash, gradasta rurachirca. Candajcunamambashmi arpacunata, salteriocunata rurachirca. Chashna ashtaca caspicunataca, ima horallapash Judá llactapica nara ricushcachu carca.

12Jatun mandaj Salomonga, Sabá shuti llactata jatun mandaj huarmi, tucui imata munashpa mañashcatami cararca. Jatun mandajca, pai jatun mandajman chai huarmi imatalla apamushcatapash yalitami cararca. Chai jipaca, chai mandaj huarmica, paita servij runacunandi, paipaj llactaman tigrarcallami.

Salomonga, ninan charij alipacha rijsishcami cashca(1 Rey. 10:14-29; 2 Crón. 1:14-17)

13Huatapi huatapimi, chuscu patsaj picha chunga quimsa quintal orota, Salomonman apamunajurca.

14Randishpa jatushpa purijcunapash, chai llactapi imatalla jatushpa purijcunapash, Arabia llactata tucui jatun mandajcunapash, pai mandajuj llactapi churashca mandajcunapash orota, culquita Salomonman apamushcatacarin, na cuentashcami carca.

15Jatun mandaj Salomonga, ishcai patsaj jatun escudocunatami, orota tacashpa rurachirca. Tucui escudopimi, sucta kilo chaupi yalita pezaj ashtahuan ali orota labrachishpa churarca.

16Shinallata quimsa patsaj uchilla escudocunatapashmi, orota tacashpa rurachirca. Chaicunapica, tucui escudopimi, quimsa kilo chaupitashna pezaj orohuan rurashca carca. Chaicunataca jatun mandajca, Líbano shuti urcu caspicunahuan shayachishca huasipimi alichirca.

17Jatun mandajca, mandangapaj shuj jatun tiarinatapash, marfilmandami rurachirca. Chaitaca, ashtahuan ali orohuanmi jahualla quilparca.

18Chai tiarinaman vitsiangapaca, sucta gradasmi tiarca. Chaquita samachinatapash, chai tiarinapillata oromanda rurashcami carca. Rigrata samachinapash, chai tiarina ishcandi ladomanmi tiarca. Rigrata samachina chai ishcandi ladomambash, ishcai leondami rurashca carca.

19Chai sucta gradaspipash, chunga ishcai leondami, tucui gradaspi ishcandi ladoman shuj shuj churashca carca. Chashna tiarinataca, maijan mandajuj llactapillapash, ima horapash na rurashcachu carca.

20Jatun mandaj Salomonbaj tucui platocunapash, oromanda rurashcami carca. Shinallata Líbano shuti urcu caspicunahuan shayachishca huasipi tiaj tucui platocunapash, ashtahuan ali oromanda rurashcami carca. Salomón mandajui punllacunapica, culquitaca na munanllu carca.

21Jatun mandaj Salomonbaj jatun barcocunaca, Hiram shuti runata servijcunahuanmi, Tarsis shuti llactaman rin carca. Chai barcocunapica orota, culquita, marfilta, monocunata, pavo realcunata apamushpami, quimsa huatapi muyumunajun carca.

22Jatun mandaj Salomonga, llactacunata tucui jatun mandajcunatapash yali charij, alipacha yachajushcami carca.

23Llactacunata tucui jatun mandajcunami, Salomonbaj ñavita ricungapaj munan carca. Taita Dios carashca ali yachaihuan rimashcata uyangapajmi, chashna munan carca.

24Tucui paicunami, paiman carangapaca culquimanda, oromanda rurashca juyailla charishcacunata, churajunacunata, macanajunacunata, mishquillagu ashnajuj jambicunata, caballocunata, jari mulacunata huatan huatan apamunajun carca.

25Salomonga, paipaj caballocuna shayanajuchumbash, macanajuna carretacunata churangapajpash, chuscu huaranga huasitami charirca. Caballopi tiarij chunga ishcai huaranga soldadocunatapashmi charirca. Paicunatami huaquingunataca, macanajuna carretacunata alichishca pueblocunapi, shujcunataca pai jatun mandajta cuidanapi, Jerusalenbi churarca.

26Salomonga, Eufrates shuti jatun yacumandaca, filisteocunapaj llactacaman mandanajuj jatun mandajcunataca, tucuillatami mandashpa charirca. Shinallata Egipto llacta linderocamanmi, mandashpa charirca.

27Jatun mandajca, culquitaca rumitashna ashtacatapachami Jerusalenbi tandachirca. Cedro caspitapash, Sefela shuti pambapi tiaj sacha jigos yuracunatashna ashtacatapachami charirca.

28Shinallata caballocunataca Egiptomandapash, tucui caishuj llactacunamandapashmi Salomonman apamunajurca.

Salomón huañushcatami villajun(1 Rey. 11:41-43)

29Punda punllacuna, jipa punllacuna Salomón ashtahuan imatalla rurashcapash, ¿nachu Dios ima nishcata villaj Natán shuti runa escribishca librocunapi, Silo shuti pueblopi causajuj Ahías shuti runaman Dios villashcata escribishca libropi tucuilla tiajun? ¿Nachu Dios ricuchishcata villaj Iddo shuti runata, Nabat shuti runapaj churi Jeroboam shuti runata llaquichinata Dios villashcata escribishca libropipash tiajun?

30Salomonga, tucui Israel llactataca, chuscu chunga huatatami Jerusalenbi mandajurca.

31Salomón huañushpa, paipaj ñaupa taitacunahuan tandanajujpica, paipaj taita Davidpaj pueblopimi pambarca. Paipaj randica, Roboam shuti paipaj churimi mandajurca.